Tât aƀaơ, lam n’gor pă an klâp ma 927 rmen prăk, geh rlău 12% đah nău nchrăp prăk Thủ tướng Chính phủ pă jao, đê̆ lơn đah rnoh râng geh nsum ta lam dak. Êng nkual mpeh nhâp nar n’gor Quảng Ngãi geh pă an klâp ma 2.800 rmen prăk ntuh kơl nsum năm 2026. Tât lơ 20/5, nkual aơ geh pă an  rlău 514 rmen prăk, geh rlău 18% nău nchrăp geh pă prăk. Nuĭh leo kan UBND n’gor Quảng Ngãi an lah. ta nkual Tây Nguyên nchrăp lăp khay mih, lah mô geh ntrôl ngăch pă prăk mbra geh khuch âk tât ăp nău kan ƀư trong, ăp nău nchrăp dôl kan. Nuĭh leo kan UBND n’gor đă ăp nuĭh tơm ntuh kơl, ăp ntŭk tâm ton pă prăk tĭng ăp khay, njoăl nău nchrăp kan na nê̆ gay ma rgum kan, uănh nđôi. UBND n’gor đă ăp ntŭk rgum mât uănh na nê̆ leo kan rjăp ăp nău kŏ khan mpeh ntŭk ntrơn gŭ ntoch jong âk năm. Ăp ntŭk hôm nha kŏ khan an geh tâm rgop na nê̆, ndrel gŭ tâm nchră gay ma doh rklaih, mô an geh nău tâm nje ƀư khuch tât nău kan nsum.