Ta ăp ntŭk rdâk njêng nhih nti phổ thông nội trú rep gưl ta nkual n’har bri n’gor Quảng Ngãi, ƀư ndăn ngăch, kơp lĕ ma tâm ăp nar rlu lễ. Ntơm bah ơm ôi tât kêng măng nkai, nău nteh n’gôr máy tâm pot bê tông, nău nteh koh loih n’gloh lam yôk bri, njêng nău kan n’gôr gră. 

Ta ntŭk ƀư Nhih nti phổ thông nội trú rep gưl tiểu học – trung học cơ sở xã Mô Rai, n’gor Quảng Ngãi (ntơm nơh mpeh nkuâl Sa Thầy, n’gor Kon Tum), hang rhiăng kỹ sư, công nhân ƀư ndăng măng nar lĕ ma lễ 30/4, 1/5. Ăp ndơ ƀư lĕ ma ntu n’gâng, jrŏng, dâm, lăk tât mon mpir an ƀư ăp kôp. Bol trôk nar nkual n’har bri mih nar ndal, nău kan dơi mât ngăch mbro. Mô đêt nuĭh kan ta ntŭk râng ƀư, nkre ntop geh tay tơm wăng sa, nkre rgop tay suan rdâk njêng nhih nti an oh kon he.

Wa Nguyễn Văn Hồng (66 năm deh), gŭ ta ƀon Sộp, xã Mô Rai, n’gor Quảng Ngãi hŏ krêp dêh đah ntŭk ƀư nhih nti 2 khay. Nău kan ăp nar bah păng lah ntrŭp loih gay tuh bê tông. Đah păng, nhih nti mô dơn lah nău kan ma hôm lah nău mpŏng rgâl geh an kon se ntŭk n’har bri:

“Nuĭh kan mpôl hên nsrôih hăn kan gay ndăn ngăch rdâk njêng. Gâp kan ta aơ hŏ 2 khay hôm, ntơm bah 6h n’gul ôi tât 5h kêng măng. Gâp kan ngăn ma jâng ti dơm, kan ăp nar. Nuĭh ƀon lan nkual n’har bri nkoch dŭt ŭch rŏng nhih nti ơm ƀư lôch jêh gay kon său geh ntŭk ma gŭ kơt nti uĕh”.

Ndrel đah mpôl ƀư, rmôt mbơh nti groi nđôi geh 8 nuĭh kan mbro rlău nar rlu đŏng, groi nđôi tĭng ntil gâl kan bah rpaih tât ƀư lôch jêh.

Ntŭk ƀư nhih nti phổ thông nội trú rep gưl tiểu học – trung học cơ sở xã Mô Rai geh lĕ rngôch rnoh ntuh kơl rlău 225 rmen prăk, ƀư jŏ tâm 215 nar. Tât aƀaơ, rnoh ƀư lôch jêh tât nklăp 28%, hôm mbrơi rđĭl đah trong nchrăp. Lôch ƀư jêh ntu jrŏng, ăp ntŭk dôl ntrôl ngăch ƀư săk bah lơ.

Tĭng trong nchrăp, tât nar 30/7 mbra ƀư lôch jêh ăp gâl kan tơm, lôch nê ƀư wat jêh tâm kêng dŭt khay 8. Yơn lah, jâng neh rbăn ân nkra lơh kỹ thuật hŏ khuch tât rnoh ngăch. Lôch nar rlu lễ, nuĭh ndranh ƀư nchrăp kơi ntop tay 90 nuĭh kan, n’hao lĕ rngôch rnoh nuĭh kan hao bơi 300 nuĭh.

Choih ân rdeng bah ngai, hao khlay rlău bar tơ̆; lŭ, choih raka, gạch du rơh hao khlay đŏng, khuch tât roh huach prăk dŏng n’hanh rnoh ngăch ƀư. wa Nguyễn Ngọc Bách, Kruanh rđău đă ƀư Nhih nti phổ thông nội trú rep gưl tiểu học – trung học cơ sở xã Mô Rai an gĭt, rnoh khlay lŭ loih choih xi măng hao ntoh tay mpet jâk âk đŏng. 

“Aƀaơ, lĕ rngôch ăp rot jay gŭ ta nhih nti hŏ rdâk rpaih lĕ hôm, geh ăp jay hŏ mon prêh tât 3 dăp. Mpeh nuĭh tơm ƀư ndranh dôl n’hao âk nuĭh kan gay ƀư ndăn ngăch. Tâm ăp nar rlu lễ, lĕ rngôch nuĭh kan ta nhih nti nha hôm kan kơt ơm đŏng. Tâm rnôk rlu lễ, công nhân pah kan ta nhih nti dơi ntop kơl tay prăk nkhôm. Nuĭh tơm ndranh ƀư nsrôih ƀư lôch jêh kơt nău hŏ ton”.

Mhe aơ, Kruanh UBND n’gor Quảng Ngãi hŏ ôp uănh rnoh ngăch ƀư ăp nhih nti nội trú ta 4 xã n’har bri Rờ Kơi, Mô Rai, Sa Loong n’hanh Dục Nông. Ăp nhih nti dơi rdâk ntơm bah khay 11/2025, nchrăp ƀư lôch jêh, n’glăp dŏng ntơm bah năm nti 2026–2027.

Wa Y Ngọc, Groi kruanh Rnâng kan UBND n’gor Quảng Ngãi lah rjăp, ăp nhih nti ân kan nsum lhăt, ntrôl ngăch ƀư, đăp mpăn nâp uĕh; nkre lor nchrăp droh rklaih ăp jêr jŏt mpeh tơm prăk n’hanh lŭ loih rdâk mon.

“Rđĭl đah ăp ntŭk rdâk njêng êng êng, Nhih nti phổ thông nội trú rep gưl ta  xã Mô Rai geh âk jêr jŏt lơn tă bah neh ntu mô nâp uĕh. Nuĭh tơm ntuh kơl n’hanh nuĭh ndranh ƀư ân ton n’glăp nhih nti lăp dŏng tâm năm nti 2026–2027. Gâp dăn đă nuĭh tơm ƀư ndranh rgum tay nuĭh kan, ndăn ƀư ngăch gay an ƀư ăp kôp ndơ tâm trôm”.

N’gor Quảng Ngãi dôl an rdâk njêng 9 nhih nti phổ thông nội trú rep gưl ta ăp xã n’har bri, tâm pă jêng 2 gâl, đah rnoh têh ăp nhih nti ntơm bah 700 tât 1.600 kon se nti, dơi ntuh kơl ăp kôp. Mô dơn n’hao geh ntŭk kơt nti, ăp nhih nti dja hôm rgop đăp mpăn nău rêh, kân jâng ƀon lan gŭ, đăp mpăn njrăng n’gang neh dak, rnă  njrăng nkual n’har bri đŏng.

Nklang yôk nor n’har bri, rnoh ngăch ƀư rloh rlău nar lễ mô dơn lah nău nkoch mpeh rnoh ngăch ƀư, ma hôm mât nău mpŏng mpeh ăp jrô nti mhe đŏng, nău rêh mhe an kon se nti nkual n’har bri jêr jŏt./.