Dâk bah năp jay cấp 4 kloh uĕh, tăng nău ngơi kon se n’gŭr răm tâm jâng gung, wa H’Pé Niê ta Ƀon Trí, xă Buôn Đôn, n’gor Dak Lak mô mpôn nău răm rnôk nkôp đah nău rêh hơm răm nar aơ n’hanh ăp năm khay ƀon lan hôm e ji ngot, trong hăn jêr, nău rêh drăp ndơ tĭng nar. Đah wa, nău rgâl nar aơ mô knŭng lah chor jay nâp nâl mô lah trong hăn pơk hvi, ma hôm nău saơ đăp mpăn, nsing nơm rnôk nuĭh ƀon lan dơi Đảng, Ngih dak, n’gâng kan ƀon lan mât uănh nău rêh, geh joi nău rêh đăp mpăn. Tă bah nĕ, ăp nuĭh ƀon lan tâm n’har bri kơt wa H’Pé Niê tĭng đah ƀon lan, mât nuih n’hâm ƀon lan ntŭk nkual n’har bri.

Aƀaơ ƀon lan dơi rêh đăp mpăn ngăn. Dak si, ngih samƀŭt, trong hăn... moh ndơ geh da dê, lah nsum lah hơm răm, uĕh lăng.

Nău răm bah wa H’Pé Niê lah gĭt saơ nsum bah âk rnăk ƀon lan rnoi mpôl đêt ta Dak Lak jêh ăp năm dơi gĭt tât ăp nău kơl hun hao wăng sa, n’hŭch ach o nâp nâl. Bah nău mĭn “ntop kơl geh êng”, ƀon lan lĕ rgâl ngăch mĭn ƀư mhe joi nău rêh jŏ jong, pơk n’hâm soan tâm ƀon lan. Tă bah tơm prăk manh kơl an ndrel nău hăn ndrel bah trong chính trị bah dâng, âk rnăk janh kơt dŏng khoa học kỹ thuật tâm nkra njêng, hun hao wăng sa rnăk wâl, ntơm hao rklaih ach o.

Tât khay 5 năm 2026, lam n’gor Dak Lak geh rlău 833.500 rnăk. Tâm rnôk nĕ hôm rlău 34.000 rnăk ach o, geh rlău 4,13%, êng rnăk ach o nkual rnoi mpôl đêt hôm nklăp 10%. Tâm năm kan aơ, Dak Lak mĭn n’hŭch ach o na nao lah ngoăy tâm âk nău kan chính trị khlay bôk năp, đah nău rƀŏng hŭch rnoh rnăk ach o tâm ƀon lan rnoi mpôl đêt bah 3% let lơ du năm. Gay dơi geh nău rƀŏng aơ, nău ƀư tơm bah trong chính trị ta bah dâng dơi mĭn tơm khlay.

Wa H’Đa Nê Byă, Bí thư Chi bộ Buôn Đôn, xă Buôn Đôn, n’gor Dak Lak an gĭt, trong kan n’hŭch ach o tâm ƀon dôl dơi kơl lor uănh tât bôk năp, jao nău kan na nê̆ an tĭng đảng, tĭng cán bộ ƀon gay kơl ăp rnăk ach o.

Mpôl hên rgum n’hao trong kan nkoch trêng, rgŏ jă kônh wa ƀon lan râng ăp ntrong leo tâm rlong rŏng dak, kơt ntrong leo ndâk njêng thôn ƀon mhe. Ăp ban mât uănh, nsum mpôl ta thôn, ƀon nchrăp ntop kơl joi nău rêh, kơl nuĭh ƀon lan hun hao wăng sa rnăk wâl gay rklaih ach o nâp nâl.

Ndrel đah hun hao wăng sa, Dak Lak uănh khlay ntuh kơl ntĭm ti, n’hao gĭt blău gay nâp nâl “jâng nsan nuih n’hâm ƀon lan” ta nkual jru ngai, ngăn lah nkual n’har bri.

Ta ăp xă n’har bri n’hanh êp nkual n’har bri mpeh Tây bah n’gor Dak Lak, âk ndơ ƀư ngih samƀŭt têh dôl dơi ndăn ndâk ƀư. Lvang 2025-2030, Dak Lak dơi Đảng, Ngih dak ntuh kơl rlău 485 rmen prăk gay ndâk ƀư 5 ngih samƀŭt phổ thông dân tộc nội trú 2 gưl.

