Đại tá Đinh Văn Hưng, n’gor ủy viên, Chính ủy Bộ Chỉ huy Quân sự n’gor  Đắk Lắk lah na nê̆, Nău dơi Buôn Ma Thuột lah nău ntoh ang ngăn bâh nău mĭn tâm lơh geh âk nău dơi, nău mĭn kan rdâng đah nău dơi kan bâh tahen n’hanh ƀon lan he. Nkre lah đă cán bộ, tahen mpôl kan tahen n’gor an geh n’hao tay nău way ơm, n’hao nău ueh dơi blău ntĭm nti, mbra geh dơi tâm rdâng, rdâk njêng mpôl kan nâp nâl, an tâm di đah nău ŭch kan tơm khlăy ta rơh mhe.

Ta môch tâp tahen khĭt tâm lơh ta n’gor Đăk Lăk, ntŭk bĭch rlu bâh rlău 2.300 tahen khĭt, tâm nău ryơk mbah, ăp đồng chí leo kan n’gor n’hanh đại biêủ lĕ geh an kao si, mpoh su nhang ta năp rup ndah kahgit, du ƀlât nău kahgit n’hanh lah ueh têh đah ăp nô tahen khĭt yor nău kan rklaih đăp mpăn mpôl rnoi, dơn ngoăy neh dak. Lôch nĕ, mpôl đại biêủ lĕ an kao si du nhang kahgĭt tahen cách mạng lĕ khĭt ta Di tích Ngih dak ngih krŭng Buôn Ma Thuột- ntŭk lĕ tă mât krung âk nuĭh kan chính trị ta nău kan cách mạng bâh ăp bôk năm thế kỷ 20 n’hanh lah ntŭk njêng Chi bộ Đảng bôk năp bâh n’gor Đăk Lăk (ơm).