Ăp nău tât duh jêr, tâm lơh tâm su ta nkual Trung Đông mhe aơ dôl khuch tât jâng wăng sa lam ntŭr neh, lơn lah ntŭk tăch rgâl pring, nchuăn rdeng dak lêng n’hanh tơm ndơ tăch lam ntŭr neh. Tâm rnôk nê, ăp jâng wăng sa geh rnoh pơk hvi geh tât nău mpet ngăn. Đah Khánh Hòa, ntŭk săk geh mpeh wăng sa dak lêng, pâl nđaih n’hanh tăch n’gluh ndơ̆ luh âk ntul rlong đah nău kan ƀư njêng, tăch rgâl n’hanh rnoh tât hun hao bah n’gor tâm năm 2026 đŏng.

Tâm lơh ta Trung Đông ƀư rnoh khlay pring xăng n’hanh prăk dŏng logistics hao tay. Nkre prăk nkra njêng bah doanh nghiệp hao. Geh tăch proăt du đêt trong nchoăn rdêng trong dak lêng lam ntŭr neh dơi khuch tât nău ƀư nglăp rwăt, khuch na nê̆ tât ăp nău kan wăng sa khlay bah Khánh Hòa kơt ƀư tàu, nkret njêng tui ka, nchoăn rdêng trong dak lêng n’hanh pâl nđaih-nău rhŏ. Ta năp nău rgâl bah ntŭk tăch lam ntŭr neh, âk doanh nghiệp tâm n’gor dôl nchrăp ƀư tâm di, tâm rgop âk ntil ntŭk tăch n’hanh n’hao khlay ndơ. Wa Trịnh Thị Hồng Vân, Bí thư Đảng ủy, Kruanh HĐTV Công Công ty TNHH MTV Yến sào Khánh Hòa an gĭt, doanh nghiệp dôl ntrôl dăng n’hŭch prăk dŏng ta n’gul, pơk hvi tăch tâm dak n’hanh ăp ntŭk tăch têh.

Rlău ma tăch n’gluh yến rsoăn, mpôl hên mbra n’hao hun hao ăp ndơ jêh nkret njêng, tă bah nĕ n’hao khlay an n’gor, an doanh nghiệp. Mpôl hên mbra tâm rgop ăp Tập đoàn têh đah Trung Quốc gay hun hao.

Tĭng wa Nguyễn Sanh Đương, Groi Giám đốc N’gâng kan Công thương Khánh Hòa, roh đăp mpăn ta Trung Đông dôl khuch tât nău kan nkra njêng, tăch rgâl bah âk doanh nghiệp tâm n’gor. Aƀaơ prăk geh tăch n’gluh bah Khánh Hòa an nkual aơ geh nklăp 210 rkeh đôlar, geh bơi 10% dĭng lĕ prăk tăch n’gluh, tâm rnôk  nglăp rwăt nklăp 1o rkeh đôlar. Rnoh pring xăng hao ƀư ăp nău kan têh kơt ƀư tàu, nkret njêng tui ka, pâl nđaih-nău rhŏ geh jêr yor prăk nkra njêng n’hanh nchoăn rdêng hao. Ta năp nu nău aơ, nău kan công thương dôl tâm rgop Ban mât uănh nkual wăng sa n’hanh nkual công nghiệp n’gor Khánh Hòa ntop kơl doanh nghiệp dôh rklaih jêr jŏt, ntrôl ăp nău nchrăp ƀư ŭnh nar n’hanh công nghiệp gay ntop tay hao jêng. Wa Nguyễn Sanh Đương an gĭt:

Gay ntop tay, nău kan rgum ntop kơl nuĭh ntuh kơl. Lơn lah đah 2 nău nchrăp ƀư điện măt nar Phước Thái 2, Phước Thái 3, nsrôih pơk dŏng tâm khay 3, rgŏ jă nău khlay điện tăch điện. Nkre, tâm rgop ăp n’gâng kan, nău kan ntop kơl ăp nuĭh ntuh kơl công nghiệp, mkra jêr jŏt, ntrôl ngăch ndâk ƀư.

Ăp nău rgâl bah wăng sa lam ntŭr neh an saơ nău khlay bah nău hun hao wăng sa dak lêng n’hanh trong logistics mhe. Đah nău geh ndrâm dak jru, lơn lah Vân Phong, Khánh Hòa dôl ntơm ƀư tơm khlay ntŭk rdêng ndơ trong dak lêng n’hanh logisticss bah nkual Nam Trung Bộ. Rnôk trong pă ndơ lam ntŭr neh ndâk nkra tay, nău ntuh kơl rĭng ntung trong ndrâm dak lêng, nkual công nghiệp n’hanh nău rhŏ logistics mbra kơl n’gor n’hao dơi tâm di ta năp ăp nău rgâl bah dih. Wa Nguyễn Thanh Hà, Groi Kruanh UBND n’gor Khánh Hòa an gĭt, gay mât nău rƀŏng hao jêng 2 rnoh mrô, n’gor dôl kơp uănh rnoh an ƀư, dôh rklaih jêr jŏt an doanh nghiệp n’hanh ntrôl ngăch ăp nău nchrăp ƀư khlay.

Nuih n’hâm tơm hao jêng năm 2026 lah ntuh kơl nsum. Mpôl hên an uănh nđôi, tâm pă prăk, an prăk ntuh kơl nsum ntơm bah bôk năm. Aơ lah nău dŭt n’hâm khlay, ntrŭnh an nău rƀŏng hao jêng 2 rnoh mrô bah Khánh Hòa tâm năm aơ. Aƀaơ geh rlău 4.000 rmen prăk an jêh tâm pă na nê̆.

Tâm 2 khay bôk năm 2026, n’gor Khánh Hòa hôm e mât hao jêng uĕh. Sŏk an tơm prăk geh rlău 11.600 rmen prăk, tâm ban nklăp 30% nchrăp trok an Trung ương jao n’hanh hao 1,7 tơ̆ nkôp đah ndrel rơh. Tâm rnôk wăng sa lam ntŭr neh hôm e âk nău mbơh roh đăp mpăn, nău nchrăp lor ƀĭt joet, rgop âk ntil ntŭk tăch n’hanh mât uĕh tay nău geh wăng sa dak lêng lah trong mkra gay Khánh Hòa dơi mât nâp trong hun hao, geh n’gâng tơm ƀư tĭng nău rƀŏng hao jêng nâp nâl tâm năm 2026 n’hanh ăp năm bah năp tay.