Kêng măng 23/3, Groi kruanh UBND n’gor Lâm Đồng Nguyễn Hồng Hải pah kan đah ăp n’gâng kan tâm n’gor, n’gâng kan tâm dâng n’hanh nuĭh tơm ntuh kơl mpeh rnoh ngăch nchrăp ƀư Nkual công nghiệp Tân Đức ta xã Tân Minh, rnoh hvi sŏk mplơ̆ rlău 300 héc ta.

Tât aƀaơ, Công ty Cổ phần Sonadezi Bình Thuận hŏ wat jêh ăp ndơ ntrŭp ƀư rơh bôk năp, rdâk njêng tay ntŭk ntô ndơ dŏng kỹ thuật kơt ntung trong n’hanh nhih máy n’hoch dak djơh, đah lĕ rngôch tơm prăk ntuh kơl bơi 980/1.200 rmen prăk. Nkual công nghiệp hŏ wăch rgum 7 trong nchrăp, lĕ rngôch tơm prăk đăng ký 725 rmen prăk. N’glôch jêh rơh hop, Kruanh rđău kan UBND n’gor đă ăp nhih pah kan rgum droh rklaih wăk kol, ntrôl ngăch ƀư, lơn lah ndăn ƀư wat jêh lĕ rngôch siƀŭt sŏk mplơ̆ neh, rdâk njêng rnoh khlay neh na nê̆ n’hanh an ƀư ăp njuat geh tât tơm neh ntrơn du tât ntŭk gŭ mhe, nta trong dơh an trong nchrăp kan ơm ntik n’hao săk tam.