Rmôt hăn kan bah bôk nau kan hun hao Liên hợp quốc (UNDP) ndrel Rnâng kan mât Trung ương bah ăp bôk nau kan trong hoch dak (CPO) geh nar pah kan đah UBND n’gor Dak Lak gay doh rklaih ăp nau nkol tâm bôk nau ntrŭnh ƀư ăp nau kan dơi rdâng ma rgâl mhe trôk nar. Tâm nar pah kan rgum tâm Bôk nau kan “N’hao nau dơi rdâng bah tuch tăm ƀư kan jê̆ đah nau mât đăp mpăn tơm dak yor nau tât rgâl mhe trôk nar nkuăl Tây Nguyên ndrel Nam Trung Bộ (SACCR) ndrel Bôk nau kan “N’hao nkra, ndâk trong pă hoch dak kơl an tŏ ân tơm tăm” tâm Bôk nau kan “N’hao nau săk tam nau dŏng dak ân ăp n’gor geh rdâng ma nau khuch yor prăng bri” (WEIDP) dŏng dơi prăk Hun hao Châu Á (ADB).

Jêh 5 năm ntrŭnh ƀư tâm Dak Lak, Bôk nau kan SACCR hŏ rgop nau n’hao nau dăng dơi nau rgâl bah rgâl mhe trôk nar, rgâl nau rêh jêng ndrel kơl an hun hao tuch tăm n’huch nau hôl khih ân nŭih ƀon lan tâm ntŭk. Yơn lah, âk nau kan khlay bah bôk nau kan, ngăn lah nau dơi ndâk ăp ntŭk pom dak tŏ mhe geh pă rlau 41 rmen prăk dŏng kan, ê tâm ban 4% rnoh prăk ODA. Tâm nar pah kan, ntoh măt UNDP ta Việt Nam rnê prêh ăp nau nsôih bah n’gor Dak Lak tâm nau ntrŭnh nau kan, nkre lah rjăp aơ lah nau kan geh nau khlay ngăn đah nau đăp mpăn dak tŏ ndrel nau rêh bah nŭih ƀon lan. Ntoh măt UNDP đă Dak Lak ndal ƀư jêh nau kan rgâl bôk nau kan, ơm ntrŭnh ăp nau kan geh tât nau rgâl rnoh ndrel nchrăp tay năm kan ân ƀư nau kan tât lôch năm 2027./.