Lơ 17/3, Ủy ban Săch n’gor Dak Lak ƀư rƀŭn nchră mbơh jêh săch đại biểu Quốc hội khóa 16 n’hanh mbơh săk ăp nuĭh dơi săch đại biểu Hội đồng nhân dân n’gor năm kan 2026-2031. Tĭng nău mbơh, rơh săch ƀư ƀon lan ƀư tơm, di pháp luật, đăp mpăn n’hanh ngăn ngên lah nar rgum bah lam ƀon lan. Lam n’gor geh 2.120 nkual nklăch phiếu đah 2.118 rmôt săch; tâm nĕ geh 11 nkual ƀư săch ơm bah lơ 14/3.

Rnoh nuĭh ƀon lan ta Dak Lak hăn săch geh 99,96%. Jêh kơp bôk năp, n’gor Dak Lak lĕ săch tŏng 15 đại biểu Quốc hội khóa 16 tĭng rnoh dơi pă. Đah HĐND n’gor năm kan 2026-2031, geh 84 đại biểu dơi săch, tŏng ăp di trong dăp, nuĭh tĭng nău ntrŭnh. Ta gưl xă, lam n’gor geh 2.443 nuĭh dơi săch đại biểu HĐND (mô tŏng du hê nkôp đah dăp an).

Ta rƀŭn nchră, Ủy ban Săch n’gor Dak Lak mbơh đŏng săk ăp nuĭh dơi săch đại biểu HĐND n’gor năm kan 2026-2031 tĭng ntŭk kan săch. Nău mbơh jêh dơi ƀư kloh rah wah tĭng di nău ntrŭnh bah pháp luật mpeh săch. Jêh rnôk mbơh jêh săch, Ủy ban săch n’gor Dak Lak mbra jêh ăp samƀŭt rhăch nău, samƀŭt nchih gay njuăl ăp ngih pah kan Trung ương tĭng di nău ntrŭnh.