Tâm nchră wăch rgum âk mpưm văn nghệ sĩ, giảng viên, cán bộ tahen n’hanh sinh viên râng, ndrel tâm ôp mpeh rnoh khlay bah ăp nău nchih mpeh Kruanh Hồ Chí Minh n’hanh nău khlay way rŏ siƀŭt tâm bôr dăp nău mĭn rêh, nuih n’hâm kơt nti êng an rơh druh ndăm aƀaơ. Âk nău rgop an lah, tâm rơh keh mbrô, nău rŏ siƀŭt mpeh Wa mô dơn kơl rơh druh ndăm wât tay mpeh lịch sử rnoi nuĭh ma hôm rgop jêng trong gŭ rêh n’hanh nău dơn kan đah nsum mpôl đŏng. Tĭng Thạc sĩ Nguyễn Thị Phương, Giảng viên Phân hiệu Nhih nti Đại học Luật Hà Nội ta Dak Lak, nău tât ăp nău nchih mpeh Wa aƀaơ mô dơn ma siƀŭt in ma hôm âk trong ƀư êng êng tâm di đah băl mom đŏng.

“Văn hóa rŏ siƀŭt lah dŭt uĕh hôm. Yơn lah aƀaơ ăp băl mom mô kâp rvăt siƀŭt lha gay pơk uănh ma mbra pơk djăt, ntĭt kơt VOV Live, uănh phim tư liệu mô lah ăp nău nkoch mpeh lịch sử. Nê lah du trong tât đah nău gĭt blău đŏng”.

Ta rgum nchră, nghệ sĩ, nuĭh gŭ mĭn văn hóa Linh Nga Niê Kđăm nkoch âk nău nkah tâm ăp tơ̆ mâp Wa Hồ, bah nê treh têl rup gui du kruanh rđău kan sơh rmơih, dăch dêh n’hanh way rŏng an nău tâm rŏng mha êng an ƀon lan, kon se jê̆. Păng mpơl nău mĭn ăp nău nchih văn học nchih mpeh Wa nha hôm geh suan rêng lam dăng đah rơh kơn druh ndăm aƀaơ đŏng.

“Gâp mpŏng ăp nău nkoch nar aơ mô dơn nkah tay rup gui Kruanh Hồ Chí Minh, danh nhân văn hóa lam ntŭr neh, ma hôm rêng lam nău nđơr an ăp băl mom joi ăp ndrôm siƀŭt nchih mpeh Wa Hồ gay geh tay trong rƀŏng an nău rêh n’hanh nău mĭn hun hao bah he đŏng.”

Ndrel đah gâl rgum nchră, bôk nău kan hôm geh ăp nău mpât mprơ, vọng cổ n’hanh tâm nđŭr joi gĭt mpeh nău rêh, n’gâng kan bah Kruanh Hồ Chí Minh đŏng, wăch rgum âk mpưm sinh viên tât râng. Oh Quản Phạm Anh Thương an gĭt, bôk nău kan kơl sinh viên geh tay njônh uănh mpeh nău rêh, njăr trong hăn cách mạng bah Wa Hồ tâm ban kơt nkô̆ hôr khlay bah rŏ siƀŭt tâm kơt nti n’hanh tiăr nti săk nơm.

“Rơh tâm nchră dŭt geh nkô̆ hôr khlay. Mpôl hên dơi tât jru lơn mpeh ăp ndrôm siƀŭt mpeh Kruanh Hồ Chí Minh, dơi mâp ăp nhà văn, nhà thơ n’hanh ăp băl rŏ uănh đah ăp nău mĭn n’hanh njônh uănh êng êng mpeh ăp ndrôm siƀŭt nchih mpeh Wa, mbra wât kloh lơn mpeh nău rêh Wa, njăr trong hăn bah Wa”.

Tĭng Nhà văn Niê Thanh Mai, Kruanh Hội Văn học Nghệ thuật n’gor Dak Lak, nău rêng lam ăp ndơ geh ƀư văn học, âm nhạc nchih mpeh Wa mbra dơi ƀư tay ma âk trong gay n’hao rnoh khlay nău mĭn, nuih n’hâm uĕh lŏng, trong gŭ rêh Hồ Chí Minh tât dăch lơn đah nsum mpôl.

“Ndrel đah ăp nău kan ntral ta năp măt ri mpôl hên mbra rhôp ăp nău mprĭng, ăp nău mprơ mpeh Wa n’hanh mpôl hên mbra njuăt tât ăp đơn vị, tâm nê geh ăp phường n’hanh mpôl hên hŏ pah kan đah ăp ndrung krŭng n’hanh ăp ntŭk manh nhŭp kân pơk ăp nău nchih ma trong ƀoh ngơi tât lĕ rngôch ăp nuĭh”.

Tâm nchră mô dơn rgop bun dăp nău tâm rŏng, nuih n’hâm mŭt dêh đah Kruanh Hồ Chí Minh ma hôm rêng lam văn hóa rŏ siƀŭt tâm nsum mpôl, lơn lah rơh druh ndăm. Ma ăp ndrôm siƀŭt, nău nkoch geh nkô̆ khlay mpeh Wa, bôk nău kan hŏ rêng tay nău nđơr gay ăp nuĭh joi tât siƀŭt kơt du trong kơt nti, tiăr nti mât mêr nău nđơr geh rêh uĕh, rêh nsĭt ntil uĕh an nău rêh./.