Ta âk ƀon lan ta n’gor Lâm Đồng, nău nteh chĭng gong way ntoh n’gôr tâm ăp rơh tâm mâp ƀon lan, ndơ nsoh way ơm geh an nsoh tâm nău rêh ăp nar, ăp nău njroh mprơ, ndơ tanh cheh, tanh tôk mô lah nău way tâm nău rêh hôm nha geh ăp rơh mât rbăy n’hanh nti tay an kon său. Nău ueh êng ăp mpôl rnoi ta ntŭk: K’ho, Mạ, Chu Ru, Bunong, Chăm...ta n’gor Lâm Đồng gŭ kăr tâm nău mĭn, ma ntoh ang tâm ăp rơh ngêt sông, mir ba, tâm nău mbơh ngơi nău kan đah bri dak n’hanh ntŭk rêh jêng. Bu gru Ka Duýp, xã Đinh Trang Thượng an gĭt. “Lah nuĭh K’h, gâp saơ an lah aƀaơ lah mô geh mât rbăy nău ueh êng ăp mpôl rnoi rĭ ba kơi tay mbra roh sêng. Saơ nău kan nĕ, ta Đinh Trang Thượng, gâp mât leo du câu lạc bộ chĭng gong kon hoc. Bâh ăp nău kan jê̆ bâh ăp băl kon hoc, tâm ban kơt du chông ŭnh gay ma ăp oh gĭt vât nău khlăy văn hoá, gĭt mât rbăy n’hanh mât ndrăy ndơ êng. Ta meng nĕ, ta Đinh Trang Thượng hôm nha geh âk câu lạc bộ êng, n’hanh nău ŭch khlăy tơm ngăn lah mât rbăy nău ueh êng way ơm bâh nuĭh K’ho.

Nô Kră Jăn K’Druynhs - du hê nghệ sĩ mom nuĭh H’ho ta phường Langbiang-Đà Lạt an gĭt, nô ndrel đah klâp ma 20 nuĭh kan ndrel lah ăp nuĭh bu klô ndăm, bu ur drŭh ta jâng yôk Langbiang aƀaơ dôl tât râng djroh mprơ ta nkual pâl nđaih Langbiang Land. Bâh ăp nău chĭng, nău njroh way ơm, rmôt kan lĕ geh tâm rgop tay du đê̆ nău kan mhe gay ma nsĭt tay nău ueh êng ta ntŭk, an ueh lơn an bu năch yơn hôm nha geh mât nău ueh êng ta ntŭk đŏng. Ăp nuĭh kan ndrel lĕ geh ký tâm ton nău pah kan na nê̆ ta nkual pâl nđaih đah 3 rơh njroh mprơ ăp nar, bâh nĕ geh rnoh geh tâm di đăp mpăn lơn.

Bu ranh K’Keo, thôn Hàng Làng, xã Di Linh, n’gor Lâm Đồng an gĭt, ăp năm ba năp, Đảng n’hanh Ngih dak way geh nta nău dơh nơih kơl an ƀon lan ndâk nsơm ăp nău pah kan văn hoá way ơm. Mô dơn ta ƀon lan, chĭng gong hôm nha geh ndơ̆ tâm nău ntĭm nti ta ăp ngih nti, n’hanh tiăr nti tâm câu lạc bộ văn hoá. Bâh nĕ, ăp nar lơ ma geh âk mom ndăm tât râng nti tur chĭng goh gong. Tĭng nău mbơh bu ranh K’Keo, nău leo ƀư brah rhơn ba mhe lah rơh gay ma kon său ndơn kan, n’hao nău ueh êng mpôl rnoi.“Săk gâp nơm lah bu ranh ƀon, nuĭh geh nău knơm tâm nkual ƀon lan rnoi đê̆ jêng lah ŭch ndâk nsơm tay nău ueh aơ, gay ma ndrăy tay an kon său ba kơi nti tay. Lah geh nău dơh nơih rĭ mbra rdâk njêng, ndâk nsơm tay gay ma an mât tay nău ueh chĭng gong nău ueh êng rnoi nơm, lăp ndrel đah ntŭk rêh jêng ăp mpôl rnoi oh nô”.

Lôch geh nglăp nsum n’gor Lâm Đồng, Đăk Nông n’hanh Bình Thuận, n’gor Lâm Đồng mhe lĕ ngăch mbơh ƀư âk trong kan na nê̆ gay ma ndrel đah mât rbăy nău ueh êng đah hun hao nâp nâl. Ăp nău kan pâl nđaih ntŭk rêh jêng, ntŭk pâl chĭng gong, rơh nti nău way ơm geh ntrŭt đă an hun hao ta ntŭk kan ba dâng. Nuĭh ƀon lan jêng nuĭh tơm mât rbăy, nkre mât neu ueh êng, nkre njêng nău rêh đăp mpăn bâh di sản văn hoá. Nău ngăn an saơ nău ndơ̆ văn hoá ta ntŭk plơ̆ tay tâm nău rêh ăp nar mô dơn ntop mât rbăy ăp nău khlăy ueh bâh u che he nơm, ma hôm nha mpơl na nê̆ nău ueh êng geh bâh Lâm Đồng tâm nău lăp kan ndrel. Aơ lah nău kan tơm khlăy gay ma văn hoá ăp mpôl rnoi ta ntŭk geh mât rbăy nâp nâl, rêh ndrel đah aƀaơ n’hanh trĕ lam tât let năp tay.