N’gul nar ôi, jay văn hóa Tổ dân phố Cao Thắng, phường Ea Kao âk nuĭh tât ƀư samƀŭt neh ntu, hộ tịch, uănh năl ntŭk gŭ. Mô hôm nău nuĭh ƀon lan hăn âk ntŭk, kâp âk nar kơt bah năp, cán bộ phường djôt lĕ gưl “du mpông” jŭr tât nkual ƀon lan gŭ gay rhŏ an nuĭh ƀon lan.

Wa Lương Đình Trường, nuĭh ƀon lan dân Tổ dân phố Cao Thắng an gĭt, âk năm aơ kônh wa ƀlao hăn ngih pah kan hành chính yor ngai, nkre mô gĭt nuĭh ôp. Aƀaơ cán bộ hăn tât ta ntŭk ntĭm tĭng gưl jêng ăp nuĭh rhơn đŏng.

Kônh wa dŭt rhơn, răm rhơn n’hanh kônh wa tât ta aơ dŭt âk gay mkra samƀŭt hành chính. Cán bộ êp ƀon lan, rblang ntĭm kloh, nău aơ dŭt lah di nău kơl bah Đảng n’hanh Ngih dak.

Tĭng wa Đỗ Thị Nguyệt, Groi Giám đốc Ntŭk kan Rhŏ nău hành chính công phường Ea Kao, knŭng tâm nar ôi bôk năp ƀư ta nkual ƀon lan gŭ lĕ geh 170 nuĭh tât ƀư samƀŭt, rlău âk nău nchrăp bôk năp.

Đah pơh pah kan khlay hăn ƀư samƀŭt hành chính ri nău rƀŏng bah Ủy ban nhân dân phường lah nsrôih mkra tâm 7 nar n’hanh đah samƀŭt rhăch nău dơh ri mbra mplơ̆ jêh tâm nar dâl.

Jêh du năm pơk dŏng ntrong ƀư n’gâng kan ƀon lan ƀon lan 2 gưl, ta Ea Kao, nău nuĭh ƀon lan saơ kloh ngăn mô knŭng lah samƀŭt ngăch lơn ma hôm n’gâng kan ƀon lan êp ƀon lan lơn, nchrăp lor lơn.

Hăn ta trong bê tông jong 600 mét mhe jêh ta Tổ dân phố 5, wa Dương Lê Sơn mô mpôn nău răm. Lôch rlău n’gul rach năm, trong aơ hôm e lah trong neh. Âk rơh rƀŭn ƀon lan rgŏ jă pơk trong mô dơi. Yơn knŭng jêh đêt khay pơk dŏng n’gâng kan mhe, nuĭh ƀon lan lĕ tâm ban ŭch an neh bơi 200 mét vuông neh n’hanh rgop bơi 200 rkeh prăk gay ƀư trong hăn.

 N’gâng kan ƀon lan 2 gưl ri ngăch n’hanh tâm pă uĕh lơn, ntop kơl an kônh wa nuĭh ƀon lan tâm hun hao wăng sa nkra njêng kơt trong hăn nsong. Lam ƀon lan tâm rnglăp, lĕ rngôch ăp nuĭh ndrel ty wât nơm ƀư trong ri uĕh jêng kônh wa tĭng kơl dŭt n’hâm.

Bah âk ntoh lư kơt nĕ, phường Ea Kao rgŏ jă ntrong leo “Nău kan ngih dak, nău kan ƀon, neh khlay an đŏng” gay pơk hvi trong hăn, nkra tay nkual ƀon lan n’hanh hun hao pâl nđaih. Rƀŏng tĭng nău ntrŭnh aơ, âk rnăk ndrel chùa Phổ Hiền lĕ an êng neh pơk hvi trong hăn mper n’glău Ea Kao, jêng nkual ƀon têh hăn jâng rhŏ an nsum mpôl. Thượng tọa Thích Phước Huyền, trụ trì chùa Phổ Hiền an lah, nău an neh mô knŭng gay pơk trong ma hôm pơk luh ntŭk ntii rgum rƀŭn mhe an nuĭh ƀon lan.

Gay dơi ƀư du nkual ƀon têh hăn jâng kơt aơ dŭt uĕh an nău nti thể dục an âk nuĭh ranh, phật tử. Gâp gŭ chùa Phổ Hiền dŭt răm gay an ndơ ƀư aơ dơi jêh uĕh bah năp năm 2030.

Mô knŭng gung trong rgâl, nu nău rnă njrăng đăp mpăn ta bah dâng rgâl na nê̆ đŏng. Nô Hồ Hậu, ntŭh tơm homestay ta phường Ea Kao an gĭt, âk nău kan dơi rmôt công an mkra ngăch knơm tĭng ta ntŭk gŭ.

Rnă njrăng đăp mpăn uĕh dŭt âk lơn; ntĭt nsa gâp geh du homestay ta trong Nguyễn Trường Tộ, tâm kêng măng geh  nuĭh ntŭng ri pơk uănh camera njuăl công an. Ôi nar bah kơi gâp hăn công an pah lan ri Kruanh Công an phường an gĭt lĕ nhŭp nuĭh dâl.

Jêh nglăp nsum, phương Ea Kao lĕ mkra rlău 2.000 samƀŭt rhăch samƀŭt hành chính đah rnoh di n’hanh bah năp nar geh 100%; samƀŭt trực tuyến geh 99%; rnoh di nău ŭch bah nuĭh ƀon lan n’hanh doanh nghiệp geh lĕ rngôch. Âk rnoh an wăng sa-rêh jêng lôch rlău nău nchrăp, tâm nĕ sŏk an tơm prăk rlău 107% trong nchrăp n’gor jao.

Wa Đặng Gia Duẩn, Bí thư Đảng ủy phường Ea Kao an lah, săk rnglăy têh ngăn tâm rmôt cán bộ.

Nău têh ngăn lah mpôl hên lĕ dơi ƀư bôk nău tâm ban ŭch ƀon lan, du nuih n’hâm cán bộ na nao lĕ năm kan 2025-2030. Mpôl hên lĕ an nghị quyết rgâl mhe mpeh rgâl hành chính n’hanh rgâl mrô, mpeh pâl nđaih hăn ndrel đah tăch rgâl nău rhŏ n’hanh dăp rgum. Tâm năm tât bah meng nău ƀư tĭng ăp nghị quyết têh mpôl hên mbra rgum dŭt n’hâm tâm nău hao jêng 2 rnoh mrô.

Du năm mô di mông nar jong, yơn bah ăp trong dơi pơk hvi, ăp păng samƀŭt rhăch nău dơi mkra dâl ta nkual ƀon lan gŭ tât nău nchrăp lor bah n’gâng kan ƀon lan bah dâng... ntrong ƀư n’gâng kan ƀon lan 2 gưl ta Ea Kao dôl an saơ nău rgâl na nê̆ bah du jâng trong hành chính dăch ƀon lan, êp ƀon lan n’hanh rhŏ an nuĭh ƀon lan ngăn ngên lơn./.