Tâm Thôn Bàu Trúc, xã Ninh Phước, ntŭk geh rlau 95% rnoh nŭih lah rnoi chăm, nau kan nkoch mbơh tât nar săch kan geh ƀư tât ăp rnăk ƀon lan. Nŭih bu rnơm tâm thôn kơt wa Đàng Chí Quyết hăn tât ăp rnăk ƀon lan gay ma bonh đă kônh wa hăn nklăch phiếu. wa kŏ ntĭm mbơh cử tri uănh kloh tât nau rêh, bôk nau kan bah ăp nŭihj ân geh săch bah trong mbơh nau tơm ngăn bah năp ma geh ân săch. Wa Đàng Chí Quyết, mbơh:

            “Lah nŭih tâm kuăl ri ma gâp gĭt nau vay, nau kan ơm bah kônh wa. Ndri ma gâp hăn tât ăp rnăk vâl, goh ăp mpông ngih gay ma bonh đă, ngăn lah mâp ăp nŭih tơm tâm rnăk vâl, rđau kruanh ăp mpôl chroh ndrel kruanh rnoi nơm. Bah nê khân păng nkoch mbơh tay ân ƀon lan, kon sau nơm mpeh mông nar, ntŭk ƀư kan kŏ kơt lah nau ntrŭnh gay ma săch, gay kônh wa geh blau dơi săch luh ăp nŭih ntoh măt geh nau blau, nau gĭt, ntoh nau ân nau ŭch ndrel nau mĭn kan bah ƀon lan”.

            Ndrel naum ma kônh wa rnoi Chăm, rnôk aơ ăp nkuăl gôl yôk bah Khánh Hoà kŏ ntrŭt dăng nau nkoch trêng, bonh đă cử tri râng nar săch kan, tâm xã Trung khánh Vĩnh, âk nau kan nkoch trêng geh ƀư tâm di ma nau dơi bah nkuăl rnoi mpôl đê̆. Uỷ ban săch kan bah xãtam rgop ma bu ranh ƀon, kruanh ƀon gay nkoch mbơh Luật săch kan đah nau ngơi Raglai, nkre ntĭm mbơh ƀon lan uănh kloh rnoh moh săk ndrel bôk nau kan bah ăp nŭih ân geh săch ƀư nau kan. Âk nau tât ntoh mhô kŏ geh mbơh luh gay ma ăp rmôt kan dơi geh nchiăr nau blau ndrel rklaih nau tât ngăn.  Wa Cao Thị ngọc Thanh, Kruanh UBND xã Trung Khánh Vĩnh, mbơh:

‘Phung hên ƀư nar rƀŭn văn hoá, njroh mprư, tur chĭng gong gay ma rgum âk mpưm kônh wa tât râng, bah nê nơm tâm rgop ma nkoch trêng tât nau khlay bah nar săch kan. Bah ăp nau kan aơ, nŭih ƀon lan gĭt lah săch nŭih pah kan mô êng lah nau kan bah nơm ma hôm lah nar rgum âk mpưm ƀon lan đŏng”.

            Ăp nau kan ngăch, blau mhe tâm Khánh Hoà hŏ kơl an ƀon lan nchrăp tâm nau joi gĭt bôk nau kan, nkah săch ăp nŭih ntoh măt ntoh lư gĭt tât nau blau ndrel nau dăng kan. Mô êng rƀong tât nar săch kan têh rêng tă bah gôl yôk tât ăp ƀon meng pĭt dak lêng Khánh Hoà ma ăp nŭih kŏ nchrăp ueh ân nar rgum rƀŭn têh bah lam ƀon lan./.