Ăp nar aơ, ta ăp ndrĭch lŏ dŭt yan ta ƀon A Lao, xă Mang Yang, n’gor Gia Lai, rnăk wa Ngưm ndrel âk rnăk, dôl ndăn rek ba yan Pu-wai gay ngăch jao neh rhŏ an ndâk ƀư nău nchrăp gưl 3 ta trong têh Quy Nhơn-Pleiku. Bôl du gâl neh tuch tăm geh sŏk lơi, nuĭh ƀon lan tâm ƀon hôm e tâm ban ŭch, kơl nău ntrŭnh yor nău geh hun hao jŏ jong. Wa Ngưm nkoch, ƀon A Lao geh 51 rnăk tâm rnăk geh sŏk neh n’hanh lĕ rngôch ăp rnăk lĕ sŏk prăk trok, nchrăp rơih jăng ndơ ƀư, sreh lơi tuh mbo gay jao an neh nău nchrăp ƀư:

Kônh wa mpôl hên dŭt lah uĕh Ngih dak ntrŭnh ndâk ƀư ndơ aơ. Lĕ rngôch kônh wa tâm ƀon kơl da dê an nău nchrăp ƀư aơ. Kơt gưl neh bah rnăk gâp geh tâm dăp rgum ndơ ƀư lah 2 sào ba đah 1 sào cà phê; mpôl hên lĕ sreh jăng tơm tăm n’hanh nchrăp jao an đah ndâk ƀư ntung trong.

Đah trong way ƀư, jao an neh ntŭk tât ri ƀư tât nĕ, ta Nău nchrăp ƀư gưl 1 n’hanh 3, ntŭk dơi sŏk neh rlău 70%, ăp ntŭk kan ƀư rgŏ jă hang rhiăng măy mŏk, ndoh ndơ ndrel hang rbăn nuĭh pah kan 3 ca 4 kíp gay mbơh ƀư ăp ntil ndơ jâng trong rƀông hoch dak n’hanh ndâk ƀư ndơ bah dâng bâh ăp ntung, trong mŭr.

Tâm nĕ, ăp ntung khlay kơt An Nhơn, ntung rlău dak me Sông Kôn, ntung Hà Nghe n’hanh ntung rlău trong têh Bắc-Nam dơi ƀư dŭt n’hâm ngăch lor rnôk yan mih tât. Wa Đoàn Minh Hoàng-Mbơh ntĭm groi nđôi Công ty Cổ phần Tư Vấn VNC, ntŭk kan groi nđôi ndâk ƀư ntung An Nhơn 4 an gĭt:

Ntung An Nhơn 4, aƀaơ ta koar geh 12/24 n’gâng, ngăch geh 50% ndâk ƀư ăp n’gâng ntăm. Aƀaơ, nuĭh tơm ntuh kơl lĕ jao an măt neh gưl ntung. 2 pĭt ntung lĕ dơi êp tât. Aƀaơ ta bôk ntung, mpôl hên kâp lŭ choih gay ƀư ntŭk êp tât ntung.

Nău nchrăp ƀư trong têh hăn ngăch Quy Nhơn-Pleiku geh jong nklăp 125 km, dĭng lĕ prăk ntung kơl rlău 43.700 rmen prăk, hăn rlău 16 xă, phường bah n’gor Gia Lai, khuch rlău 4.000 rnăk đah dĭng lĕ rnoh neh sŏk rlău 1.097 ha. Tât lơ 4/5/2026, rnoh jao an măt neh ta Nău nchrăp ƀư gưl 1 (22km) geh 70,5%; Nău nchrăp ƀư gưl 3 (25km) geh 72%. Êng nău nchrăp ƀư gưl 3 (68km) dôl jêh ăp samƀŭt gay nchrăp ntơm ƀư tâm khay 5/2026. Tâm ban đah trong kan sŏk neh, 10/12 nkual ntŭk gŭ mhe njok trong lĕ dơi ƀư ndâk nkra rĭng, nchrăp jao neh an nuĭh ƀon lan ƀư jay tâm khay 6/2026.

Wa Phạm Xuân Tỉnh, Groi Giám đốc Ban ƀĭt joet Nău nchrăp ƀư gưl 1 (ta Ban Mât uănh ăp nău nchrăp ƀư ntung trong n’hanh ƀon lan dŏng n’gor Gia Lai) an gĭt, nău tâm ban nkre sŏk neh, nkre mbơh rdâk ƀư lah trong ngăch ngăn gay đăp mpăn ndơ ƀư jêh di nar ma n’gor đă:

Tât rnôk aơ, trong kan sŏk neh ntơm tâm di geh nău ŭch mbơh ƀư ndâk nkra bah nuĭh ndranh. Mpôl hên ndrel nuĭh ndranh ndâk ƀư tâm rgop đah ăp ngih pah kan geh tât gay kơp uănh trong kan nchrăp ndoh ndơ, lŭ choih tâm di ăp nău đă kỹ thuật bah nău nchrăp ƀư, gay mbơh ƀư uănh nđôi dơi uĕh nâp n’hanh ngăch.

Trong têh Quy Nhơn-Pleiku geh nkô̆ nău khlay đah n’gor Gia Lai yor mbra njok boăt nthoi khlay đah duyên hải Nam Trung Bộ đah bri krŏng yôk prêh bah n’gor, rgop dôl boăt nthoi nkual, n’hŭch prăk rdêng n’hanh pơk hvi ntŭk ntô hun hao. Yor rĭ, ăp ntŭk n’hanh ntŭk kan ndâk ƀư dôl ntrôl ngăch gay đăp mpăn nău nchrăp ƀư tât ngăch di trong nchrăp.