Xă Tà Năng, n’gor Lâm Đồng geh rnoh neh bri rlău 25.800ha, rnoh nuĭh bơi 14.000 nuĭh, tâm nĕ ƀon lan rnoi mpôl đêt geh bơi 78%. Jêh bơi 1 năm pơk dŏng, tât aƀaơ lam Đảng ủy, UBND, Ủy ban MTTQ Việt Nam xă mhe geh dĭng lĕ 41 biên chế n’hanh mô tŏng 21 biên chế. Wa Nguyễn Tiến Điền, Bí thư Đảng ủy xă Tà Năng, an gĭt, tâm rnôk rnoh nău kan dŭt âk ma Văn phòng Đảng ủy xă knŭng geh 2 biến, Ban Xây dựng Đảng 3 biên chế, Ủy ban Kiểm tra 2 biên chế, rkum mặt trận đoàn thể mô geh chuyên viên n’hanh rkum n’gâng kan ƀon lan mô tŏng tât 9 biên chế. Lĕ ndrĭ nti nsơm, nău blău rmôt cán bộ xă lŏ mô tâm ban.

Knŭng geh 4 đồng chí rnâng kan Bí thư, Groi Bí thư rnâng kan Kruanh n’hanh Groi Groi lah tâm pleh bah gưl n’gor, gưl nkuăl sĭt, hôm ƀa ƀă ăp biên chế lah cơ học bah 2 xă nglăp nsum jêng đah nti nsơm, nău blău kan mpeh tâm di nău đă nău kan geh măt hôm dŭt đêt. Yor mô tŏng biên chế jêng lah du đêt công chức an 2 nău kan dŭt âk nău kan. Aƀaơ du chuyên viên an ƀư nău kan bah 4-5 n’gâng kan ntĭm rđău trŭnh.

Êng đah nău mô tŏng biên chế ta xă dŭt jêr jŏt Tà Năng, nău cán bộ lah ntŭl rlong n’ăp ăp phường dơh nơih bah Lâm Đồng. Tâm nĕ, phường Xuân Trường-Đà Lạt, trong kan cán bộ lah nău rwê têh ngăn. Wa Ngô Thị Mỹ Lợi, Bí thư Đảng ủy phường Xuân Trường-Đà Lạt, an gĭt, nău kan âk rlău xă ơm, âk nău kan têh ƀư âk cán bộ dăn rlu kan.

Rmôt cán bộ công chức bah phường Xuân Trường-Đà Lạt aƀaơ dŭt jêr jŏt, nău dăn rlu kan, ntlơi kan dôl hao. Đảng ủy lĕ geh 2 công chức dăn rlu. Đah Ủy ban geh 3 cán bộ kruanh gưl trưởng dăn rlu kan tĭng nău ŭch mô geh ăp nău kơl. Tât aƀaơ hin mpôl hên lĕ dơn geh 4 samƀŭt dăn rlu kan bah cán bộ công chức.

Jêh ƀư tĭng nglăp nsum 3 n’gor Dak Nông, Bình Thuận n’hanh Lâm Đồng, n’gor Lâm Đồng mhe geh 124 xă, phường, đặc khu. Tâm rnôk dăp, dơh đêt ngăch n’gâng kan Lâm Đồng geh 2.529 nuĭh dăn rlu kan tĭng Nghị định mrô 178; 145 nuĭh tĭng Nghị định mrô 07 n’hanh ƀư tĭng n’hŭch biên chế đah 1.450 nuĭh pah kan mô chuyên trách gưl xă. Nău mbơh mhe ngăn bah N’gâng kan Nội vụ n’gor Lâm Đồng, jêh bơi 1 năm nglăp nsum, nkôp đah biên chế dơi jao aƀaơ gưl xă mô tŏng 823 biên chế, gưl n’gâng kan n’gor, nău kan mô tŏng 990 biên chế. Wa Nguyễn Ngọc Phúc, Groi Kruanh UBND n’gor Lâm Đồng, an gĭt, dôl geh dŭt âk jêr an  cán bộ gưl xă n’hanh aơ nkre lah nkô̆ nău, nkre lah nău ƀư trong kan cán bộ jêng jăch ndăn:

