Ăp nar kêng dŭt pơh, bah ơm ôi, nkual têl ơm yău Tháp Nhạn hŏ geh âk mpưm năch n’hanh nuĭh ƀon lan. Nuĭh hăn thể dục, nuĭh hao mpoh nhang, hăn uănh pâl mô lah dâk kalơ bôk yôk uănh dak me Đà Rằng n’hanh đô thị Tuy Hòa bah kalơ. Nklang ntŭk soih aih, nđik ryơm n’hanh rngân uĕh, tháp yău ntoh đah gạch guh ntĭt êng bah ndơ mon jay Chăm pa. Du hê nuĭh, hăn jâng nkoch:

“Gŭ dăch ta aơ lah bu hao ta aơ tập thể dục hăn jâng gay tiăr nti n’hâm suan. He ri gŭ ngai yơn way hao ta aơ đŏng, djăt ma nar prao, nar pơh lah saơ oh yuh tâm jă hao ta aơ tập thể dục gay nuih n’hâm uĕh aih”.

Tĭng nuĭh ƀon lan ta ntŭk, moh “Núi Nhạn” n’hanh Tháp Nhạn, ntơm nơh lah ntŭk gŭ rêh bah dŭt âk sĭm nhạn. Rup gui sĭm mpăr ăp kêng măng hŏ ntơm jêng moh yôk dja. Tháp Nhạn dơi mon tâm nklăp kêng dŭt rôk năm XI, bôk rôk năm XII. Aơ lah ngoăy tâm dŭt đêt tháp hôm mât kơt ơm nău ôp mbah brah Thiên Y A Na.

Tháp Nhạn prêh bơi 24 mét, dơi dăp ntil Ntŭk têl ơm yău gưl neh dak mha êng. Mô dơn nsĭt geh rnoh khlay nău ơm yău kăl e n’hanh mon njêng jay, ta aơ hôm nkre đah nău rêh văn hóa, ôp brah lah yang bah nuĭh ƀon lan ta ntŭk rlău ăp rơh đŏng. Ăp năm mhe aơ, jâng gung Tháp dơi nkra uĕh tay, pơk hvi uĕh măt uănh, njêng trong dơh an nuĭh ƀon lan n’hanh năch hăn uănh pâl, rlong saơ. Tĭng wa Nguyễn Thị Thục Oanh, ta phường Tuy Hòa, rnoh âk năch tât đah Tháp Nhạn nar lơn ma mpưm, lơn lah tâm khay rlu nti n’hanh ăp rnôk lễ hội.

“Ta aơ hŏ êng đah ntơm nơh, rgâl nkra tay dŭt âk, saơ uĕh lơn, wơt năch tât uănh pâl. Tâm khay rlu nti năch âk mpưm, kon se rlu nti lah ta aơ lơn ma âk năch, mô lah tâm ăp rnôk lễ, tết, dăch kêng nar vía Bà, nar vía Bà âk mpưm ngăn, năch pâl nđaih tât mbah dăn nău lap âk đŏng”.

Ntŭk gŭ huêng khlay ndrel ntŭk gŭ nklang đô thị meng dak lêng đŏng an saơ Tháp Nhạn têl nkah êng đah âk năch rnôk hăn tât mpeh luh nar n’gor Dak Lak. Ntơm bah chông yôk Nhạn, năch mbra uănh saơ lam lĕ rngôch đô thị Tuy Hòa, dak me Đà Rằng n’hanh nkual mpông dak lêng bah ngai. Yuh Tống Thị Hải Yến, năch tât bah n’gor Phú Thọ nkoch:

“Hao ta aơ ri he saơ dŭt aih nuih n’hâm, dŭt nđik uĕh. Ntŭk huêng khlay kơt aơ, ta nklang nkual ƀon têh dŭt âk nuĭh ƀon lan gŭ, uĕh mhe, ndrĭ yơn hôm geh du ntil ndơ nê nơh dŭt huêng khlay ƀư kon nuĭh dŭt n’gơch aih nuih n’hâm. Lor bôk năp he saơ du ntŭk mon ƀư nha hôm bah rôk năm 11 tât aƀaơ hôm nâp uĕh kơt ơm, ri he saơ nău mât ndray, nkra têh uĕh tay bah ngih dak lah dŭt uĕh”.

Tâm trong rƀŏng hun hao pâl nđaih bah n’gor Dak Lak lôch n’glăp nsum, nkual mpeh luh nar đah nău dơh uĕh geh dak lêng, geh drăp ndơ ơm yău ntlơi an tay văn hóa n’hanh bri dak uĕh măt uănh dôl dơi ntrŏng lah ntŭk hun hao pâl nđaih khlay. Tâm nê, Tháp Nhạn dơi uănh lah ntŭk rgum buăt nthoi đah pâl nđaih văn hóa, pâl nđaih huêng khlay n’hanh rlong uănh saơ rup uĕh đô thị meng dak lêng. Wa Trần Thị Bử, Groi Giám đốc mât uănh ntŭk têl ơm yău, Sở Văn hóa, Thể thao n’hanh Pâl nđaih Dak Lak an gĭt:

“Lôch rnôk dơn mât ntŭk têl ơm yău Tháp Nhạn ri Ban mât uănh ntŭk têl ơm yău mbra nkra tay mpêr n’gar nking bah năp Tháp gay đăp mpăn an năch rnôk hăn tât uănh pâl n’hanh sĭt tay ta ntŭk têl ơm yău. Ban mât uănh ntŭk têl ơm yău geh trong nchrăp ƀư lễ vía Bà ăp năm gay rhŏ dŏng an năch n’hanh ăp nuĭh ŭch tât mpoh nhang lễ vía Bà ta Tháp Nhạn gay wăch rgum năch pâl nđaih hăn tât ta aơ đŏng”.

Nklang nău rêh mhe aƀaơ dôl rgâl tĭng nar ntŭk đô thị meng dak lêng, Tháp Nhạn hôm ntoh mpơl kơt du n’gâng ntơm văn hóa, kăl e n’hanh huêng khlay bah nkual neh mpeh luh nar n’gor Dak Lak đŏng. Rnôk nar kêng măng  nhâp bah chông yôk Nhạn, uănh dak me Đà Rằng lêp ƀlêp chrêk măt nar sol n’hanh nkual ƀon lan Tuy Hòa dôl ntơm ƀlip ƀlip sol ŭnh ,Tháp Nhạn tâm ban kơt nkoch tay mpeh nău tâm rlai lăp nsum văn hóa, mpeh suan rêh jôn wên bah drăp ndơ ơm yău ntlơi an tay tâm nău rêh aƀaơ./.