Ta ƀon Hwiê, phường Ea Kao, trong kan sŏk nău tâm rgop mpeh nglăp nsum lĕ dơi ƀư tât tĭng rnăk ƀon lan. Tĭng rnoh mrô mât uănh, rnôk nglăp nsum, ƀon Hwiê mhe mbra geh 454 rnăk đah 1.914 nuĭh, rnoh neh rlău 496 ha. Nău nglăp nsum 2 ƀon dơi geh nău tâm ban ŭch âk yor tâm âk năm bah năp, dŭt âk kônh wa lĕ tĭng dŭt âk nuih n’hâm. Yuh H’Trang Buôn Yă, nuĭh ƀon H’wiê ơm an gĭt: “Ăp rơh geh tâm nsông, khĭt ôm khân pơng tâm nsong, jêng oh saơ 2 ƀon dăch đŏng, tâm di ndrel. Aƀaơ nglăp nsum oh ŭch đŏng, saơ nău nglăp nsym mbra dăch êp lơn, nar lơ uĕh lơn. Oh mpŏng nuĭh kruanh mbra êp ƀon lan, dăch ƀon lan, dơi wât nău way ơm bah ƀon lan gay ndơ̆ ƀon he nar lơ hun hao lơn”.

Nău tâm ban ŭch bah nuĭh ƀon lan ta ƀon Hwiê dơi saơ kloh tă bah săk rnglăy sŏk nău rgop geh 96% ƀon lan tâm ban ŭch trong nglăp nsum. Khlay lơn, nuĭh ƀon lan mô knŭng tâm ban ŭch đah nău dăp ntŭk kan ƀon lan gŭ, ma hôm mpŏng ƀon mhe bah geh tay nău dơi geh hun hao wăng sa, mât nău uĕh văn hóa n’hanh n’hao nău rêh. Nĕ lah trong nchrŏng ma gưl ủy ƀon Hwiê mĭn lah ntơm bah rnôk ndâk njêng trong ƀư nglăp nsum tâm di. Wa Y Vui Ayun, Bí thư chi bộ ƀon Hwiê nkoch: “2 ƀon jêh nglăp nsum mbra tâm ban ŭch hun hao pâl nđaih nsum mpôl n’hanh hun hao mpeh ăp nău uĕh rnoi mpôl đêt bah nuĭh Êđê kơt kho ao, ăp nău ƀư văn hóa nghệ thuật bah ƀon, trong nchrăp mpôl hên mbra hun hao cheh tanh bah ƀon. Mpôl hên ŭch dăn đă đah Đảng ủy pơk jrô ntĭm tŭr chĭng gay ăp oh bah kơi aơ nthoi tay u che”.

Bah nău nkoch ta ƀon Hwiê dơi saơ, gay du nău ntrŭnh têh hăn lăp tâm nău rêh, nău khlay mô knŭng lah tâm di ăp rnoh an ƀư mpeh têh âk rnoh nuĭh mô lah rnoh neh, ma hôm dơi mât nău boăt nthoi bah nsum mpôl n’hanh ăp nău khlay văn hóa lĕ dơi mât tă bah âk rơh. Đah nuih n’hâm nĕ, phường Ea Kao lĕ rdâk njêng trong ƀư dăp bah 25 jŭr hôm 18 ntŭk kan, nkre kơl lor mât nâm ơm ăp ƀon geh âk lịch sử n’hanh nău uĕh văn hóa bah ƀon lan Êđê. Wa Đặng Gia Duân, Bí thư Đảng ủy phường Ea Kao an gĭt:

“Geh dŭt âk rnoh an ƀư tĭng tâm nău dăp rep aơ, nkô̆ nău têh dơi kơp tât bôk năp. Đah ăp ntŭk geh nău way ơm bah jŏ kơt ăp ƀon nuĭh Êđê bah năp đaơ ri nsôih mât tay gay mât ndrăy n’hanh mât uĕh ăp nău khlay văn hóa way ơm. Nŭh ƀon lan geh nău rvê jêh nglăp nsum ri ăp samƀŭt hành chính m’hâm ƀư? Tât aơ tay Đảng ủy mbra ntĭm rđău cán bộ mbra jŭr tât ăp ƀon, tổ dân phố jêh nglăp nsum gay rgâl ăp samƀŭt khlay an nuĭh ƀon lan geh nău ŭch n’hanh nuĭh ƀon lan dơi tât Ntŭk kan hành chính nsum gay rgâl ăp samƀŭt jêh nglăp nsum, n’hanh dŭt khlay lĕ rngôch ăp samƀŭt aơ an dơm da dê”.

Trong ƀư bah phường Ea Kao lah rƀŏng gĭt nsum bah n’gor Dak Lak nglăp nsum mô knŭng lah nău mĭn mpeh âk rnoh nuĭh mô lah rnoh neh, ma hôm an mĭn tât ntŭk ntô văn hóa n’hanh boăt nthoi bah tĭng nsum mpôl.

Nău rƀŏng bah Dak Lak lah n’hŭch rnoh thôn ƀon, tổ dân phố bah 2.801 ntŭk kan jŭr hôm 1.556 ntŭk kan. Wa Vũ Lê Các, Groi Giám đốc N’gâng kan Nội vụ n’gor Dak Lak an gĭt, tâm rnôk ndâk njêng trong ƀư, Dak Lak uănh khlay nău geh êng bah tĭng ntŭk.

“Đah n’gor Dak Lak, ntŭk geh âk nuĭh rnoi mpôl đêt gŭ rêh, mpôl hên uănh tât nău mât ndrăy ăp nău khlay văn hóa way ơm n’hanh mât nău boăt nthoi nsum mpôl. Yor nê, đah ăp ntŭk geh nkô̆ nău khlay êng kơt nkual jru ngai, nkual n’har bri, ntŭk hăn nsong jêr jŏt mô lah ăp ƀon geh nău khlay văn hóa uĕh, ăp ntŭk uănh mĭn tay tŏng ăp nău dơi tĭng nău ntrŭnh lor rnôk ntrŭng trong ƀư dăp rep".

Dơi jêh dăp tay, du đêt săk ƀon mbra mô hôm ta samƀŭt hành chính. Yơn lah nău uĕh văn hóa dơi mât, nău rêh ƀon lan hôm e dơi mât n’hanh nuĭh ƀon lan hôm e saơ nău tơm bah nău rgâl, ri ăp rơh nglăp nsum mbra mô di lah roh lơi, ma ntơm an du ntŭk ntô hun hao mhe bah ăp ƀon lan ta nkual yôk prêh Dak Lak./.