Ntŭk rgum ntĭm nti mha êng Pandur, ta thôn Xuân An 2, xã Bắc Bình, n’gor Lâm Đồng (mpeh nkuâl Bắc Bình, n’gor Bình Thuận ơm) – ntŭk dôl dŏng ăp ndơ kơl săm kon se rnhônh rnhanh gŭ ndôn êng n’hanh jêr jŏt tâm kơt nti lăp rgum ndrel băl mpôl ngăch dăng ngăn. Nai ntĭm Thanh Thị Hằng, nuĭh krêp dêh đah ntŭk Rgum ntĭm nti ntơm bah bôk năp nkoch, aơ mô dơn lah ntŭk pah kan ma hôm lah jay gŭ bah he nơm đŏng.

Đah kon se ji đit prêng gŭ ndôn êng ri nău ntĭm nti ăp oh mon dŭt jêr jŏt rđĭl đah ăp kon se ngăn. Nê lah suan ntrôl kơl kon se grêt dêh ndrel đah Ntŭk rgum ntĭm nti gay kơi nti ren tay nău gĭt blău n’hanh nău way kan ntĭm nti an ăp kon se du trong tâm di lơn, kơl an ăp kon se ơm lăp rgum ndrel nsum mpôl. Nê lah nău rhơn têh bah kon se.)

Hôm đah nai ntĭm druh Lư Thị Mỹ Viên, nău rhơn dŭt têh bah păng lah rnôk uănh saơ ăp kon se jê̆ rgâl blău tĭng nar.

Suan ntrôl gay ăp kon se klaih rlău jêr jŏt lah rnôk trêng nti tay ăp nău  gĭt blău ma kon se hŏ kăr n’hanh ƀư tĭng. Ntĭt kơt, gâp lah oh sŏk dak an nai ngêt ri oh wât n’hanh hăn sŏk dĭl. Hôm geh ăp mon gĭt năl aơ lah dép bah he nơm, mô lah ncho ndeh gŭ bah kơi đŏng. Nău dŭt khlay lah kơl dơi mon hŭch bah ăp nău tih djơh klach rvê n’hanh nar lơn ma rgâl uĕh.

Nai ntĭm ân ât rdâng đah jâk r’ah n’hanh ân geh nău nsrôih âk lơn, yor trong ntĭm nti mha êng an kon se quet nte mpeh bôk rngok, nuih n’hâm, tĭk tôr măt lăng tôr tăng măt cheh n’hanh quet nte jâng ti. Ăp nai ntĭm bol ta rnoh năm deh êng êng, rnăk wâl jêr jŏt êng êng yơn rnôk sơch nău kan ntĭm nti mha êng, khân păng geh du ntŭk nsum lah nău tâm rŏng lĕ nuih n’hâm đah kon se, nănh n’groh an, mô rnam ăp jêr jŏt, ntul rlong n’hanh ntrŏng an he du nău mĭn krêp dêh đah nău kan jŏ jong.

Nai ntĭm Nguyễn Thị Bích Thủy, nuĭh ntơm njêng Ntŭk rgum ntĭm nti an gĭt, rnôk hôm jê̆ hăn nti păng saơ geh dŭt âk nuĭh mô lap kơt: ji đit prêng jêr jŏt tâm kơt nti; ƀlêp ƀlêr, rkhul nău ngơi…Đah nău mĭn rvê kơl kon se bah ơm gay dơi lăp nsum mpôl, păng hŏ njêng ntŭk rgum ntĭm nti dja:

Gâp saơ nău ŭch geh ta ƀon lan he mpeh kon se ji đit prêng, ƀlêp ƀlêr n’hanh mbrơi mbơh ngơi lah mô hŏ geh ndơ gay lăp kơl ơm, di trong kơt tâm nkual ƀon têh Hồ Chí Minh. Ndrel đah nê âk me bơ̆ kon se mô hŏ geh nău gĭt blău ntĭm nti n’hanh mbơh lư. Săk gâp nơm lah nai ntĭm, gâp mpŏng nsĭt nău gĭt blău n’hanh ăp nău gâp tă ntĭm nti, tă pah kan ta nkual ƀon têh Hồ Chí Minh sĭt ta aơ kơl an ăp mon său.

