Tâm rêng Pơh lễ ntơm pơk Năm pâl nđaih gưl neh dak 2026, n’gor Gia Lai hŏ ƀư Tâm nchră ntrŭt ntrôl ngăch ntuh kơl đah nkô̆ “Gia Lai – Rgâl trong ntĭt leo hun hao tâm rơh keh mbrô”. Ta aơ, n’gor Gia Lai hŏ wăch rgum n’hanh ký ton siƀŭt nchih nkah ntuh kơl đah bơi 300 trong nchrăp, đah lĕ rngôch rnoh ntuh kơl rlău 33 rmen USD; pơk luh nău mpŏng mpeh rơh hun hao đăt ndal.

 Ta Tâm nchră Ntrŭt ntrôl ngăch ntuh kơl năm 2026, n’gor Gia Lai hŏ ndơ̆ n’glêh an trong nchrăp ntuh kơl n’hanh ký ton siƀŭt nchih nkah an lĕ rngôch 273 trong nchrăp, đah lĕ rngôch tơm prăk đăng ký n’hanh nchrăp hao tât 850.000 rmen prăk (tâm ban đah rlău 33 rmen USD). Tâm nê, 144 trong nchrăp dơn n’glêh an trong nchrăp ntuh kơl đah lĕ rngôch tơm prăk rlău 230.000 rmen prăk n’hanh 129 trong nchrăp ký ton siƀŭt nchih nkah đah rlău 620.000 rmen prăk. Âk tập đoàn têh hŏ ký ăp trong nchrăp rbăn rmen prăk kơt: VinEnergo (ŭnh nar sĭt jêng tay- 210.000 rmen prăk), Tập đoàn FLC (pâl nđaih, logistics - 150.000 rmen prăk), Phú Tài (ndơ rdâk mon mhe, neh ntu - 26.500 rmen prăk), n’hanh Sun Group (pâl nđaih rlu rlău - 20.000 rmen prăk)… Ntơh măt an ăp doanh nghiệp dôl an ƀư âk trong nchrăp têh ta n’gor, wa Trần Bá Dương, Kruanh Hội đồng quản trị, Tổng Giám đốc Tập đoàn Thaco, hŏ geh ăp nău nkoch ta tâm nchră:

“Ta Gia Lai, tâm 7 năm aơ pah kan pháp lý geh srŭng gâng, n’hanh rnôk n’glăp n’gor Gia Lai pah kan pháp lý dơi uănh khlay droh rklaih n’hanh ntrŭt ntrôl du trong nsrôih uĕh. Ăp trong nchrăp dơi an ƀư nsrôih uĕh n’hanh dŭt n’hâm khlay lah nău ndrel hăn uĕh bah n’gâng kan ăp gưl bah n’gor Gia Lai kơt tâm bah ri aơ nơh ri mpôl hên ton mbra tĭng ƀư ngăch n’hanh nsĭt geh nău dơi tam ăp trong nchrăp kan, rgop jêng du jâng nsing tuch tăm jŏ jong an n’gor Gia Lai”.

Ăp rnoh âk nkah uĕh ta tâm nchră lah jâng ntơm n’hanh suan ntrôl gay Gia Lai đăt ndal, tât rnoh hun hao bar mbrô ntơm bah năm 2026. Gay ƀư jêng ngăn ngăn ăp nău ton, wa Thái Đại Ngọc, Bí thư Tỉnh ủy Gia Lai rđău đă ăp gưl n’gâng kan ân tĭng ƀư di nău way “6 kloh”: kloh nuĭh, kloh nău kan, kloh mông nar, kloh nău dơn kan, saơ kloh luh ntil n’hanh kloh n’glĕ nău dơi kan, mô an geh ăp trong nchrăp kan nsrŭng n’glĕ ta siƀŭt; ton rdâk njêng du jâng nsing rhŏ dŏng, uănh “nău dơi bah doanh nghiệp lah nău hun hao bah n’gor” n’hanh nkra rmal ngăn ăp nău đek mân ntuh kơl; nkre ŭch rŏng ăp doanh nghiệp mô dơn an ƀư trong nchrăp kan di rnoh ngăch ma hôm ân krêp dêh jŏ jong, uănh khlay săk tơm văn hóa ta ntŭk n’hanh n’hao tâm nkrêp kan nsum đah ăp doanh nghiệp tâm n’gor gay ndrel râng jru tâm rêng pă an tơm ndơ tăch lam ntŭr neh. Bah ăp nău dơi hŏ geh ta tâm nchră, Bí thư Tỉnh Gia Lai Thái Đại Ngọc lah rjăp nău nsrôih ƀư nău ton ntuh kơl jêng ăp ntŭk ƀư ngăn ngăn, nsĭt tay nău dơi ngăn ngăn an hun hao wăng sa- rêh jêng kon nuĭh.

