Gay nchrăp uĕh ngăn an nar săch đại biểu Quốc hội khóa 16 n’hanh đại biểu Hội đồng nhân dân ăp gưl năm kan 2026-2031 ƀư tâm nar 15/3 tât aơ tay, ôi 12/3, ta Ngih Quốc hội, Kruanh Quốc hội Trần Thanh Mẫn, Kruanh Hội đồng Săch Ngih dak lĕ ƀư tơm Rơh rƀŭn đah ăp tiểu ban bah Hội đồng săch Ngih dak. Tĭng nĕ, aƀaơ, lam dak geh bơi 79 rkeh nuĭh ƀon lan, ta rlău 72 rbăn nkual nklăch phiếu, đah trong ƀư săch dơi nchrăp tŏng ăp bah Trung ương tât bah dâng.

Ntoh ngơi ta rơh pah kan, Kruanh Quốc hội Trần Thanh Mẫn an gĭt, Kruanh Quốc hội đă an đăp mpăn rnă njrăng lĕ rngôch, đăp mpăn an rơh săch. Ăp ngih pah kan dơi kan nchrăp lor gĭt rjăp nu nău, n’hao ăp trong đăp mpăn rnă njrăng chính trị, đăp mpăn ta ăp ntŭk săch, ngăch saơ n’hanh rmal ăp nău ntoh mhe; uănh khlay njrăng n’gang ăp nău tih, nsŭk nsôr tâm mạng, mô an ăp nuĭh rlăng rlăm săch gay ƀư roh đăp mpăn; ăp nkual nklăch phiếu an đăp mpăn, dơh gay ƀon lan ƀư nău dơi n’hanh nău kan bah nơm. Tâm nar săch lơ 15/3, an mât trong mbơh ngăch, năn, di na nê̆ gay mbơh an Bộ Chính trị, Ban Bí thư n’hanh ăp ngih pah kan dơi mkra; ăp tiểu ban bah Hội đồng săch Ngih dak an nchrăp tŏng ăp trong mkra ăp nu nău dơi geh tâm Nar săch.