Đah bôk nău “Dak Lak-Nău geh, mpŏng kâp hun hao”, Rƀŭn nchră mbơh dăp rgum n’hanh ntrŭt ngăch ntuh kơl năm 2026 wăch rgum nklăp 1.000 đại biểu lah kruanh cán bộ, nău kan trung ương, rmôt kan dak bah dih, hiệp hội doanh nghiệp, tập đoàn wăng sa n’hanh nuĭh ntuh kơl tâm, dak bah dih.

Nău ueh khlay ngăn bah rgum nchră lah mbơh nău ntrŭnh uănh an Nkra rgâl Dăp rgum n’gor Dak Lak  năm 2021-2030, uănh tât năm 2050. Samƀŭt dăp rgum mhe dơi mpŏng mbra pơk luh ntŭk ntô hun hao têh hvi lơn, neh ntu ăp nkual khlay, trong wăng sa n’hanh ăp ntŭk hao jêng mhe, jêng ntŭk gay ƀon lan wăch rgum ăp nuĭh ntuh kơl tâm lvang tât.

Bah meng nău ƀư khlay, Rƀŭn nchră hôm geh ăp nău ƀư kơt: ntơm rdâk ƀư, sa nkra du đêt ndơ ƀư, nău nchrăp ƀư ntoh lư; Rƀŭn nchră tâm nchră đah doanh nghiệp, hợp tác xã n’hanh rnăk wâl tăch rgâl; Rƀŭn nchră wăng sa ƀư êng Việt Nam-Rơh tâm nchră ta ntŭk ta n’gor Dak Lak; Rgu nchră mpeh hun hao lŏ mir nkret njêng jru n’hanh logistics ăp nkual; Rgum nchră mpeh hun hao lŏ mir công nghệ mhe: nău dơi n’hanh trong kan têh an doanh nghiệp”; Rgum nchră mpeh “Rgâl mrô n’hanh hun hao trong sinh thái doanh nghiệp nâp nâl; Rgum tăch ndơ công nghiệp thôn ƀon ntoh lư, OCOP bah n’gor n’hanh ăp n’gor kiău ma.

Ta nău ƀư, n’gor Dak Lak an ntrŭnh ŭch dơn nău ntrŭnh ntuh kơl, samƀŭt kơp dơn dăn ntuh kơl n’hanh ký ton ăp samƀŭt nkah gĭt kan ndrel an âk nău nchrăp ƀư mpeh tâm âk ntil nău. Wa Trần Công Sơn, Groi Giám đốc N’gâng kan prăk kaih n’gor Dak Lak an gĭt, ndrel đah nău wăch rgum ntuh kơl du trong ngăn ngên, n’gor dôl mbơh ƀư trong “tâm pă kloh ueh” gay rhoăt đêt mông nar mkra samƀŭt rhăch nău an doanh nghiệp.

N’gâng kan Prăk kaih lĕ tâm ôp tâm nchră Ủy ban nhân dân n’gor ndâk njêng trong tâm pă kloh uĕh tĭng trong koh n’hŭch 50% samƀŭt hành chính, đah gưl ntrŭnh an ntuh kơl bah năp đaơ lah 17 nar aƀaơ hôm nklăp 8 nar n’gul. Aƀaơ trong ƀư “tâp pă kloh ueh” lĕ dơi n’gor mbơh, êp tât tĭng nkô̆ nău rgum lĕ ăp n’gâng kan nău kan geh tât tâm ôp tâm nchră Ủy ban n’gor jao an samƀŭt hành chính tĭng trong rhoăt ăp samƀŭt geh tât nău nchrăp ƀư ntuh kơl gay đăp mpăn an ăp nău nchrăp ƀư ơm hăn lăp dŏng n’hanh mât uĕh săk rnglăy ntuh kơl.

Mô knŭng rgum dôh rklaih ăp ntŭk kol mpeh samƀŭt, n’gor Dak Lak dôl nchrăp rĭng ăp ndơ mpeh ngih wâl, nuĭh kan n’hanh rgâl mrô gay wơt ăp nău nchrăp ƀư mhe. Tĭng Mpôl rdâk ƀư, đah âk nău nchrăp ƀư dơi jao an nău ntrŭnh ntuh kơl n’hanh ký ton kan ndrel, aơ dơi uănh lah ngoăy tâm âk nău ƀư ntrŭt ntrôl ntuh kơl geh têh hvi ngăn bah sa ơm tât aƀaơ bah n’gor.

Tâm rnôk ntŭk ntô hun hao mhe dôl pơk luh âk nău dơi tâm rgop nkual đah Tây Nguyên n’hanh duyên hải Nam Trung Bộ, rƀŭn nchră rơh aơ dơi mpŏng kâp mô knŭng wăch rgum tay prăk an hun hao wăng sa-rêh jêng ma hôm nta an rgâl tâm nău mĭn wăch rgum ntuh kơl, bah hăn tĭng rnoh geh an rgâl săch ăp nău nchrăp ƀư geh uĕh nâp, dơi ntrôl hao jêng jŏ jong an n’gor. Wa Trương Công Thái, Groi Kruanh UBND n’gor Dak Lak, mĭn lah:

Rƀŭn nchră mbơh dăp rgum n’gor n’hanh ntrŭt ngăch ntuh kơl năm 2026 bah n’gor Dak Lak, đah ntil ndơ nău nchrăp ƀư n’hanh dĭng lĕ rnoh ntuh kơl ma ăp doanh nghiệp lĕ dăn ri dơi lah aơ ngoăy tâm âk rơh wăch rgum kuăl jă ntuh kơl têh ngăn bah sa ơm tât aƀaơ jêh nglăp nsum 2 n’gor Dak Lak n’hanh Phú Yên. Đah tơm prăk kơt nĕ mpeh n’gor rgum mbơh ƀư nkra rgâl hành chính, rgâl mrô; tal 2 lah ntĭm nti nuĭh kan n’hanh rmôt pah kan geh gĭt blău gay rhŏ an nău nchrăp ƀư tâm khay tât; tal 3 đah nău mkra samƀŭt ntơm tă bôk năp rnôk ăp nuĭh ntuh kơl lăp pah kan ri mpôl hên mbra boăt nthoi dâl n’hanh mkra ăp jêr jŏt./.