"Gia Lai ton way ndrel hăn, nta ăp trong dŭt dơh gay ăp doanh nghiệp, nuĭh tơm ntuh kơl đăp mpăn ƀư njêng, tăch rgâl, ndrel hun hao n’hanh ndrel geh nău dơi. Mpôl hên ŭch rŏng n’hanh nsing nơm an lah Gia Lai mbra mô dơn lah ntŭk tât săk geh, đăp mpăn, lah ntŭk nsan mpăr ngăn gay ăp ntŭk nchrăp ƀư, nău mĭn ntuh kơl jêng ngăn ngăn, gay ăp nuĭh ntuh kơl nsan hao jêng ăp doanh nghiệp dâk leo lor bôk năp tâm trong kan bah he."

Râng n’hanh ƀư tơm tâm nchră, Groi Thủ tướng Chính phủ Hồ Quốc Dũng rnê âk ăp nău nsrôih bah Gia Lai; lôch jêh ta tâm nchră hŏ an saơ nău nsing nơm bah mpôl ntuh kơl tâm trong rƀŏng hun hao bah n’gor. Groi Thủ tướng dăn đă n’gor wăch rgum ntuh kơl geh sơch di tĭng nău way "3 mô" (mô rgâl lơh khuch djơh ntŭk gŭ rêh bri dak sŏk nău hun hao, mô dơn trong nchrăp kan nde nuĭh kan/công nghệ khuch ơm, mô sơch nuĭh ntuh kơl mô lăng geh dăng) n’hanh an lor ăp ntŭk nchrăp ntuh kơl FDI rơh mhe kơt AI, bán dẫn. Nkre, Groi Thủ tướng đă Gia Lai ân uănh wăng sa êng bah dih ngih dak lah suan ntrôl dŭt khlay, ntrôl ngăch rgâl dơh glêh siƀŭt tĭng trong rƀŏng "nta trong dơh, rhŏ dŏng" gay sŏk nău di nuih n’hâm bah doanh nghiệp ƀư mâng weh n’hanh ton way ndrel hăn, droh rklaih năn ngăch ăp jêr jŏt an nuĭh ntuh kơl:

“Đăm gĭt jru hvi nuih n’hâm hun hao wăng sa êng bah dih ngih dak jêng du suan ntrôl dŭt khlay bah jâng wăng sa. Nta trong dơh gay doanh nghiệp êng bah dih ngih dak hun hao lĕ mpeh rnoh têh hvi, săk geh; ntrŭt nsôr jêng ăp doanh nghiệp geh nău dơi tâm rlong âk, nkre ntrŭt ntrôl tâm ntêng lêng kan nsum đah doanh nghiệp tâm dak đah doanh nghiệp FDI, tĭng kơn râng jru tâm rêng rnoh khlay ƀư njêng n’hanh pă an tơm ndơ tăch lam ntŭr neh. Lah he ân lah ngăn, ân ƀư ngăn, ƀư an tât dŭt, ƀư an tât saơ luh ntil gay ndơ̆ Gia Lai he hun hao đăt ndal tâm let năp tay."

Đah ăp nău ton dăng bah n’gâng kan ndrel nsing nơm n’hanh nău ndrel hăn bah mpôl doanh nghiệp, Tâm nchră ntrŭt ntrôl ngăch ntuh kơl năm 2026 mô dơn nsĭt tay ăp rnoh âk nkah uĕh an Gia Lai, ma hôm pơk luh nău mpŏng mpeh du rơh hun hao đăt ndal, jŏ jong. Ntơm bah jâng nsing nê, Gia Lai dôl tĭng kơn an saơ lah ntŭk tât uĕh bah tơm prăk ntuh kơl, rƀŏng tât hun hao ngăch, luh saơ ntil n’hanh lăp rgum jru tâm rêng rnoh khlay lam ntŭr neh tâm let năp tay.