Mhe njur 2 ƀao ba tât kĭn tâm ngih kĭn ba tâm ƀon, wa Klưnh mbơh, bu ur rnôk aơ ueh jêh, n’ăp ma grăp phe ăp nar kŏ mô kâp ma rvê. Bah năp nơh ri peh mơ geh phe sông. Tâm ăp rnôk mih ntơm nơh kol 6-7 khay, rnôk aơ trong jêh ueh kơl ƀon lan hăn ri ueh nơih:

            ‘Bah năp nơh jêr ngăn, trong neh ri dak bŏk, ji kuet ri tâm tung jur yôk mơ dơi hăn săm. Rnôk aơ geh trong bê tông ngih dak ƀư kloh, ueh hăn. Nau pah kan tuch tăm bah kônh wa kŏ ueh, knŭng đê̆ năm dơm ma nau rêh ƀon lan hun hao rlau bah năp nê âk ngăn. Kônh wa lah ueh Ngih dak kơl an, ntuh kơl ndâk ân ƀon lan trong hăn”.

            Wa Hriu, Bí thư Chi bộ, nkre Kruanh ƀon K’de Kông mbơh, dŭt năm 2021, trong bê tông jong 6,6 km nthoi tă bah Quốc lộ 19 tât ƀon K’de Kông, xã H’Ra, nkuăl Mang Yang geh ntơm ndâk, ma tơm prăk 34 rmen tă bah tơm prăk n’gor Gia Lai. Knŭng du năm jêh nê trong geh hăn ro ƀư ƀon lan ta aơ dŭt rhơn. Geh trong mhe, hăn ro nơih, bu, mbo, ba mô lah mpa rong mô hôm geh bu mpet rnoh ôh, bu rvăt tât tâm ƀon, kơl kônh wa tăch khlay lơn. Wa Hriu, kruanh ƀon K’de Kông ngơi:

            Ntơm rnôk Ngih dak ndâk nkra trong tă bah xã tât ƀon, nau rêh kônh wa, ƀon lan geh rgâl âk ngăn. Nau nơih tâm rnôk rdeng ndơ tăm kơt ba, mbo, mô lah ăp ntil tơm keo aơ ri kŏ nơih lơn đŏnh, tăch geh rnoh khlay lơn. Rnơm ndri ma nau rêh bah kônh wa ƀon lan kŏ ăp nhoat hao đŏng”.

            Ndrel ma nau hun hao trong, UBND nkuă Mang yang hôm jao bơi tât 400 ha bri ân ƀon K’de Kông, xã Hra mât. Nau aơ kơl an kônh wa geh tay prăk bah nau mât bri, rgop nau kơl an nau rêh, hun hao rklaih ach o nâp. Êng nê, bôk nau kan kơl an rnoi mpôl đê̆ ndrôk, sur ndrel ăp kon ntil tơm kơt cà phê, tiêu ân ăp rnăk ach o. Ndri ma, âk rnăk geh ma rhiăng rkeh ăp năm.

            Rnôk aơ, bôk nau kan neh dak hun hao văng sa, rêh jêng nkuăl rnoi mpôl đê̆ dôl ƀư ăp nau dăp rgum, đăp mpăn ƀon K’de Kông. Nau kan aơ pă ntŭk ân 33 ur sai mhe nkhah, mô geh neh gay pơk trong ân đăp mpăn nau rêh, hun hao tuch tăm. Lah ngoai tâm ăp rnăk mom geh pă, nô ANinh, ƀon K’de Kông nkoch:

            ‘Aơ lah nau kan tâm n’gor, nkuăl, xã ntuh kơl, pơk trong ân ƀon gŭ âm mhe gay ăpur sai mhe tâm gŭ geh nkhah, gŭ êng ta aơ aơ rêh. Geh ngih dak kơl an nkra ngih vâl gung trong ueh, pơk trong ân ƀon lan hun hao”.

            Wa Yung, Groi Kruanh UBND xã H’Ra, nkuăl Mang Yang, n’gor Gia Lai mbơh, ƀon Kde Kông geh bơi tât 60 rnăk, đah rlau 270 nŭih, lah rnoi Bahnar. Năm 2022 lam dak geh tât 38 rnăk ach o, ntơm rnôk geh trong bê tông ‘Nau bah đảng nuih n’hâm ƀon lan” rnôk aơ rnăk ach o bah xã huch hôm 13 rnăk ndrel 17 rnăk êp ach o. Tât rnôk aơ, rlau 80% rnăk ƀon lan geh điện, dak kloh, rlau 70% rnăk geh ndeh hon-đa, ndeh điện:

            “Ƀon Kde Kông bah năp nơh rnôk hôm trong neh ri hăn ro jêr ngăn. Ji kuet mô dơi hăn tât ngih dak si ôh. Tât năm 2022 ngih dak nkra trong bê tông ri nau hăn ro nơih, ji kuet geh ndeh vơt leo năn gay săm. Ăp kon se hăn nti kŏ nơih đŏng. Ndoh ndơ kônh wa tăch kŏ mô hôm geh bu mpeh rnoh ôh...nau rêh kônh wa geh lơn. Âk rnăk hŏ nkra ngih, bah năp nơh ri gŭ tâm nthưp dơm ndrel blau tăm cà phê đŏng, tơm keo, bạch đàn, tăm bum blanh...trong nơih leo âk nau ueh ân kônh wa. Ƀon lan rhơn rnôk geh trong ueh, pah kan lơn ma geh dơi”

            Rnơm ăp nau ntrŭnh tâm di, ƀon K’de Kông, xã H’Ra, nkuăl Mang Yang n’gor Gia Lai rnôk aơ dôl ma rgâl âk, geh nau mhe, geh âk nau mpŏng mra geh nau rnơm ân jêh aơ./.