Nău nchih 1: https://vov4.vov.vn/mnong/tuch-tam-nha-nong/du-rut-nau-nchih-nau-uch-hun-hao-bah-tay-nguyen-nhanh-ntul-rlong-tom-nuih-kan-nau-nchih-1-mo-tong-nuih-kan-bah-ntuk-rdak-mon-tat-mir-ba-ndap-le-ma-nhih-may-523062.vov4

Phung pah kan Đoàn Văn Tâm, nuĭh mhe sĭt TP.Hồ Chí Minh sĭt ƀon tơm gay pah kan ta Nkual công nghiệp Becamex Bình Định (n’gor Gia Lai) an gĭt mpŏng ŭch dơi plơ̆ sĭt ƀon tơm gay pah kan n’hanh đăp mpăn nău rêh jêh âk năm jong ntlơi ƀon tơm dơi joi ndâk njêng nău kan. “Bah năp đaơ, gâp lăp phường Bình Tân, Sài Gòn (TP.Hồ Chí Minh) ƀư geh bơi 10 năm. Prăk khay, prăk khôm tâm nĕ du khay geh 13 rkeh, yơn aƀaơ sĭt ta aơ gŭ n’hanh pah kan an êp jay. Prăk khay bôk năp n’hanh geh prăk ntop mông kan rgop bảo hiểm hôm r hôm e geh 8 rkeh prăk du khay. Prăk khay đê̆ yơn gâp dŏng đê̆ ri hôm e uĕh lơn kan tâm Sài Gòn”.

Jêh nglăp nsum, ăp n’gor ta Tây Nguyên geh tay nău rmeh hun hao, wăch rgum âk nău nchrăp ƀư mpeh nkual công nghiệp, pâl nđaih, ndrâm dak lêng n’hanh nkual têh đah dĭng lĕ prăk ntuh kơl rlău 470.000 rmen prăk, lvang 2026-2030. Êng n’gor Dak Lak geh nklăp 170.000 rmen prăk. Wa Huỳnh Lữ Tân, Ủy viên Ban Thường vụ N’gor ủy Dak Lak, Kruanh Ban Mât uănh nkual wăng sa Phú Yên an gĭt, ăp nău nchrăp ƀư mhe ŭch tât 60.000 nuĭh. Aơ lah dơi geh kan-geh prăk an nuĭh ƀon lan, yơn lah ntŭl rlong mpeh rnoh nuĭh n’hanh uĕh blău nuĭh kan:“Đah âk dĭng lĕ rnoh prăk ntuh kơl dŭt âk bah ntung trong ăp nkual công nghiệp, nău nchrăp ƀư pâl nđaih n’hanh ăp nău nchrăp ƀư âk gưl tâm nkual công nghiệp tâm ăp nkual wăng sa, gâp mĭn mbra wăch rgum âk nuĭh pah kan tât kan. Êng Rkum rmôt Hòa Phát n’hanh ăp naư nchrăp ƀư êng bah aƀaơ tât năm 2030 dơi mkra nklăp 40.000 nuĭh an nkual mpeh bah lơ luh nar n’gor Dak Lak”.

Wa Nguyễn Quang Thuân, Groi Giám đốc N’gâng kan Nội vụ n’gor Dak Lak năl lah, kơt ăp n’gor Tây Nguyên geh êng wăng sa lŏ mir tĭng tâm yan, têh công nghiệp-ndâk ƀư hôm e đêt; dơi nti, hao gưl, n’hanh ăp nău dơh rêh jêng hôm e đêt, Dak Lak mâp jêr tâm wăch rgum n’hanh mât jâng nuĭh pah kan. Wa Nguyễn Quang Thuân djôt dơn, lah mô geh nău kơl an tâm di, tơm nuĭh kan mbra kol tay hun hao bah n’gor. “Aƀaơ, ăp doanh nghiệp gŭ ta n’gor Dak Lak trok an nuĭh pah kan dŭt đêt nkôp đah ăp nkual êng. Yor he lah nkual 3, nkual 4. Đê̆ đŏng âk nuĭh pah kan hăn nti nău kan ta TP. Hồ CHí Minh mô lah Đồng Nai khân pơng dơi trok bah 8,5 rkeh prăk/khay mô lah âk lơn, yơn sĭt Dak Lak khân pơng dơi trok geh 6 rkeh prăk/khay dơm. Jêh nĕ, ntŭk ntô pah kan mô dơi tâm ban đah doanh nghiệp têh, ri aơ trong ƀư n’hŭch đŏng, jêng ăp doanh nghiệp ta Dak Lak an rgâl mhe gay wăch rgum, kân jâng nuĭh pah kan”.

