Nău bôk năp bah Festival lah bôk nău ƀư nghệ thuật dơi rdâk nkra uĕh đah tât râng bah ăp nghệ sĩ tâm dak n’hanh ăp mpôl nghệ thuật dak bah dih; lễ hội Carnival, diễu hành ndeh nkao tâm rgop mbơh ƀư mô tô têh n’hanh ô tô yău jêng mông nar n’gŭr răm, geh êng; âk nău ƀư văn hóa, thể thao, pâl nđaih, ndơ ngêt sa dơi ƀư ta âk ntŭk, wăch rgum âk nuĭh ƀon lan n’hanh bu năch.

Ntoh ngơi ta ƀư n’glôch jêh, wa Nguyễn Long Biên, Groi Kruanh Rnâng kan UBND n’gor Khánh Hòa, Kruanh Mpôl rdâk ƀư Festival Dak lêng Khánh Hòa năm 2026 mĭn lah, nău ƀư lĕ djôt tât mông nar rgum bah văn hoá, nghệ thuật, thể thao n’hanh pâl nđaih; rnê rhơn nău uĕh bah văn hóa n’hanh kon nuĭh Khánh Hòa; rdâk hao nău rŏng n’hanh ntô̆ n’hao đah dak lêng, gôl dak ƀon tơm; rêng hvi nău mbơh hun hao kloh uĕh, hun hao nâp nâl n’hanh mpŏng ŭch hao lăp dak lêng têh: “Gâp nsing nơm ăp nău ƀư uĕh ta Festival Dak lêng Khánh Hòa năm 2026 mbra ndơ̆ tay băl bên tâm dak n’hanh dak bah dih tât êp lơn đah Khánh Hòa; gay ăp rơh plơ̆ tay lah du rơh saơ uĕh lơn bah nkual neh, kon nuĭh, văn hóa n’hanh mpŏng ŭch hun hao bah ƀon tơm dak lêng. Khánh Hòa pơk hvi mro wơt băl bên ăp ntŭk n’hanh mpŏng dơi mâp tay tâm ăp yan Festival Dak lêng bah năp-ntŭk dak lêng hôm e 0pŭt, nău rŏng kon nuĭh hôm e uĕh n’hanh mpŏng ŭch hao lăp dak lêng têh mbra dơi nchih đah ăp nău uĕh mhe”.

Bah ăp nău khlay dơi rdâk ƀư, Festival jêng ntung nthoi, pơk luh âk nău dơi kan ndrel mpeh ntuh kơl, tăch rgâl, văn hóa n’hanh pâl nđaih đah Khánh Hòa đah ăp ntŭk, nuĭh kan ndrel tâm dak n’hanh dak bah dih. Mpôl rdâk ƀư mpŏng du hê bu năch mbra jêng du hê nuĭh tơm mpla nsơ rup ndah nkual neh, kon nuĭh Khánh Hòa tât đah băl bên ăp ntŭk. Mât na nao lôch uĕh bah Festival Dak lêng, năm tât Khánh Hòa mbra rdâk ƀư âk lơn têh hvi lam ntŭr neh, tâm nĕ geh rơh tâm rlong n’glêh dŭt Hoa Hậu Lam ntŭr neh rơh tal 73 (Miss World) n’hanh Hoa hậu Hoàn vũ Miss Cosmo.

N’gor Khánh Hòa n’gluh an nău rƀŏng tay rgâl mhe nkô̆ nău, trong ƀư gay Festival Dak lêng jêng ndơ moh êng văn hóa dak lêng uănh tâm ban lam ntŭr neh, lah n’hâm soan ntrôl hun hao wăng sa, pâl nđaih, wăch rgum ntuh kơl n’hanh ƀư tĭng mpŏng ŭch hun hao ngăch, nâp nâl tâm rach năm mhe.