Nar ntri (1/4) ta Hà Nội, Kruanh dak Lương Cường ƀư tơm rơh hop giao ban pah kan tât leh đah Văn phòng Kruanh dak gay uănh năl nô nău tĭng ƀư nău kan tâm bah ri aơ, an ƀư trong rƀŏng pah kan let năp tay. Kruanh rđău kan Văn phòng Kruanh dak an gĭt, tâm khay 3, ta nâm nău rđău đă grêt dăch bah Kruanh dak n’hanh Groi kruanh dak, Văn phòng hŏ lor nchrăp, an ƀư lam lĕ rngôch ăp nău kan, rhŏ dŏng geh nău tam nău kan bah kruanh rđău kan Ngih dak ta ăp trong kan.

Lah n’glôch jêh rơh hop, Kruanh dak Lương Cường nchih nkah ăp nău dơi ma Văn phòng Kruanh dak hŏ dơi ƀư tâm bah ri aơ nơh, lah rjăp Văn phòng hŏ ntik n’hao nuih n’hâm dơn kan, lor nchrăp, ngăch ngăr, rgop khlay tâm nău tĭng ƀư nău kan nsum bah kruanh rđău kan Ngih dak. Nkoch mpeh nău dơn kan tâm let năp tay, Kruanh dak đă Văn phòng n’hao săk tam pah kan gŭ mĭn, nsŏng kơl, rgum nchih; lor nchrăp uĕh nkô̆, siƀŭt rhŏ dŏng ăp rơh hop bah kruanh rđău kan n’gâng tơm, Bộ Chính trị, Ban Bí thư n’hanh ăp nău kan tĭng trong pah kan.