Tâm du rơh livestream dŭt khay 4/2026 yor N’gâng kan Công thương Gia Lai tâm rgop đah Cục Thượng mại điện tử n’hanh Kinh tế số (N’gâng kan Công thương) ƀư, ndơ kah bánh ít lá gai Hoàng Đông (xă Bình An, n’gor Gia Lai) lĕ tăch hăng rbăn ndơ knŭng tâm đêt nar.

Yuh Hồ Thị Mỹ Phúc-nuĭh tơm ntŭk-an gĭt, ndơ lĕ geh OCOP 3 sao bah năm 2019, yơn bah năp đaơ knŭng tăch tâm n’gor yor mông nar mât prăp đêt nar. Jêh rnôk kơt dŏng trong ƀư hút chấn không gay jong nar dŏng, tâm di gay rdêng ngai, ndơ lĕ dơi tâm di đah tăch điện tử, đah ăp samƀŭt nchăm ndơ hao tât hăng rhiăng mlâm.

Ăp rơh Megalive bah N’gâng kan Công thương ƀư, ri ndơ bah mpôl hên rêng dŭt hvi tâm mạng xã hội, ăp nuĭh gĭt tât dŭt âk. Aơ lah trong mkra kơl an doanh nghiệp hun hao ngăch. Du rơh Mega lie dơi hao tât rbăn samƀŭt nchăm. Mpôl hên mbra hút chân không ndơ, 2 tât 3 nar mbra tât ty nuĭh rwăt, đăp mpăn uĕh kah.

Tâm ban ma nĕ, Hợp tác xã Nông Ngư Nghiệp Mỹ An (xă Phù Mỹ Đông, Gia Lai) bah năp đaơ mâp jêr jŏt mpeh ntŭk tăch bôl ndơ tinh dầu bah nơm geh tâm di OCOP. Jêh rnôk rgâl an tăch ndơ ta ăp trong trực tuyến, Hợp tác xã lĕ pơk hvi geh ntŭk tăch, đah geh prăk hao na nê̆ tâm 2 năm bah năp.

Yuh Nguyễn Thụy Thúy Vi, Groi Kruanh Hội đồng quản trị HTX an gĭt: tăch rgâl điện tử mô knŭng kơl gĭt tât năch hvi lơn ma hôm jêng trong tâm mâp na nê̆, bah nĕ rgâl ndơ n’hanh trong tăch tâm di đah nău ŭch ntŭk tăch rwăt.

Ta năp đaơ, mpôl hên knŭng tăch ta ntŭk yơn jêh nĕ gĭt saơ nău geh bah tăch ndơ online jêng mpôl hên lĕ mbơh ƀư chup rup pơk clip n’hanh mbơh ƀư ăp rơh livetream ta ntŭk tăch điện tử, mô lah ta trang fanpage bah hợp tác xã n’hanh jêh rnoh samƀŭt nchăp ndơ hao đŏng, mpôl hên nar lơ hun hao âk mpeh nău dơh tăch online âk lơn.

Aƀaơ Gia Lai geh nklăp 400-450 ndơ OCOP, dŭt âk lah ndơ lŏ mir, ndơ kah ta ntŭk. Yơn lah, ăp nuĭh tơm nkra njêng OCOP ta n’gor hôm e âk ta ntrong ƀư jêt, đêt mpeh nău blău mrô n’hanh dơi gĭt tât ntŭk tăch, ƀư ntŭk luh mô hŏ đăp mpăn.

Tâm 2 năm bah năp, âk bôk nău ntop kơl nău blău tăch trực tuyến, livestream, ndâk ƀư nkô̆ nău mrô... lĕ dơi ƀư, kơl ƀon lan n’hanh hợp tác xã ntơm ƀư bên đah ntŭk tăch ta trong mrô. Tă bah nĕ pơk hvi geh ntŭk tăch, ndâk ƀư geh ndơ moh êng.

Wa Nguyễn Đình Kha, Groi Giám đốc Công thương Gia Lai an gĭt, tâm lvang mhe, n’gor mĭn lah tay tăch rgâl ta điện tử lah du trong khlay. Lvang 2026-2030, n’gor mbra rƀŏng tât ntrôl dăng tăch rgâl điện tử rlŏ rlău n’har bri, tă bah nĕ mô knŭng hao khlay ndơ lŏ mir ma hôm ntơm ndơ̆ moh êng ndơ ta ntŭk hao luh ntŭk tăch lam ntŭr neh.

Mpôl hên lĕ ndâk njêng trong nchrăp rgâl mrô bah nău kan công thương. Tâm nĕ ntil nău tăch rgâl khlay an rgâl mrô ta ăp ntil nău kơt tăch tă bah ăp trong tăch rgâl điện. Đah ntil nău tăch n’gluh, mpôl hên uănh khlay tâm tăch rgâl ta điện rlŏ rlău n’har bri tâm rgop đah ăp ntŭk tăch điện tử lam ntŭr neh. Nchrăp tâm khay 5 aơ, mpôl hên mbra ƀư du rƀŭn nchră, tâm nchră mpeh trong tăch ndơ điện tử rlŏ rlău n’har bri.

Rgâl mrô dôl ntơm ƀư rgâl trong ndơ lŏ mir Gia Lai gĭt tât ntŭk tăch, pơk luh ăp trong tăch ngăch n’hanh săk rnglăy lơn. Rnôk nuĭh ƀon lan ngăn ngên ƀư tơm công nghệ, ăp ndơ uĕh kah bah n’gor mô knŭng hăn ngăch lơn, ma hôm hun hao nâp nâl rnôk geh ntŭk tăch hvi lơn./.