Wa Lê Thanh Sơn, Groi Kruanh UBND xă Buôn Đôn an gĭt, ngih samƀŭt 2 gưl ta xă geh dĭng lĕ prăk rlău 158 rmen prăk, di nău ŭch nti nsơm an rlău 1.150 kon hŏk. Aơ mô knŭng lah ndơ ntĭm nti ma hôm lah nău kơl đăp mpăn geh nkô̆ nău jŏ jong.

Ndơ ƀư aơ mbra nta an nti nsơm uĕh lơn an oh kon ƀon lan rnoi mpôl đêt, nkre kơl nuĭh ƀon lan đăp mpăn tĭng neh, tĭng ƀon, hun hao wăng sa n’hanh ndrel mât n’har bri.

Rnôk nău rêh nar lơ đăp mpăn, nău nsing nơm bah nuĭh ƀon lan đah Đảng n’hanh Ngih dak dơi nâp nâl. Ta âk ƀon lan, ăp bu ranh ƀon, nuĭh nsing nơm lĕ jêng rmôt n’gâng tơm tâm trong kan nkoch trêng, rgŏ jă nuĭh ƀon lan n’hao njrăng ta ăp nău nsŭk nsôr, tâm nkhah tâm rnglăp rnoi nuĭh. Wa Bàn Tôn Nhất, nuĭh geh nsing nơm ta xă Ea Mdroh, n’gor Dak Lak an gĭt, trong kan njrăng n’gang mpeh nău mĭn gay mât njrăng đăp mpăn ƀon lan dơi ƀư ƀa ƀơ, na nao:

Gâp ƀa ƀơ rgŏ jă kônh wa rnoi mpôl đêt an njrăng, mô djăt tĭng nău m’hĭk mplư rlăm dun ngih dak. Knơm ƀư uĕh trong kan rgŏ jă jêng kônh wa ta aơ tĭng uĕh nău ntrŭnh bah Đảng, nău kơl pháp luật bah Ngih dak.

Jêh bơi 40 năm ƀư tĭng nău rgâl mhe, nău rêh wăng sa-rêh jêng ta âk ƀon lan nkual jru ngai bah Dak Lak lĕ geh njoat rgâl na nê̆. Ăp trong hăn mhe, ăp ntrong bư joi nău rêh săk rnglăy, ăp ngih samƀŭt dôl jêng ntŭk n’har bri mô knŭng ƀư rgâl muh măt nkual ƀon lan rnoi mpôl đêt ma hôm rgop nâp nâl nău nsing nơm bah ƀon lan đah Đảng, Ngih dak.

Tĭng wa Nguyễn Hoàng Giang, Giám đốc N’gâng kan Dân tộc n’hanh Tôn giáo n’gor Dak Lak, lvang 2021-2025, lĕ geh rlău 8.000 rmen prăk tơm prăk ăp bôk nău kan rƀŏng tĭng ngih dak dơi pă an ăp ntŭk tâm n’gor (geh n’ăp n’gor Phú Yên ơm). Tâm lvang 2026-2030, n’gor mbra mbơh ƀư săkr nglăy tay bôk nău kan rƀŏng tĭng lam dak, hăn ndrel hun hao wăng sa đah mât ndrăy văn hóa n’hanh đăp mpăn nău rêh jêng.

Đah Dak Lak n’hanh nkual Tây Nguyên, trong kan rnoi mpôl đêt n’hanh chroh rƀŭn lah n’gâng tơm bah đăp mpăn chính trị, rêh jêng n’hanh lah n’hâm soan an hun hao nâp nâl. Rnôk ăp nău kơl dơi mbơh ƀư tâm di đah hun hao wăng sa, mât rƀăy văn hóa n’hanh đăp mpăn nău rêh jêng mbra n’gâng tơm nâp nâl an ƀon lan mât uĕh naư geh, mât đăp mpăn n’hanh n’hao nău nsing nơm bah nuĭh ƀon lan tâm nău ntrŭnh bah Đảng, Ngih dak.

N’hêl na nê̆ ta Dak Lak an saơ, mât uănh nău rêh ƀon lan rnoi mpôl đêt, joi nău rêh nâp nâl an nuĭh ƀon lan lah trong mkra khlay bôk năp gay mât nâp đăp mpăn chính trị bah dâng. Aơ lah n’gâng tơm khlay gay nâp nâl tâm rnglăp lam rnoi nuĭh, ndâk njêng nâp nâl “jâng nsan nuih n’hâm ƀon lan” ntŭk bri krŏng yôk prêh Tây Nguyên./.