Aƀaơ du nar, Nkual pâl nđaih Bàu Trắng U n’hanh ME, xă Hòa Thắng, n’gor Lâm Đồng wơt bah 3.000 tât 4.000 nuĭh năch tât uănh nsong, chŭp rup n’hanh ƀư ngăn pâl rlưn ta nkual neh choih nglang têh rlău 2ha. Wa Nguyễn Văn Hùng-Giám đốc ƀĭt joet Nkual pâl nđaih an gĭt, bah rnôk nglăp nsum tât aƀaơ, rnoh năch hao nklăp 20% n’hanh mbra lơ hao âk rnôk boăt nthoi na nao bah nkual dak lêng choih hăn nkual nkao Đà Lat:

Bah rnôk nglăp nsum n’gor tât aƀaơ geh nău tâm rgop đah bri, dak lêng n’hanh nkual choih nĕ lah du rkum dŭt têh gay he dơi tâm rgop ăp nău rhŏ tâm n’gor. Ŭch ngăn lah nău tâm rgop ntung trong gay bu năch dơh ngăn bah dak lêng hăn rbăn nkao n’hanh bah rbăn nkao jŭr dak lêng. N’hêl na nê̆ ngăn ma công ty lĕ rƀŏng tât lah nău tâm rgop đah ăp ntŭk pâl nđaih, lơn lah ntŭk kan lữ hành ndâk njêng ăp bôk nău kan kơl an na nao rnôk tât Đà Lạt jŭr tât dak lêng.

Lam n’gor aƀaơ geh rlău 4.200 ntŭk rlu rlău, bơi 1.400 khách sạn bah 1 tât 5 sao, tŏng dơi wơt 48 rkeh năch du năm. Êng tâm năm 2025, n’gor geh nău rƀŏng wăch rgum 23 rkeh năch pâl nđaih. Tĭng Tiến sỹ Phan Bảo Giang, Groi Hiệu trưởng nkre ƀư Trưởng khoa Marketing ngih samƀŭt Đại học Tài chính Nkual ƀon têh Hồ Chí Minh, lvang 2025-2030, rnôk trong rgâl ăp nău geh, ăp ntŭk ntô, nkre tâm rgop đah ăp ntŭk tăch, pâl nđaih Lâm Đồng mbra lah n’gâng tơm wăng sa ngăn ngên.

He an ƀư rup ndah nchăm ntŭk gŭ bu năch an tĭng ntŭk trong bah pâl nđaih n’gor Lâm Đồng mhe. He dơi saơ ăp du ntŭk bah n’gor Dak Nông, Lâm Đồng, an tât Bình Thuận ơm ri geh ăp style êng êng tâm du nău kan têh kơt aơ he geh nău ndrel nuih, ndrel soan ri gâp gĭt ăp jêr jŏt mbra rlet rlău.

Tĭng dự thảo nghị quyết mbơh an Đại hội Đảng bộ n’gor Lâm Đồng rơh bôk năp năm kan 2025-2030, Pâl nđaih lah ngoăy tâm 3 n’gâng tơm wăng sa khlay bah n’gor, bah meng nĕ lŏ mir công nghệ mhe n’hanh công nghiệp-ndâk njêng mhe. Tâm rnôk tâm rlong nar lơ hô, Lâm Đồng uănh khlay ndâk njêng ndơ pâl nđaih ntĭt mpơl, ntrôl dăng kơt dŏng công nghệ mrô tâm mpla nsơ n’hanh mât uănh, nkre n’hao kan ndrel nsum-êng gay wăch rgum ntuh kơl, hun hao nâp nâl nău kan công nghiệp mô nsuk mhŭl. Wa Nguyễn Văn Lộc, Giám đốc N’gâng kan Văn hóa, Thể thao n’hanh Pâl nđaih n’gor Lâm Đồng an lah, nkô̆ nău khlay ngăn lah nău hăn ndrel bah doanh nghiệp. Lah ƀư pâl nđaih ma mô geh doanh nghiệp ri mbra mô dơi ƀư:

Du nkô̆ nău dŭt khlay nĕ lah nău hăn ndrel bah doanh nghiệp. Lah ƀư pâl nđaih ma mô geh nău hăn ndrel bah doanh nghiệp  lah mô dơi ƀư. Nău kan văn hóa, thể thao n’hanh pâl nđaih mpôl hên ton mbra hăn ndrel đah doanh nghiệp gay he ndrel hăn hao. Ăp doanh nghiệp ntop kơl n’gor tâm nău ndâk ƀư, uănh rup ndah bah du pâl nđaih Lâm Đồng mhe.

Rƀŏng tât nău ŭch hun hao pâl nđaih uĕh nâp âk, n’gor Lâm Đồng dôl rgum ntuh kơl, ndâk njêng ăp nkual pâl nđaih têh lam dak n’hanh lam ntŭr neh kơt n’glău Tuyền Lâm, Mũi Né, Tà Đùng, hăn ndrel đah ăp ndơ pâl nđaih ntĭt mpơl êng: pâl nđaih sinh thái, rlu rlău, thể thao hưt nuih, pâl nđaih lŏ mir, chĭng gông, mât chăm săk soan n’hanh ƀư ngăn văn hóa ta ntŭk. Wa Hồ Văn Mười, Groi Bí thư n’gor ủy, Kruanh UBND n’gor Lâm Đồng, an gĭt Lâm Đồng jêng ntŭk pâl nđaih uĕh nâp âk, nău khlay lah an kuăl joi nău geh têh bah lĕ 3 nkual: “Rbăn nkao, rbăn bri dak n’hanh dak lêng pŭt”:

Nău dơh he dŭt têh pơk hvi trong uănh luh. Nău ƀư mhe khlay, rgâl hao, mĭn ƀư mhe. Nkual bri dak têh, nkual dak lêng pŭt n’hanh rbăn nkao kơt 3 jâng ŭnh năk, dŭt lah nâp yơn 3 jâng aơ mô hŏ tâm ban. Gay ma rnoh năch geh, rlet rlău rnoh an ƀư bah nơm lah đăp mpăn rnă njrăng. Đăp mpăn mpeh trong hăn nsong, jêh nĕ đăp mpăn săk soan đăp mpăn an năch năch pâl nđaih. Du hê nuĭh ƀon lan lah du hê nuĭh ntĭm pâl nđaih. Ăp ntŭk pâl nđaih na nao geh bâr gơm, na nao geh nău ŭch năch jêng văn hóa.

Đah trong uănh têh, nău nsrôih bah n’gâng kan ƀon lan, nău hăn ndrel bah doanh nghiệp n’hanh nuĭh ƀon lan, Lâm Đồng dôl ntơm ƀư rgâl mpŏng ŭch jêng ntŭk pâl nđaih uĕh nâp, geh nău ƀư tơm khlay hao jêng wăng sa-rêh jêng an lĕ nkual Tây Nguyên n’hanh neh dak. Pâl nđaih Lâm Đồng-bah nău geh tât ƀư rgâl mpŏng ŭch hun hao dôl tâm ăp njoat hăn mhe bah du trong hăn mhe./.