Rnôk ƀĭt joet nău rƀŏng hao jêng năm 2025 bah 6,84% hao 8,11%, n’gor Dak Nông ndrel âk rơh ƀĭt joet ăp rnoh an wăng sa khlay. Nĕ lah dĭng lĕ sŏk an tơm prăk ngih dak geh 3.500 rmen prăk (rnoh an ơm 3.350 rmen prăk); n’hanh dĭng lĕ rgŏ jă prăk ntuh kơl lĕ kon nuĭh geh 26.000 rmen prăk (rnoh an lah 25.000 rmen prăk. Wa Hồ Văn Mười, Kruanh UBND n’gor Dak Nông, dŭt uĕh đah nău eƀŏng hao jêng rlău 8,11% yor rmeh hun hao wăng bah n’gor hôm e âk n’hanh ăp tơm prăk têh mpeh ăp nău nchrăp ƀư têh ta n’gor. Wa lah rjăp 3 ntŭk dôl uănh, dơi kơl hao jêng bah Dak Nông đê̆ đŏng dơi geh 2 rnoh mrô tâm ăp năm tât. Bôk năp lah Trong têh hăn ngăch Gia Nghĩa-Chơn Thành mbra ntơm ƀư tâm năm 2025, kơl nthoi Dak Nông đah nkual Đông Nam bộ, geh nuih n’hâm têh gay hun hao. Jêh nĕ, nău geh neh ntu, pâl nđaih bah n’gor dŭt têh, lơn lah công viên địa chất lam ntŭr neh UNESCO Dak Nông dôl wăch rgum năch kơt ăp nuĭh ntuh kơl.

N’gâng tơm wăng sa mrô ngoăy bah n’gor lah sŏk joi, nkret njêng bô xít-alumin-nhôm dôl dơi âk nuĭh ndrănh uănh tât n’hanh dăn ntuh kơl đah prăk hang rmen đôlar. Wa Hồ Văn Mười nsing nơm, đah nău ntĭm rđău bah Chính phủ, nău lăp bah ăp n’gâng kan nău kan, ăp jêr jŏt, wăk kol tâm nău ƀư ăp nău nchrăp ƀư têh rmen đôlar dơi rơih jăng tơm prăk têh mbra kơl n’gor hao jêng ngăch tâm năm tât.

Dăp rgum 86 bah Chính phủ ŭch an Dak Nông 5 rmôt joi ƀư, nkret njêng khoáng sản. Mô geh tổ hợp bah TKV (Tập đoàn sah ônh-khoáng sản Việt Nam) aƀaơ dôl ƀư ri Dak Nông hôm 4 tổ hợp. Aƀaơ geh 6-7 tập đoàn wăng sa dŭt têh tâm dak lĕ ndơ̆ sam ƀŭt rhăch nău rgum ƀư 4 ngih măy, tổ hợp, dĭng lĕ prăk dăn ƀư rlău 6 rmen đôlar. M’hâm ƀư ri ƀư, tâm 6 khay đêt ngăn dơi an 3 tổ hợp đah 3 rmen đôlar ri geh 75.000 rmen prăk hôm, ƀư hao dĭng lĕ prăk ntuh kơl kon nuĭh hao. Ri rnoh mrô hao jêng 8% mô lah 10% dŭt dơh đah Dak Nông.

Wa Ngô Thanh Danh, Bí thư N’gor ủy Dak Nông an lah nău rƀŏng têh lơn tâm ban đah nău ƀư an dŭt n’hâm lơn, an geh ăp nău kơl na nê̆, ngăch n’hanh têh dăng ntrôl hao jêng wăng sa. Ăp gưl, ăp nău kan an ntrôl dăng ăp nău kơl wăch rgum, rgâl ntrŭk ntô tăch rgâl, nkre n’hao săk geh pah kan n’hanh săk rnglăy dŏng tơm prăk. Ndrel đah dôh rklaih ăp jêr jŏt, wăk kol gay mbơh ƀư ăp nău nău nchrăp ƀư rrng, nkret njêng bô-xít-alumin-nhôm ri an uănh khlay pă chrai prăk ntuh kơl nsum, mbơh ƀư ăp nău nchrăp, ndơ ƀư khlay gay ƀư nuih n’hâm an wăng sa hun hao. Wa Ngô Thanh Danh, nkoch kloh:

Moh ndơh dơh ri ƀư, ntŭk wăk kol ri an bah kơi, ntŭk mô wăk kol ri djăt tĭng nău ntrŭnh bah Luật ma ƀư, mô di an kâp lĕ lam n’gor jêh nĕ mư ƀư, rnôk nĕ lĕ mbrơi ngăn hôm. UBND n’gor ntĭm rđău dŭt n’hâm ăp nău kan nkân jŏ năm, ntĭm kloh moh n’gâng kan nău kan, moh ntŭk n’hanh kon nuĭh na nê̆, ƀư kloh lĕ đah nău kan. Lah rgum tâm ăp nău ƀư khlay, ăp ngih măy ƀô-xít an lăp dŏng rti mbra dơi geh săk rnglăy năm 2025.

Pah kan ta n’gor Dak Nông, Ủy viên Bộ Chính trị, Groi Thủ tướng rnâng kan Chính phủ Nguyễn Hòa Bình mĭn lah, Trung ương hăn ndrel mro đah ăp ntŭk gay dơi geh nău rƀŏng hao lĕ n’gluh an. Đah Dak Nông, Chính phủ dôl tĭng gưl dôh rklaih ăp jêr jŏt, wăk kol ntoh lư kơt nău geh tât dăp rgum bô xít, ŭnh nar nkra njêng. Groi Thủ tướng lah n’gor ndâk ƀư trong hao jêng an tâm rwăch 4 gưl têh ma Đại hội Đảng bộ n’gor lĕ n’gluh an geh: bô xít, ŭnh nar nkra njêng, pâl nđaih n’hanh lŏ mir. Groi Thủ thướng dŭt uănh Dak Nông rnôk mbơh ƀư ăp nău nchrăp ƀư bô xít, dêr nău săch vĭ nuĭh ntuh kơl mbra jêng tât khuch jêr njrăng.

Bô xít ri dôl lah “uĕh ngăn” ta aơ, jêng dŭt ŭch săch nuĭh ntuh kơl an di, geh tơm prăk kaih, geh nău blău ơm, nău dơi mât uănh ƀĭt joet, geh rmôt way kan mpeh nău aơ. Săch nuĭh ntuh kơl ƀô xít mô di lah ƀư djơh trong kan têh hun hao bah n’gor.