Ndrel ma lam dak, n’gâng kan ntĭm nti ăp n’gor Dak Lak, Kon Tum dôl ƀư jêh ăp nhoat nchrăp ân rơh thi Tốt nghiệp Trung học phổ thông năm 2025 geh ƀư đăp mpăn, rjăp ndrel tâm di nau ntrŭnh. Dak Lak ndâk du rmôt Hội đồng thi, đah 53 ntŭk thi ndrel 948 jrâu thi geh pă ƀư tâm ăp ngih săm ƀŭt THPT ndrel Ntŭk ntĭm nti ƀa ƀơ tâm n’gor. Rnoh kon se hăn đăng kí râng lah rlau 22.600 nŭih, tâm nê geh rlau 530 kon se tă bah năm e.

Tât rnôk aơ, nau kan mêt uănh ndrel nchrăp ntŭk nti tâm ăp ntŭk thi geh ƀư jêh lôch. Nau răk kloh ntŭk ntu, đăp mpăn ndơ sa, dak si ndrel nau mât đăp mpăn rnă njrăng, pă trong hăn kŏ geh ăp n’gâng kan tâm rgop ƀư ân rjăp. N’gâng kan ntĭm nti Dak Lak hŏ ƀư ăp jrâu ntĭm nti nau ƀư kan ân rlau 2.200 cán bộ, nai ntĭm, nŭih pah kan geh rgum râng kơl ƀư ân rơh thi rnôk aơ.

Rơh thi tốt nghiệp THPT năm aơ ta n’gor Kon Tum geh rlău 5.300 nuĭh đăng ký râng, tâm nê geh bơi 1.800 lah kon se rnoi mpôl đê̆. Gay đăp mpăn săk blău rơh thi tâm ban kơt n’hao âk rnoh nuĭh đỗ tốt nghiệp, ăp nhih nti mpeh nkual jru, nkual ngai n’hanh ăp  nhih nti nội trú tâm n’gor dôl lăp tâm rơh ndăn ngăch gay nkah tay nău tă gĭt nti n’hanh tiăr nti nău blău ƀư bài an kon se nti.

Rơh thi năm aơ lah lor bôk năp Bộ Giáo dục rgâl tâm n’guăk đề thi, ăp nai lĕ nuih n’hâm ntĭm nti trong bên ƀư bài thi mhe ntơm bah ăp bài kiểm tra ăp nar tât ăp rơh rlong thi. Ăp nhih nti dân tộc nội trú êng uănh khlay tât nău rêh drăp ndơ n’hanh nuih n’hâm bah kon se nti đŏng, nta trong dơh an ăp kon se ôn thi.