Tỉnh lộ 1 Dak Nông, trong rlet thôn 3, xã Quảng Tâm, nkuăl Tuy Đức geh âk ntŭk ntu huk brŏng dak hvi ndrel jru, băm jâng ndeh. Ăp rnôk geh ndeh hăn ro ri n’huk bul ƀư ƀon lan bar đah trong ât n’hâm. Wa Trương Anh Bằng, tơm du ntŭk tăch ndơ ngêt sa tâm Quảng Tâm mbơh, trong aơ djơh bah âk năm. Bol ma ăp năm geh nkra yơn lah geh đê̆ khay ri trong lŏ djơh khuch tay:

‘Ngih hên tăch ndơ sa ta aơ mro ntâl mpông tủ gay ma der n’huk lăp tâm ndơ sa. Nsưng mpan ri jut rao 2-3 tŏ ăp nar yơn kŏ mô kloh ơm. Âk me mbŏ rdeng kon se hăn rlet trong aơ ri chôt mbir ƀŏ lĕ kho ao. Kon se hăn nti chôt ri geh tâm dak bok kơt nê đŏng, gâp ân thŭng dak ta nê gay ma kon se ndrel me mbŏ khân păng rao jâng ty. Bu geh nkra đŏng trong ma hôm djơh, hôm n’huk ơm”.

Tỉnh lộ 1 tâm Dak Nông jur djơh mô êng khuch tât nau kan tăch rgâl ndrel nau rêh bah ƀon lan ma ƀư trong djơh ngăch, rnôk rdeng ndơ ri jŏ ndrel roh âk dak ŭnh đong, ƀư n’hao rnoi prăk nơm roh rui. Nô Nguyễn Kim Toàn, nŭih ƀĭt ndeh mbơh:

‘Gâp hăn ntơm bah Quảng Tân tât Dak Rtih mô lah ăp xã êng êng mpeh đah rĭ ri jŏ rlau 2-3 tŏ ngăn rđil ma bah năp nơh. Bah năp nơh ri gâp knŭng nkhŭt 3-4 lít dak pring, yơn rnôk aơ ri roh 8-9 lít ngăn. Bah năp nơh trong hăn ueh, nơm rgâl jâng ndeh 1,5 năm/tŏ, rnôk aơ rgâl jâng ndeh 7-8 khay lah rgâl hôm”.

Tỉnh lộ 1 lah trong tơm, nthoi nkuăl Tuy Đức đah nkuăl Dak Rlâp, nthoi ma trong Hồ Chí Minh ndrel Quốc lộ 14C, ndrel mpông trong Bu Prăng tât Campuchia, geh nau khlay tâm nau tăch rgâl ndoh ndơ, ntrŭt dăng hun hao văng sa-rêh jêng ndrel đăp mpăn nau rêh neh dak tâm nkuăl n’har bri Tuy Đức. Nkô̆ ƀư trong jur djơh lah yor ndeh rdeng jâk, rdeh rdeng năch hao âk tâm ăp năm rlau aơ, tâm rnôk nau mât nkra trong ăp năm mô geh âk.

Wa Dương Huy Toàn, Bí thư nkuăl Tuy Đức mbơh, nkuăl hŏ njoăl săm ƀŭt tât UBND n’gor Dak Nông ndrel N’gâng kan ndâk nkra gay đă pă tơm prăk n’hao nau nkra trong. Rnôk aơ nau đă nê geh ŭch hôm ndrel dôl kâp nau rklaih ăp nau kan ba kơi đŏng:

 ‘N’gor hŏ mĭn rvê mpeh nau ntrơn leo du đê̆ rnoh prăk tă bah Trung ương gay ntrŭnh ƀư ndâk nkra trong aơ. Mpeh nau nchrăp ƀư ndrel tơm prăk, ăp nau kan dôl geh ntrŭnh ƀư gay ma nchrăp lah mra geh nau ndâk n’hao nkra trong tâm dŭt năm aơ”./.