Pah kan đah nău kan Nội vụ mpeh tơm nuĭh kan an lvang hun hao mhe, Tổng Bí thư, Kruanh dak Tô Lâm ntĭm kloh: Nău đăp mpăn uĕh nâp nuĭh kan hăn ndrel đah nău n’hao uĕh rêh an nuĭh pah kan; Hun hao nuĭh kan mô knŭng nău kan pah kan ma hôm hăn ndrel đah nău kơl rnoi mpôl đêt, hun hao nkon nuĭh n’hanh nâp nâl nău nsing nơm bah nuĭh ƀon lan.

Bôl mô nkoch nău êng bah ăp n’gor Tây Nguyên yơn trong rƀŏng ntĭm rđău bah Tổng Bí thư, Kruanh dak ta nar pah kan aơ, lĕ tâm di bah Tây Nguyên tâm nău kơl hun hao nuĭh kan, nĕ lah “an hăn ndrel joi nău rêh ngăn bah tĭng nkual, tĭng rnoi nuĭh, tĭng nsum mpôl”, “hăn ndrel đah mât ndrăy nău uĕh văn hóa, mât njrăng ntŭk ntô, mât bri, mât neh, mât dak, mât n’har bri”. Tổng Bí thư, Kruanh dak Tô Lâm nchrŏng ntĭm dŭt na nê̆ mpeh nău ƀư tơm bah neh dak n’hanh ăp nău kan an ƀư. “Ngih dak ntop kơl ntŭk ntô an manh prăk, nău mbơh, ntĭm nti mbơh ntĭm phap luật, doanh nghiệp, hợp tác xã, ntŭk nkra njêng, tâm rgop ton ntĭm kỹ thuât, ndâk njêng moh êng, tâm di uĕh nâp, ƀon lan ƀư boăt nthoi pah kan đăp mpăn, n’hŭch ƀon lan trơn gŭ êng, pah kan mô rĭng, geh nău rlăm. Hun hao nău kan ta nkual rnoi mpôl đêt hăn ndrel mât ndrăy nău ueh hun hao văn hóa, mât njrăng ntŭk ntô, mât bri, mât neh, mât tu dak, mât n’har bri nău rƀŏng mô knŭng geh tay nău kan ma hôm pah kan tâm di đah nău geh ơm, văn hóa, nău way ơm, nkra njêng, kơl ƀon lan đăp mpăn nău rêh, n’hŭch ach o nâp nâl, nsing nơm rgum lăp, rgop an hun hao nsum bah neh dak.

N’hêl na nê̆ bah mir tât ăp ntŭk ndâk nkra, ăp nău nchrăp ƀư têh ta ăp n’gor Tây Nguyên, tât ăp ntĭm rđău, nchrŏng trong bah kruanh Đảng n’hanh Ngih dak an saơ, ntĭm nti nuĭh kan nkre lah tâm di nău ŭch bah năp, nkre gay nchrăp an dơi tâm rlong jŏ jong. Nuĭh pah kan tŏng mpeh rnoh nuĭh, nâp mpeh ueh blău mra nuih n’hâm khlay gay ăp nău nchrăp ƀư săk rnglăy, ngăn ngên nău rƀŏng hao jêng 2 rnoh mrô, nkre n’hâm soan an ndâk njêng du Tây Nguyên kloh uĕh, ndrŏng têh, du nkual mât nâp bah neh dak.

N’hanh ŭch geh nău nĕ, ăp n’gor ta Tây Nguyên mô knŭng an ƀư tĭng ăp nău kơl ntung trong, an manh prăk, nău mbơh, ntĭm nti kơt Tổng Bí thư, Kruanh dak lĕ ntĭm, ma hôm an nsrôih mkra ăp nău mô rĭng tâm hao jêng kơt aƀaơ hin; đăp mpăn nău kan-nău geh n’hanh nău rêh đăp mpăn an nuĭh pah kan.