Kơt nti n’hanh ƀư tĭng nău Wa hŏ jêng nău kan ngăn ngăn tâm nău rêh bah druh ndăm n’gor Gia Lai. Ntơm bah nău mât ndray săk tơm văn hóa tât hun hao wăng sa nâp dăng, âk trong ntĭt leo ƀư mhe hŏ njêng luh, ntoh lư “Ƀon cheh tanh way ơm” bah yuh Rơ Mah H’Dịu ta nkuâl Đức Cơ n’hanh ntơ lư “Jrai Ialy Coffee” bah nai ntĭm Siu Sắt ta nkuâl Chư Păh. Ăp nuĭh ntĭt leo lor nê dôl rêng lam nuih n’hâm nđơn nsan hao bah nuĭh druh ndăm Jarai nar aơ.

Nar kêng dŭt pơh, yuh Rơ Mah H'Dịu - Bí thư Đoàn druh ndăm xã Ia Kriêng, nkuâl Đức Cơ, n’gor Gia Lai rgum druh ndăm- rchong kon se jê̆ ta jay văn hóa ƀon gay dơi  ăp bu ranh ƀon trêng nti tay ăp nău  kan tanh tôk n’hanh tŭr goh chĭng gong. Tĭng rmôt băl mom njôm wăr ăp nuĭh gĭt blău, uănh tĭng ti kôih rse….Rmôt êng ƀa ƀă hôm nđơr đah tĭng râp chĭng gong. Bu ur bí thư đoàn xã Rơ Mah H'Dịu an gĭt nău kan dja mpeh trong nchrăp “Ƀon tanh tôk way ơm druh ndăm”.

“Trong nchrăp kan dja, ntoh bah nău mĭn ma săk gâp nơm saơ rơh druh ndăm, mom ndăm ta ƀon lan mpôl hên gĭt tanh sah, tanh rup ndrang; dơn hôm tay du đêt bu ranh âk năm deh dơm. Yor kơt nê̆, gâp râng trong nchrăp kan đah ŭch rŏng rơh mom ndăm, druh ndăm saơ n’hanh rdâk tay nău kan tanh tôk way ơm bah u che he”.

Trong nchrăp “Ƀon tanh tôk way  ơm druh ndăm” hŏ geh giải Nhất rơh tâm rlong nău mĭn blău mhe ntơm njêng nău kan tâl VI năm 2022 n’gor Gia Lai n’hanh lăp rmôt 40 Tâm rlong n’glĕ dŭt ntơm njêng nău kan druh ndăm tâm ƀon lan năm 2023 tă bah Trung ương Đoàn ƀư. Trong nchrăp hŏ wăch rgum âk mpưm druh ndăm rnoi mpôl đêt tât râng n’hanh rlău 700 kon se nti ta ntŭk kơt tĭng. Ndrel đah trong nchrăp kan dja, yuh Rơ Mah H'Dịu - Bí thư Đoàn xã Ia Kriêng hôm an ƀư geh nău tam trong ntĭt leo druh ndăm “2 mô, 2 geh” ta nkual n’har bri.

“Kơt nti n’hanh ƀư tĭng nău mĭn Wa Hồ mpeh mât ndray săk tơm văn hoá rnoi nuĭh, ta ƀon Hrang, Đoàn mpôl hên hŏ njêng CLB đàn tơrưng đah nău ŭch rdâk tay nuih n’hâm rŏng ƀon tơm neh dak, mât ndray săk tơm văn hoá Jarai an rơh kơn druh ndăm. Bah nê, ntrŭt nsôr druh ndăm joi gĭt n’hanh mât ndray dơi ndơ uh goh rnoi mpôl đê̆ lah đàn tơrưng uĕh êng bah nuĭh Jarai. Mpôl hên leo ƀư sinh hoạt pâl rlưn uĕh mƀak, mpât mprơ, tâm mâp tâm nđŭr đoàn viên druh ndăm đah ăp ƀon lan. Mpôl hên jă ăp bu ranh ƀon, nuĭh gĭt blău tâm mâp nkoch bri, mprơ ndrong, nkoch nđơn yău n’hanh nkrêh đơn an druh ndăm ndrel djăt”.

Lah kơt ta nkual n’har bri, bu ur Bí thư Đoàn xã Rơ Mah H'Dịu gân djăng đah nău mât ndray, ntik n’hao văn hóa way ơm nuĭh Jarai, rhơn n’hao lah ngoăy tâm 100 cán bộ Đoàn lam dak dơn ndơ nkhôm rnê Lý Tự Trọng năm 2025, ri ta xã Ia Ka, nkuâl Chư Păh, n’gor Gia Lai, nai ntĭm Siu Sắt ntik n’hao tay nău gĭt blău kơl kônh wa mât chăm cà phê nâp dăng.

