Mông nar pâl nđaih n’gŭr răm ta ăp ntŭk tât mpeh bah dâng n’gor Khánh Hòa, nkual neh Ninh Thuận bah năp đaơ. Ăp ndrĭch dak lêng Ninh Chữ, Vĩnh Hy, nkual rlu rlău dak lêng, ntŭk uănh nsong văn hóa, ƀon nău kan way ơm kơt Bàu Trúc, Mỹ Nghiệp âk năch pâl nđaih. Lah Nha Trang ntoh lư đah pâl nđaih dak lêng, rlu rlău, ri Phan Rang-Ninh Thuận ơm geh dơh đah ntŭk uĕh ơm, drăp ndơ văn hóa, ndơ lŏ mir kah. Nô Huỳnh Trọng Lượng, năch pâl nđaih hăn bah Nha Trang tât Phan Rang gĭt saơ:

“Văn hóa, ntŭk ơm yău ta Nha Trang lĕ hun hao đah pâl nđaih lơn. Tâm rnôk nĕ, Phan Rang hôm e âk nău ueh ơm, mât ndrăy geh ăp nău khlay văn hóa way ơm, lơn lah nău ueh văn hóa bah nuĭh Chăm. Ăp ndơ pâl nđaih ta aơ dŭt âk, bah kho ao, ndơ tâm an, bok n’gut tât ndơ ƀư i ty, kơl năch pâl nđaih geh tay âk nău săch gay ƀư ngăn n’hanh rwăt năp, dŭt lah ueh”.

Jêh du năm nglăp nsum, ntŭk ntô hun hao pâl nđaih Khánh Hòa dơi pơk hvi, ăp ntŭk tât mpeh bah dâng n’gor ntơm dơi boăt nthoi tâm trong ndơ nsum. Tâm 6 khay bôk năm 2026, Khánh Hòa wơt nklăp 12 rkeh năch, hao rlău 40% nkôp đah rơh aơ; geh prăk pâl nđaih nklăp 42.400 rmen prăk.

Nkual mpeh bah dâng n’gor geh tay âk nău dơh rnôk êp tach ndeh păr quốc tế Cam Ranh, ntung trong boăt nthoi dơh, ndrel ndơ pâl nđaih Khánh Hòa. Wa Alain Nguyễn, Kruanh mât uănh Nkual rlu rlău Hoàn Mỹ, phường Ninh Chữ, an gĭt, doanh nghiệp dơi geh rnôk nglăp nsum 2 n’gor:

“Jêh du năm nglăp nsum, mpôl hên lĕ dơi geh âk săk rnglăy uĕh. Nuĭh kan, tơm prăk hun hao dôl geh nău rgâl âk mpeh bah dâng Khánh Hòa. Lơn lah, rnoh năch pâl nđaih bah Nha Trang hăn mpeh nkual Bah dâng Khánh Hòa gŭ rlu lĕ hao âk, ntrôl soan mhe an hun hao pâl nđaih ta ntŭk”.

Bah jêh nglăp nsum đah Ninh Thuận, n’gor Khánh Hòa ntrôl dăng mpla nsơ, ntrŭt ngăch pâl nđaih, tâm nĕ ntŭk uĕh lah Festival Dak lêng Khánh Hòa 2026 đah bôk nău “Ntơr ueh Dak lêng têh-Hao prêh lam ntŭr neh”, ƀư bah 17/7-19/7.

Rlău ma Nha Trang, âk nău ƀư dơi ƀư ta mpeh bah dâng n’gor kơt Mpla nsơ n’hanh ƀư ngăn drăp ndơ văn hóa geh Bàu Trúc, tanh Mỹ Nghiệp ta xă Ninh Phước; tŭr uh mboăt rlet, chĭng gông rnoi mpôl đêt, dân vũ Chăm ta Tháp Po Klong Garai; bôk nău ƀư nghệ thuật trong ƀon têh, nghệ thuật ndeh nkao ta phường Đông Hải. Lơn lah ta xă nkual yôk Lâm Sơn ƀư Lễ hội play n’hanh pănh pháo nkao. Nău pơk hvi ntŭk Festival Dak lêng tât âk ntŭk rgop mât nău khlay văn hóa ta ntŭk, nta an ndơ pâl nđaih n’hanh joi nău rêh an nuĭh ƀon lan./.