Jêh âk năm tăch proăt, ăp nău nchrăp ƀư điện hạt nhân Ninh Thuận 1 n’hanh 2 dôl mbơh ƀư tay ta nkual mpeh Bah dâng n’gor Khanh Hòa. Trong kan sŏk neh lĕ geh nău rgâl, nkual ntŭk gŭ mhe dôl dơi ntuh kơl, nuĭh ƀon lan ntơm tâm ban ŭch, nchrăp jao an neh.

Yơn lah, jêh rlău 15 năm, 2 nău nchrăp ƀư lĕ nsrŭng, âk nău dơi geh bah nuĭh ƀon lan tâm nkual geh khuch khat. Neh ntu geh nsrŭng”, nuĭh ƀon lan mô dơi ntuh kơl jŏ jong. Nău trok neh mô dơi tĭng rnoh khlay nkra njêng mhe. Wa Tu Thanh Hường, ta xă Phước Dinh an gĭt, nuĭh ƀon lan lĕ rgâl bah neh choih an mât tui, mât klo hương nsĭt tay rnoh khlay wăng sa âk. Rnôk sŏk neh ƀư tĭng nău nchrăp ƀư, nău nkra joi nău rêh n’gluh an jăch ndăn đah nuĭh ƀon lan:

Jay gâp geh sŏk nklăp 2 ha, dôl mât klo hương n’hanh tui. Rnoh khlay mât tui ka aƀaơ dŭt âk. Du đêt kônh wa nsơr neh an nău nchrăp ƀư, an hăn bah dih rwăt neh đah rnoh khlay hao tât 15 rmen prăk du ha.

Mô knŭng nău nkoch joi nău rêh, ndoh ndơ gung trong lah nău uănh têh ngăn bah nuĭh ƀon lan nkual nău nchrăp ƀư. Ta nkual ƀon lan gŭ Vĩnh Trường, nkual tơm bah nău nchrăp ƀư ta xă Phước Dinh, âk trong hăn jêt, jŭr djơh, khuch tât nău hăn nsong n’hanh hun hao wăng sa. Wa Nguyễn Thị Thanh, ta thôn Vĩnh Trường nkoch rnôk trơn tât ntŭk gŭ mhe, nuĭh ƀon lan mpŏng ŭch geh gung trong tâm ban, dơh lơn:

Ƀon lan Vĩnh Trường kăl e trong jêt, jêr jŏt dŭt âk. Ndâk ƀư ngih wâl an rdêng  lăp hăn trong jêt, mô dơh kơt ăp ntŭk êng. Gâp mpŏng ŭch hăn ntŭk mhe an dơh, gung trong an pơk hvi.

Ta năp na nê̆ nĕ, đă n’gluh an nkra rgâl trong ƀư an n’hêl na nê̆. Nghị quyết 189/2025 bah Quốc hội mpeh du đêt trong ƀư, nău kơl êng ntuh kơl ndâk ƀư nău nchrăp ƀư điện hạt nhân Ninh Thuận lĕ pơk luh trong pháp lý đah ăp trong ƀư an êng. Yơn lah, ăp nău kơl aơ dôl dơi kơp uănh tay, nkra an di, ntop tay gay mkra ăp wăk kol na nê̆ ta ntŭk, dơh roh an nuĭh ƀon lan yor nău nchrăp ƀư jŏ jong ir.

Mô kâp trong ƀư an jêh, n’gor Khánh Hòa dôl ntĭm rđău 2 ntŭk Vĩnh Hải, Phước Dinh nchrăp lor ƀư tĭng  trong kan trok, ntop kơl, ƀư ntŭk gŭ mhe. Tât aƀaơ, trong kan trok, ƀư ntŭk gŭ mhe lĕ geh săk rnglăy. Nău nchrăp ƀư Ninh Thuận 1 sŏk nklăp 450 ha, lĕ uănh an trok an rlău 150 nuĭh, prăk rlău 168 rmen prăk. Nkual gŭ mhe rlău 65 ha ntơm jêh trong nchrăp. Nău nchrăp ƀư Ninh Thuận 2 sŏk nklăp 320 ha, lĕ kơp uănh rlău 530 rnăk, rlău 100 rnăk lĕ dơi trok manh lor.

Wa Nguyễn Văn Nhựt, Giám đốc N’gâng kan Công Thương n’gor Khánh Hòa an gĭt:

Ta 2 xă, UBND n’gor Khánh Hòa lĕ ntĭm rđău ntrôl ngăch sŏk neh, tĭng nuih n’hâm kơt dŏng rnoh khlay bah Nghị quyết 189 aƀaơ, nkre kơt dŏng trong mkra rgâl an di. Rnôk Quốc hội an na nê̆ nkra rgâl an di, ntop tay Nghị quyết, n’gor nkô̆ nău mbơh ƀư ngăch.

N’hêl na nê̆ an saơ, 2 nău nchrăp ƀư điện hạt nhân mô knŭng geh nkô̆ nău mpeh rnă njrăng ŭnh nar ngih dak, rgop tŏng ăp điện đăp mpăn, jŏ jong an hun hao neh dak, ma hôm pơk luh dơi jêng ntŭk hao jêng mhe ta Nam Trung bộ. Đah nău geh êng tu tơm điện têh dăng âk, n’hôl ƀô đêt, ăp ngih măy mbra rgop âk ntil ndơ tăch, n’hŭch knơm tâm ŭnh nar hóa thạch, n’hao nău nchrăp êng bah trong điện.

Ta ƀon lan, đah nău geh mper dak lêng, gung trong nar lơ jêh, nkual aơ dơi geh hun hao nkre wăng sa dak lêng, pâl nđaih, nău rhŏ n’hanh công nghiệp ŭnh nar. Wa Nghiêm Xuân Thành, Bí thư n’gor ủy Khánh Hòa an gĭt, gay ăp nău dơi jêng ngăn, nău dôh rklaih ngăch ăp wăk kol mpeh naư kơl, tŏng ăp nău dơi nuĭh ƀon lan n’hanh nchrăp tâm ban ăp ndơ geh hun hao hôm e nkô̆ nău tơm khlay.

N’gor an uănh tât lơn joi nău rêh jŏ jong an nuĭh ƀon lan tâm nkual sŏk neh; nchrăp mĭn njêng, mpăng bôk trong rhŏ nău bah nău nchrăp ƀư gay nchrŏng nău kan, ntop kơl ntĭm nti, dŏng nuĭh kan. Ăp ntil nău kơt gŭ âm, ngêt sa, pâl rlưn, ndrel đah hun hao lŏ mir tui ka... dơi an nchrăp tâm ban. Ŭch rgŏ jă tơm prăk, hăn di trong an geh nău rgop tâm nchră.

Nău tâm ban ŭch lĕ geh, neh dôl pơk, nău ƀa ƀă lah trong ƀư an tĭng ngăch na nê̆. Rnôk ăp “ntŭk kol” dơi dôh rklaih ngăch, 2 nău nchrăp ƀư điện hạt nhân mbra mô knŭng tât lor ngăch, ma hôm geh nuih n’hâm hun hao jŏ jong an Khánh Hòa n’hanh nkual Nam Trung bộ./.