Kêng măng 02/10, Bôk nău kan “N’har bri – măng bŏng khay” tă bah Ban Chỉ huy Tahen n’har bri n’gor Lâm Đồng kan nsum đah n’gâng kan ta ntŭk n’hanh ăp nuĭh lŏng nuih  n’hâm ƀư ta Nhih nti Mầm non Hòa Bình, Bon Sa Pa, Bu Dak, xã Thuận An, n’gor Lâm Đồng.

Bôk nău kan lah dŭt geh nkô̆ khlay, mpơl nău uănh khlay jru bah Ban Chỉ huy tahen n’har bri n’gor; gưl ủy, n’gâng kan, ăp nsum  mpôl ta ntŭk n’hanh ăp nuĭh lŏng nuih n’hâm đah pah kan mât chăm, ntĭm nti kon se, lơn lah ăp kon se ta nkual n’har bri, ntơm bah nê geh tay suan ntrôl gay kơt nti, tiăr nti n’hanh nsrôih jêng ăp nuĭh ƀon lan uĕh an nău rêh. Ta măng ƀư, Ban Chỉ huy tahen n’har bri Lâm Đồng, n’gâng kan ta ntŭk n’hanh ăp nuĭh lŏng nuih n’hâm hŏ pă an 450 nklâm ndơ rnoh khlay nklăp 200 rkeh prăk.

Hội đoàn thể ta Dak Lak lĕ nsrôih rgŏ jă tơm prăk gay ƀư nău pâl rlưn, an ndơ an hang rbăn kon se ach o, kon se koet nte tâm n’gor, kơl ăp oh saơ lĕ nău răm tâm yan bŏng khay. Đah bôk nău “N’gŭr răm bâr gơm-tâm pă nău yô̆ rŏng” yor jrô Trung câp lý luận chính trị A55A, Ngih samƀŭt Chính trị n’gor Dak Lak ƀư, lĕ an 210 nklâm ndơ an kon hŏk ngih samƀŭt. Ta xă Ea Mdroh, 300 nklâm ndơ lĕ dơi an kon se ƀon căn cứ tă bah bôk nău Lồng đèn mpoh ang nău ŭch. Hôm ta ƀon Cư Kŏ Êmông, Đoàn druh ndăm xă Dang Kang tâm rgop ndrel ăp câu lạc bộ thiện nguyện ƀư njrô lân, gâm bún riêu, kreh sŏk an dơm n’hanh an kho ao, ndơ dŏng nti, ndơ trung thu an bơi 700 kon kon se jêt bah 2 ƀon Cư Păm n’hanh Cư Kŏ Êmông. Ăp nklâm ndơ aơ lĕ kơl kon se jêr jŏt, geh nău rêh dŭt jêr ta Dak Lak dơi saơ mông nar yô̆ rŏng n’hanh tâm pă yan Trung thu năm aơ.