Sở Giáo dục n’hanh Đào tạo n’gor Dak  Lak mhe ƀư mpư rnê kon se nti, nai ntĭm geh nău dơi ngăch prăl tâm ăp rơh thi gưl neh dak n’hanh nkual năm nti 2024-2025. Ta rơh thi kon se nti blău gưl neh dak, n’gor Dak Lak geh 72 giải, tâm nê, geh 2 giải Nhất. Aơ lah nău dơi geh dŭt âk bah ntơm tât aƀaơ, dâk tâl 16 lam dak, mât nâp dâk bôk năp tâm ăp n’gor mpeh nkual Duyên hải Nam Trung Bộ n’hanh Tây Nguyên.

Lơn lah, geh 4 kon se nti dơi sơch lăp thi sơch rmôt gưl neh dak râng thi Olympic nkual n’hanh dak bah dih năm 2025; 1 hê dơi mpư rnê ntơh măt Việt Nam râng Olympic Tin học châu Á - Thái Bình Dương. Ta lễ mpư rnê, kruanh  rđău kan n’gor Dak Lak nchih nkah n’hanh rnê âk ăp nău nsrôih bah ăp nai ntĭm n’hanh ăp kon se nti tâm năm rlău  aơ, dăn đă n’gâng kan ntĭm nti n’gor ntik n’hao uĕh tay nău dơi, rgum n’hao săk blău ntĭm nti lam lĕ rngôch n’hanh tâm ăp rơh thi kon se nti blău ăp gưl.