Lơ 10/3, wa Thái Đại Ngọc, Ủy viên Trung ương Đảng, Bí thư N’gor ủy Gia Lai lĕ hăn uănh nđôi ngăch ƀư ăp ndơ ndâk ƀư ngih samƀŭt phổ thông nội trú 2 gưl Tiểu học n’hanh THCS ta ăp xă n’har bri Ia Pnôn n’hanh Ia Dom. Dĭng lĕ rnoh ntuh kơl bah 7 ngih samƀŭt phổ thông nội trú 2 gưl Tiểu học n’hanh THCS ta ăp xă n’har bri mpeh bah lơ n’gor Gia Lai lah rlău 1.500 rmen prăk, dơi ndâk ƀư ta dĭng lĕ rnoh neh bơi 52 ha.

N’gor geh nău rƀŏng jêh n’hanh jao an lĕ rngôch 7 ngih samƀŭt bah năp lơ 31/7/2026. Bôl ndrĭ, aƀaơ, mhe knŭng geh du ntŭk ngih samƀŭt Ia Púch tŏng di nău đă, hôm 6 ntŭk ngih samƀŭt ƀa ƀă mbrơi da dê nkôp đah trong nchrăp bôk năp. Nkô̆ nău yor ntŭk kan mbơh ntĭm ndâk ƀư mbrơi, nău mô tŏng nuĭh kan, ndrel đah nău ndơ ndâk ƀư hao khlay tâm khay dăch aơ.

Jêh uănh nđôi na nê̆, Bí thư N’gor ủy Gia Lai Thái Đại Ngọc đă nuĭh tơm ntuh kơl n’hanh ăp nuĭh ndrănh rgŏ jă tay tơm prăk, mkra jêr jŏt gay ntrôl ngăch ndâk ƀư. Ăp n’gâng kan, nău kan tâm rgop dôh rklaih jêr jŏt mpeh ndơ ndâk ƀư, đăp mpăn ndơ ƀư jêh ngăch ndơ̆ an dŏng tâm năm nti mhe. Nkre kơp uănh tay, ntop ăp ndơ ƀư gay đăp mpăn săk rnglăy dŏng ngih wâl, uănh khlay tơm si, nkual jay gŭ an nai n’hanh kon hŏk, ndrel trong mkra ndŏk nja tâm di.