Ndrel ma lam dak, Lâm Đồng dôl ndal ƀư ân jêh ăp nau nchrăp, đăp mpăn nar săch kan ntoh măt Quốc hội gưl XVI ndrel ntoh măt HĐND ăp gưl năm kan 2026-2031 geh đăp mpăn, tâm di nau ntrŭnh, ngăn ngên lah nar rgum bah lam ƀon lan.

Jêh rnôk tâm rnglăp ma n’gor Lâm Đồng, Bình Thuận ndrel Dak Nông, n’gor Lâm Đồng mhe geh rnoh hvi 24 rbăn km2, têh ngăn tâm lam dak, đah bơi tât 4 rkeh nŭih. Lam n’gor geh rlau 2,7 rkeh cử tri. N’gor Lâm Đồng geh 6 rmôt săch kan ntoh măt Quốc hội (săch luh 17 ntoh măt) ndrel 38 rmôt ƀư nau kan săch ntoh măt HĐND n’gor (săch bơi tât 85 ntoh măt).

Tâm gưl xã geh 1.004 rmôt săch, 2.301 ntŭk nklăch phiếu gay săch 2.949 nŭih ntoh măt. Tât rnôk aơ n’gor ƀư jêh nau lir moh săk cử tri, rnoh nŭih geh săch ndrel nchrăp tŏng ăp nau dơi gay săch. Hội đồng săch kan neh dak kŏ tâm ban ân n’gor Lâm Đồng ƀư nklăch phiếu ơm tâm 5 ntŭk tâm lơ 14/3, tâm rmôt tahen Biên phòng gŭ kan tâm xã Hàm Tân, Thuận Hạnh, Thuận An (2 nkuăl) ndrel xã Dak Wil./.