Ta năp nău âk xã, phường n’hanh đặc khu geh rnoh prăk pă ntuh kơl nsum dŭt đê̆, UBND n’gor Lâm Đồng đă ăp ntŭk an geh ntrôl ngăch nău kan, nsrôih tât lơ 30/6 geh dŭt đê̆ 40% nău prăk pă prăk. Năm 2026, lĕ rnoh prăk ntuh kơl nsum pă an gưl xã bâh n’gor lah rlău 1.320 rmen prăk. Yơn lah, tât aƀaơ mơ geh prăk prăk rlău 126 rmen prăk, geh klâp ma 11%, đê̆ lơn đah rnoh tâm ton 18%. Dŭt nkah ngăn lah hôm nha geh 10 xã, phường geh pă rnoh prăk têh yơn ê hŏ pă prăk. Tĭng nău uănh năl bâh n’gâng kan têh, nkô̆ nău kan tơm dŭt âk knơm yor nău ntĭm leo kan mô răng dăng, nău dơi cán bộ mô blău, nău ƀư săm ƀŭt ntuh kơl jŏ jong n’hanh kŏ văk âk trong ntrơn ntŭk gŭ. Kruanh UBND n’gor Lâm Đồng Hồ Văn Mười đă ăp ntŭk doh rklaih ăp nău jêr, geh ntŭk kan rĭ ƀư dâl n’hanh pă prăk kan ta nĕ dâl.