Tĭng nau mbơh năl tâm rnôk rƀŭn nchră bah Rnâng kan n’gor uỷ Dak Lak, tâm 5 khay rlau aơ, nau kan văng sa, rêh jêng bah n’gor lŏ mât nau đăp mpăn ndrel geh nhoat hun hao ueh. Dĭng lĕ ăp nau kan kŏ geh kơp dơn rnoh hun hao geh âk rđil đah rơh aơ năm e. Rnoh mrô ƀư nau kan ê nkra công nghiệp nchrăp hao rlau 20%l rnoh geh tăch rai bah ndoh ndơ ndrel nau kan êng geh rlau 10 rbăn rmen; nau geh soay geh rlau 4.900 rmen. Nau kan ndoh ndơ tăch dak ba dih, ntuh kơl, nau ơm-pâl n’aih ndrel nau kơl an rêh jêng kŏ geh âk nau dơi. Nau kơl an ndâk, nkra ngih truh sat geh ntrŭnh ƀư ndal, geh rlau 54% nau nchrăp.

Êp ăp nau tă geh dơi, rơh rƀŭn kŏ mbơh kloh du đê̆ nau hôm kol, kơt: N’hao nau văng sa ê geh rgâl ngăch, âk nau ntuh kơl nsum hôm mbrơi ƀư; du đê̆ ntŭk nsrŭng nau kan hôm prêh. Tâm rơh rƀŭn, wa Nguyễn Đình Trung, Bí thư n’gor uỷ Dak Lak đă ăp nkuăl, ntŭk kan tâm n’gor nchrăp, nsôih lơn tay ăp nau kan nchrăp luh; ƀư nâp ntrong kan hôm mbrơi tâm ntrong kan rnôk geh tâm rnglăp tâm du đê̆ ntŭk, mô ân geh nau khuch tât nau ngăch kan nsum bah n’gor./.