Trong nkra rdâng lơh tay đah duh phang an tơm cà phê tâm khay wai n’hanh rêng mât chăm hữu cơ dŭt dơi ƀon lan kan lŏ mir Tây Nguyên uănh khlay. Nău gĭt dja hŏ dơi nai ntĭm Siu Sắt (nuĭh Jarai) ta ƀon Mrông Yố 1, xã Ia Ka, nkuâl Chư Păh, n’gor Gia Lai nchih nkoch ta mạng xã hội, wăch rgum hang rbăn nuĭh tĭng groi nđôi.

“Ntơm nơh, gâp nti ngành Sư phạm Điạ lý ta Đaị học Sư phạm Quy Nhơn. Năm 2015 gâp geh ur, jay  mpeh ur ta Ia Ly, gâp saơ săk geh neh ntu, trôk nar n’hâm sial nđik uĕh dŭt dơh gay hun hao tơm cà phê. Yơn kônh wa Jarai ta aơ mât chăm cà phê mô hŏ geh trong rƀŏng nâp dăng. Gâp mĭn he lah đoàn viên druh ndăm ân gŭ mĭn, mhâm ƀư an kônh wa geh dơi trong rƀŏng mhe, hun hao jŏ jong nâp dăng lơn”.

Lôch 10 năm, nai ntĭm Siu Sắt ndrel đah ur lah Rơ Châm Awưnh rdâk njêng nkual tăm cà phê hữu cơ n’hanh njêng Công ty TNHH Nkret njêng ndơ tuch tăm Jrai Ialy. Rêng mât chăm, tuch tăm cà phê bah công ty di rnoh kah uĕh Organic n’hanh VietGAP, an njêng luh 3 ntil ndơ geh ƀư: Cà phê Robusta môi, Robusta găr n’hanh Robusta kah khlay mha êng săk ntơ “Jrai Ialy Coffee”, di rnoh kơp dơn OCOP 3 sao. Công ty hŏ tâm nkrêp kan nsum đah 50 rnăk ƀon lan gay hun hao nkual tăm cà phê hữu cơ đah lĕ rngôch rnoh hvi 40 ha. Bah nê, kơl kônh wa Jarai rgâl nău mĭn tăm cà phê, rƀŏng tât trong leo tăm hữu cơ nâp dăng. Nkoch mpeh nău kan dja, nai ntĭm Siu Sắt mô chuêl nău ntĭm bah Wa Hồ.

“Nkah nău Wa Hồ ntĭm, u che he geh n’hâm suan rdâk njêng neh dak, rlăch ndăng phŭng rlăng lăp pit in ri he lah kon său ân rdâk njêng neh dak ma ăp nău  kan, nsĭt tay nău ơm tă gĭt kơt nti kơt dŏng ngăn ngăn tâm nău rêh. He nsrôih rgum tay ƀon lan tâm ƀon, ndrel ƀư wăng  sa, ân tâm rnglăp tâm kơl nsum kơt nău Wa Hồ ntĭnh ntăn “Tâm rnglăp, tâm rnglăp, Tâm rnglăp têh- Nău dơi, nău dơi, nău dơi têh”.  

Ăp năm rlău aơ, nău kơt nti n’hanh ƀư tĭng nău mĭn, nuih n’hâm uĕh lŏng, trong gŭ rêh Hồ Chí Minh dơi ăp gưl n’gâng kan n’gor Gia Lai uănh khlay an  ƀư ma ăp trong leo, trong kan cách mạng. Lam n’gor hŏ an ƀư rlău 10.500 ntŭk ƀư, gâl kan druh ndăm đah lĕ rngôch rnoh khlay rlău 150 rmen prăk. Nô Đỗ Đức Thanh – Groi Bí thư Rnâng kan Tỉnh Đoàn Gia Lai an gĭt, ntơm bah năm 2018 tât aƀaơ, ta cổng thông tin điện tử bah Tỉnh Đoàn hŏ nchih nkoch rlău 400 druh ndăm ntoh lư, ntĭt leo lor tâm ăp ntil nău kan.

“Kơt nti n’hanh ƀư tĭng nău Wa ri gâp saơ du nău kan ngăn ngăn lah năl saơ n’hanh pơk hvi ăp nuĭh ntoh lư. Ntơm bah nê, njêng du trong leo ƀư gay đoàn viên kơt nti, ntrŭt ntrôl nsum ƀư jăp. Mpôl hên mbra rgâl nkra tay trong ƀư nkoch trêng, uănh khlay tât nău njêng luh ăp kôp ndơ dŏng nkoch trêng ta mạng xã hội. Tâm lam Đoàn ri ăp cán bộ đoàn lah du trong ntĭt leo lor gay an ăp đoàn viên druh ndăm rƀŏng tât kơt nti n’hanh ƀư tĭng. Nău mpư rnê nuĭh ntoh  lư ƀư tĭng nău Wa lah du nău kan gay an mpôl hên njêng tay nuih  n’hâm nsan mhe tâm rơh rgŏ jă kơt nti n’hanh ƀư tĭng nău mĭn nuih n’hâm uĕh lŏng n’hanh trong gŭ rêh Hồ Chí Minh”.