Dŭt âk nău kan bah gưl nkuăl n’hanh âk nău kan bah gưl n’gor jao sĭt an gưl xă. Jêr tal 2 nău blău, nti nsơm bah oh nô mô dơi gĭt tât ăp rnoh nău kan bah năp đaơ bah nkuăl n’hanh n’gor. Nău tal 3 tay geh nău jêr nkre nău way kan nkre nău jêr mông nar mbơh, an mkra tĭng di nar ngăch samƀŭt rhăch nău hành chính du mpông. Lah mô dăp nău kan bah n’gâng kan gưl xă n’hanh dăp nuĭh kan bah gưl xă ri nĕ lah du ntŭk kol têh, he an uănh nău kan aơ.

Ta rƀŭn nchră n’gul gâl 1 năm ƀư tĭng ntrong ƀư n’gâng kan ƀon lan 2 gưl, N’gor ủy Lâm Đồng ntĭm kloh: Rnoh nău kan ta gưl xă hao âk yơn biên chế tŏng, jêng tât nău cán bộ an ƀư âk nău kan, ƀư jêr âk; nău kan tâm pă biên chế n’hanh nău prăk kaih, nău kơl an mô tâm di ngăn khuch tât nău mĭn n’hanh n’hâm soan pah kan bah rmôt cán bộ, công chức bah dâng. Wa Đỗ Thanh Bình, Ủy viên Trung ương Đảng, Kruanh N’gâng kan Nội vụ, an lah, bah nău ngăn 1 năm pơk dŏng ntrong ƀư n’gâng kan ƀon lan 2 gưl n’hanh mĭn kloh năm 2026 lah “Năm n’hao uĕh blău cán bộ bah dâng”, Lâm Đồng an kơp uănh, uănh lah, rgâl tâm di rmôt cán bộ xă, phường; ntrôl dăng ntĭm nti hăn jru tĭng nău ŭch:

Tĭng xă, tĭng phường uănh lah tĭng cán bộ n’gluh an nău ŭch ntĭm nti. NKre tĭng lôch uĕh ntŭk gŭ nău kan n’hanh geh trong ƀư wăch rgum nuĭh kan gĭt blău âk mpeh trong kan ta bah dâng. Uănh tât tâm pă n’hanh mkra nău kơl prăk kaih đah nuĭh pah kan mô chuyên trách. Ăp gưl, ăp nău kan bah Lâm Đồng nchrăp lor, dŭt n’hâm tâm rdâk ƀư tĭng, rgum dôh rklaih ngăch ăp jêr jŏt, wăk kol, ăp ntŭk wăk gay ndơ̆ ntrong ƀư n’gâng kan 2 gưl pơk dŏng nar lơ tam, săk rnglăy.

Mkra “ntŭk kol” cán bộ jêh bơi 1 năm pơk dŏng n’gâng kan ƀon lan 2 gưl, rhoăt nău blău ơm bah nău ngăn, n’gor Lâm Đồng dôl dăp tay, jêh rdâk ƀư n’gâng kan ƀĭt joet tâm trong chính trị tĭng nuih n’hâm ntĭm rđău bah Trung ương. Ndrel đah nĕ Lâm Đồng dôl rgum uĕh blău rmôt cán bộ, công chức, viên chức, ngăn lah gưl bah dâng; kơp uănh tay, dăp cán bộ tâm di đah nău đă kan; n’hao ntĭm nti mpeh nău way kan, nău blău mrô n’hanh nuih n’hâm rdâk ƀư nău kan gay pơk dŏng n’gâng kan ƀon lan 2 gưl ngăn ngên, săk rnglăy sŏk săk rnglăy na nê̆, nău tâm di nuih n’hâm bah nuĭh ƀon lan, doanh nghiệp ƀư mâng treh./.