Nău mbơh geh n’gâng kan tuch tăm n’hanh ntŭk gŭ rêh ndơ̆ mbơh ta rơh rƀŭn nchră : “dơn mbơh nău mhe ăp nău ntrŭnh mpeh mât đăp mpăn ndơ sông sa n’hanh uănh njrăng ndơ mpô mpa mât rong, tơm tăm tâm Hiệp định kan ndrel nău wăng sa lĕ rngôch nkual RCEP n’hanh Nghị định mbrô 280 bâh Trung Quốc, lơ 14/5. Rơh rƀŭn nchră ƀư ta Đăk Lăk n’hanh Trực tuyến tât 34 ntŭk tâm ƀoh ta trung ương ndrel đah ăp n’gor, nkuăl ƀon têh ta lam dak. Tĭng nău mbơh tơih, tâm ba năp nơh, ăp doanh nghiệp lĕ leo kan tâm di đah nău rgâl ta ntŭk rêh jêng, ƀư lôch ueh ăp ntŭk kan. Ăp n’gâng kan nkra ƀư dôl nsrôih ƀư tâm di nău ntrŭnh mpeh rnoh mbrô nkual tăm, mât njrăng nuh srê mât rong n’hanh gĭt năl na nê̆ tu tơm gay ma an tâm di đah ăp nău ntrŭnh mhe bâh ntŭk tăch rgâl rvăt bâh dak bah dih, ngăn lah ăp nău ntrŭnh bâh ăp nău tâm ton tăch rgâl. Yơn lah, ndơ tuch tăm Việt Nam dôl tâm rdâng đah ăp nău kĩ thuật ăp nar lơ ma jêr mpeh mât đăp mpăn ndơ sông sa n’hanh njrăng nuh srê. Ngăn lah, mpeh đah Trung Quốc dôl geh n’hao nău mât uănh na nê̆ ndơ sông sa rvăt nglăp, rgum na nê̆ ta rnoh mbrô nkual tăm, ntŭk tâl dŭng, mât njrăng rnoh rmeh ndơ dak si puh an tơm tăm, ntô lir n’hanh gĭt na nê̆ ntŭk tăm. Rơh rƀŭn nchră aơ pă ăp nău mbơh, nău ntrŭnh mhe mpeh mât đăp mpăn ndơ sông sa n’hanh mât njrăng nuh srê ndơ rong, bu tuh ta rơm tăm (SPS) tâm nău tâm ton wăng sa lĕ rngôch ta nkual, Nghị định mbrô 280 n’hanh du đê̆ nău mbơh bâh Tổng cục hải quan Trung Quốc mpeh nău mât uănh mbơh dăn tăch rgâl pah kan ndơ ngêt sông dak bah dih rvăt nglăp ta ntŭk tăch rgâl Trung Quốc gay ma  ntŭk kan mât uănh, doanh nghiệp, htx, ƀon lan kan lŏ mir gĭt n’hanh ƀư tĭng, mât đăp mpăn ăp nău geh ngluh mbơh.