Ta nkual ƀon têh Đà Lạt, Ủy viên Bộ Chính trị, Groi Thủ tướng Rnâng kan Chính phủ Nguyễn Hòa Bình mhe geh rơh pah  kan đah Ban Thường vụ Tỉnh ủy Lâm Đồng, Bình Thuận n’hanh Dak Nông mpeh tĭng ƀư Nghị quyết tâm nchră tâl 11 bah Ban Chấp hành Trung ương Đảng khóa XIII, nkre đah rdâk njêng, lôch  jêh siƀŭt nchrăp lor, pah  kan nuĭh kan. Groi Thủ tướng Nguyễn Hòa Bình lah rjăp: Aơ lah nău dơn kan jăch ndăn, ăp n’gor ân grêt dăch ăp quy định bah Đảng n’hanh Ngih dak gay ƀư kloh, lhăt, đăp mpăn mbơh kloh rvah.

Ta rơh pah kan, ntơh măt kruanh 3 n’gor Lâm Đồng, Bình Thuận n’hanh Dak Nông hŏ mbơh rnoh ngăch tĭng ƀư trong nchrăp an ƀư n’glăp dơn ngoăy 3 n’gor, trong leo ƀư dăp rgum nhih pah kan way kan, n’glăp gưl xã n’hanh rdâk njêng trong leo ƀư n’gâng kan 2 gưl; mbơh kan nsum tĭng ƀư gŭ mĭn, rdâk njêng siƀŭt nchrăp lor dăn đă ta Đại hội Đảng bộ n’gor Lâm Đồng mhe, siƀŭt nchrăp Đại hội Đảng bộ gưl tâm dâng.

Lôch geh trong nchrăp n’glăp nsum 3 n’gor,  ăp rơh kơn ƀon lan Lâm Đồng mpơl nău uănh khlay mpeh nău rsong hăn, tâm pă ntŭk gŭ ntŭk sa, an cán bộ bah bar n’gor Dak Nông n’hanh Bình Thuận mbra rgum sĭt nhih pah kan ƀư ta nkual ƀon têh Đà Lạt pah kan. Wa Hồ Trung Hiếu, ta phường 4, nkual ƀon têh Đà Lạt mpơl nău:

“Gâp dŭt rvê rnôk bơi 2.000 oh nô cán bộ công chức bah bar n’gor Dak Nông n’hanh  Bình Thuận mbra sĭt ta aơ, nău tâm pă ntŭk gŭ, nkra nău ŭch geh an du đêt oh nô mhâm ƀư. Yor oh nô sĭt ta aơ ngăn hôm, nău rsong hăn mbra mâp jêr jŏt hôm, nău ŭch geh gŭ đăp mpăn ta Đà Lạt, lah mpeh jŏ jong ri mbra hao âk mpeh nău ŭch geh ntŭk gŭ. Gâp ŭch rŏng n’gor Lâm Đồng ân geh trong rƀŏng n’hanh trong nkra jăch ndăn”.

Bah năp nău rvê bah  nuĭh ƀon  lan mpeh nău rsong hăn, ntŭk gŭ sa an cán bộ rnôk n’glăp nsum n’gor, wa Nguyễn Ngọc Phúc, Groi kruanh UBND n’gor Lâm Đồng an gĭt, n’gor hŏ geh trong nchrăp an nkô̆ nău dja:

“Mpôl hên hŏ ôp uănh 10 ntŭk gay cán bộ ăp n’gor tât pah kan. Ntŭk gŭ, jay công vụ ri dôl hăn ôp uănh tay gay đăp mpăn an oh nô geh ntŭk gŭ ntŭk sa đăp mpăn. Ndeh rklư rsong hăn, mpôl hên nchroh lah ndeh 50 ntŭk gŭ ri Dak Nông ân geh nklăp 10 bôk ndeh du tơ̆, hăn ntơm bah nar pơh mô lah ôi nar ngoăy gay oh nô hăn pah kan, Bình Thuận geh nklăp rlău jât, bar jât bôk ndeh đŏng. Mpôl hên dăn đă Chính phủ ân geh trong kơl prăk dŏng na nê̆ an ăp cán bộ dja dơi geh prăk rsong hăn”.

