Lơ 18/3, Rnâng kan n’gor uỷ Dak Lak tâm nchră nau kan đah ăp đảng uỷ tâm dâng, nkah mbơh nau tă geh dơi bah pe khay bôk năm ndrel ntrŭnh nau kan tâm 6 khay năm 2026, đah ăp nau ŭch ntrơn ngăch jêng nau kan ndal, nsôih ân geh dơi nkô̆ nau hun hao bar rnoh mrô. 3 khay bôk năm 2026, ăp gưl kan uỷ tâm Dak Lak hŏ ntrŭnh âk nau kan hun hao văng sa, rêh jêng, đăp mpăn neh dak, rnă njrăng, ndâk njêng ntrong kan chính trị. N’gor uỷ hŏ ntrŭnh bôk nau ƀư ăp nau kan, ăp nau ntrŭnh bah Trung ương ndrel nkô̆ nau hun hao lvang năm 2026-2030, ƀư nau dơi gay ăp ntŭk kan ƀư ân n’hêl đah nau nchrăp ƀư nau kan, bôk nau kan tâm dăch ma nau dơi. Nau kan ndâk njêng Đảng, ƀư kan cán bộ, mêt uănh, bonh đă, ntrơn rgâl nau kan hành chính geh dơi ƀư ân tâm ban; nau kan Mặt trận ntoh lư đah nau kan mât chăm rơh Tết ndrel nchrăp ân nar săch kan.

Lôch rơh rƀŭn, Groi Bí thư Rnâng kan n’gor uỷ Dak Lak, wa Cao Thị Hoà An đă ăp gưl uỷ ân ndal ƀư ân rjăp ăp ntŭk kan jêh lôch săch kan, mô ân nkol nau kan; rgum lam ân nau hun hao, sŏk nau tam ƀư nkŏ nau gay ma veh nchră ăp nau dăng bah cán bộ. Ndrel ma nê, ntrŭt dăng ngăch nau pă tơm prăk ntuh kơl nsum, doh rkaih nau nkol, nsrŭng nau ƀư mbrơi; ƀư ân rjăp nau nchâp đă, n’hao nau tam bah ntrong kan, ntrŭt dăng nau rgâl mhe hành chính, ntrơn rgâl mrô; mât nâp nau kan tă bah tâm dâng. Ngăn lah, n’gor Dak Lak đă rgum ƀư ân ngăn ndrel ntrŭnh ân tam 9 nau ntrŭnh ƀư kan bah Bộ chính trị, pơk trong ân nau hun hao ngăch, nâp nâl tâm rơh tât./.