Rnôk bôk năp mhe njêng, Ntŭk rgum ntĭm nti dơn geh bar pe nuĭh me bơ̆ njŭn kon tât dơm. Lôch saơ geh nău tam ntĭm nti bah Ntŭk rgum ntĭm nti, âk rnăk geh kon mô blău ngơi, geh kon đit prêng gŭ ndôn êng... hŏ nsing nơm njŭn kon tât Ntŭk rgum ntĭm nti gay dơi mbơh nti lăp kơl an tâm di. Yuh Đào Thị Thanh Xuân, an gĭt, nơm geh ăp nai ntĭm mbơh nti n’hanh kơl ơm, aƀaơ kon yuh hŏ lăp rgum đah ăp kon se ngăn êng ƀa ƀă.   

Lôch rnôk lăp kơl nti, bah bán trú tât săk nơm mât êng ri oh aƀaơ hŏ hao nti jrô ngoăy hôm. Aƀaơ he saơ oh ngăch blău tâm ban kơt du hê kon se ngăn đŏng. Ntĭt kơt, rnôk bu mâp tay kon se mô mĭn lah păng tă geh nău ji lah he mô nkoch ri bu mĭn lah kon se ngăn dơm. Ăp nai ntĭm ntop kơl, mbơh nti, way rgŏ jă n’hanh ma nău rôih dăng bah he, mô plơ̆ rŭch bah ăp nai ntĭm nti, jêng aƀaơ oh hao ngăch dăng lam lĕ rngôch.

Tât aƀaơ Ntŭk rgum ntĭm nti mha êng Pandur dôl geh 43 oh n’hanh 2 ntŭk ntĭm nti. Geh ăp oh mhe 2 năm deh n’hanh geh oh rlău 5 năm deh, ăp oh geh mpơl du nău ji êng êng, jru thơl êng êng. Jêng, ntŭk rgum ntĭm nti ân tâm pă jêng âk jrô nti n’hanh dŏng ăp trong lăp kơl êng êng. N’hanh lôch 6 khay tât 1 năm, mô dơn nê 2 – 3 năm, nău ji bah ăp kon se mbra dơi rgâl uĕh.

Tât khâl n’hanh kơl nklâm ndơ an Ntŭk rgum ntĭm nti, wa Trương Mai Mạnh, Bí thư Đoàn cơ sở Mặt trận Tổ quốc Việt Nam n’gor Lâm Đồng dŭt uănh khlay ăp nuĭh ƀư pah kan ntĭm nti mha êng – ăp “Nuĭh ntĭm nti mha êng” mât chăm kon se ma nuih n’hâm n’hanh n’groh roh rŭ hôch:

Nău kan ƀư nai ntĭm mầm non lah du nău kan têh khlay hôm, yơn đah ăp nai ntĭm ta aơ khân păng ân nsrôih rlău âk tơ̆ rđĭl đah nai ntĭm mầm non. Yor ăp kon se đit prêng êng lah ăp kon se dah ma lơh ma lơi ndơ, ngơi lêng ngơi lang, ăp kon se mô dơi mât kân êng săk nơm ri ân geh nău nsrôih dŭt âk lah bah ăp nai ntĭm nti mât uănh ăp kon se.

Aƀaơ, trong ntop kơl tâm di an nai ntĭm kon se đĭt prêng êng hôm âk jêr jŏt, mpăng đêt. Trong kơl an ăp nai ntĭm nti kon se mha êng hôm mpêt đê̆. Yơn, ăp nai ntĭm nha hôm way đăp dêh, êt êl ăp nar mpoh ang njăr trong hăn, an nău tâm rŏng, an nău mpŏng geh đŏng.