 Groi Thủ tướng Rnâng kan Chính phủ Nguyễn Hòa Bình rnê âk nău tâm ban ŭch bah 3 n’gor tâm pah kan rđău đă, kan nsum tĭng ƀư n’glăp nsum, dăp rgum nuĭh kan, nchrăp uĕh ăp nkô̆ an đại hội Đảng ăp gưl. Nkre njrăng đă, ăp n’gor ân ntik n’hao tay nuih n’hâm tâm rnglăp tĭng ƀư nău dơn kan nsum, lơn lah tâm rdâk njêng siƀŭt nchrăp lor đại hội; tâm pă, dăp rgum nuĭh kan an đại hội, an ăp nhih pah kan, đơn vị; rđău  đă tĭng ƀư geh nău tam ăp nău dơn kan hun hao wăng  sa- rêh jêng kon nuĭh. Lơn lah njrăng đă, n’gor Lâm Đồng ân tĭng ƀư jăp pah kan chính trị, nău mĭn tâm cán bộ, đảng viên; tâm pă nuĭh kan tâm ban, đăp mpăn di rnoh, rƀŏng tât nău geh nsum.

“Ân ƀư jăp pah kan mpăn nuih n’hâm, chính trị nău mĭn lĕ ma ăp n’gâng kan, ăp xã, ăp nkuâl bah kơi aơ mbra nchrai. Aƀaơ tĭng jăp nău tâm pă kan bah Đảng he tâm pă đă ƀư moh ntil nău kan ƀư nău nê, yơn mô dơi an tâm nuih n’hâm, nău rŏng geh nău dja mô geh nău ri. Gâp dăn đă he ân ndơ̆ luh rnoh tât kan, nău di, ndơ geh tŏng n’hanh nău tâm ban uĕh, kloh rvah tâm rnôk nkra nê lah nău tâm ban ŭch dŭt âk. Mpeh êng nuĭh ri he ân geh nău n’groh an đŏng”.

Mpeh tâm pă, dăp rgum nuĭh kan, Groi Thủ tướng Rnâng kan Chính phủ Nguyễn Hòa Bình lah rjăp: Aơ lah nău dơn  kan jăch ndăn, ăp n’gor ân grêt dăch tĭng ăp quy định bah Đảng n’hanh Ngih dak gay ƀư di, lhăt, đăp mpăn mbơh kloh rvah. Ân ndơ̆ nkô̆ nău mpeh rnoh di cán bộ dâk hao bôk năp, đăp mpăn di rnoh nău blău dơi kan, nsing nơm n’hanh nău tâm lăp tâm ban đah ăp n’gor; uănh khlay nău tâm pă cán bộ n’gâng tơm ta gưl xã, tŏng di đah nău ŭch geh dơn nău kan mhe.

Nău n’glăp nsum pe n’gor Lâm Đồng, Dak Nông n’hanh Bình Thuận mô dơn lah trong nchrăp têh gay glêh tam nuĭh kan, n’hao nău dơi tam mât bôk kan, ma hôm lah njuat hăn rƀŏng tât hun hao nâp dăng nkual Nam Tây Nguyên n’hanh duyên hải Nam Trung Bộ. Ăp nău uănh khlay tâm di bah nuĭh ƀon lan n’hanh cán bộ mpeh ntŭk gŭ, rsong hăn, tâm ban kơt pah kan leo ƀư, nuĭh kan hŏ dơi kruanh rđău kan n’gor n’hanh Chính phủ djăt, rđău đă grêt dăch. Đah nău tâm ban ŭch, nău nsrôih âk n’hanh nuih n’hâm rnglăp, pe n’gor dôl tĭng kơn nchrăp uĕh gay hăn tât rdâk njêng du trong ntĭt leo ƀư mhe, đăp mpăn n’hanh nsĭt geh nău tam, tŏng di đah nău hun hao tâm rơh mhe.