Kêng măng (9/10), ta Ngih Chính phủ, Thủ tướng Phạm Minh Chính ƀư tơm Rƀŭn nchră mâp măt ntoh măt doanh nghiệp di Nar Doanh nhân Việt Nam (13/10). Ntoh ngơi ta rƀŭn nchră, Thủ tướng Phạm Minh Chính lah uĕh ăp doanh nhân hăn ndrel mro đah neh dak, nuĭh ƀon lan tâm rnôk geh khuch khat yor trôk nar lơh, phŭt dak lip.

Lah rjăp năm 2025 lah năm n’glêh dŭt bah năm kan, lah năm geh âk nău rgâl têh bah neh dak, rnoi nuĭh rnôk ƀư tĭng rơh cách mạng mpeh trong kan dăp, rdâk ƀư, đêt dơh tŏng ăp n’gâng kan ngih dak; rgâl n’har neh hành chính gưl n’gor n’hanh ƀư tĭng ntrong ƀư n’gâng kan ƀon lan 2 gưl, rgâl nău ngăn bah trong hành chính jâk mpeh mât uănh an nkra hun hao n’hanh nchrăp lor rhŏ an nuĭh ƀon lan, doanh nghiệp... Thủ tướng mpŏng ŭch nsum mpôl doanh nghiệp ndrel ƀư jâng nsan mhe, nuĭh n’hâm mhe, rgop ndrel lam dak lăp rach năm mhe hun hao têh ndrŏng, gĭt blău mhe, uĕh lăng.