Kêng măng ntri (17/3) ta Nhih pah kan Trung ương Đảng, Tổng Bí thư Tô Lâm ƀư tơm rơh pah kan đah Thanh tra Chính phủ n’hanh du đêt nhih  pah kan geh tât mpeh nău nkra dŭt bah ăp nô nău lah phong ntoch jong, rlău gưl tâm bah ri aơ nơh. Nsing ta nău mbơh bah Thanh tra Chính phủ n’hanh nău rgop bah ăp nuĭh râng, lah n’glôch jêh tâm nchră, Tổng Bí thư Tô Lâm nchih nkah ăp nău nsrôih bah thanh tra Chính phủ n’hanh lam n’gâng kan thanh tra tâm nău tĭng ƀư pah kan wơt nuĭh ƀon  lan, nkra siƀŭt lah phong tâm bah ri aơ nơh.

Ntoh lư, lah ntơm bah bôk năm kan tât aƀaơ n’gâng kan thanh tra hŏ nkra âk rnoh kan hŏ wơt bơi 9.000 tơ̆ nuĭh đah rlău 8.000 tơ̆ nău tih đah bơi 1.000 mpôl âk nuĭh; dơn, nkra bơi 48.000 siƀŭt lah phong bah nuĭh ƀon lan, ra uănh tay, kan nsum nkra 1.000 tơ̆ nău lah phong âk nuĭh hôm bưm, jêr, ntoch jong; bah  nê, mât njrăng tay nău dơi an âk nuĭh, âk mpôl geh tât. Lah rjăp, let năp tay, Đảng, Ngih dak mbra an ƀư ndel du tơ̆ âk trong nchrăp, n’glêh an têh, trong nchrăp geh nău chŏl lor, njêng jâng nsing nâp gay an neh dak hun hao, lơn lah ân nchrăp an dŭt jăp uĕh Đại hội Đảng ăp gưl, hăn tât Đại hội Đảng lam dak tâl 14; jêng, pah kan nkra nău lah phong, ân dơi mât uănh lơn đŏng.