UBND n’gor Lâm Đồng hŏ ntrŭnh nau nchrăp pă dŏng tơm prăk ntuh kơl nsum năm 2026, nkô̆ nau nsôih ƀư nau pă dŏng tơm prăk 100% nau nchrăp geh jao, rgop nau đăp mpăn hun hao “2 rnoh mrô”. N’gor kŏ ndŏ nkô̆ nau pă tơm prăk tĭng 3 khay. Gay ƀư dơi nau aơ, UBND n’gor Lâm Đồng đă ăp ntŭk kan, rnâng kan, n’gor ndrel tơm ntuh kơl n’hao nau mât nâp, ƀư nâp tâm nau ntuh kơl nsum, năl kloh gay ma der nau kan ân nŭih dâk bôk ndrel cán bộ uănh ăp bôk nau kan, nau ƀư n’hêl.

UBND n’gor Lâm Đồng jao ân Sở Nội vụ ƀư tơm, tâm rgop ma ăp rmôt kan geh tât gay n’hao nau kan mêt uănh đah ăp ntŭk kan, rmôt kan, n’gor tâm nau ƀư nau kan pă tơm prăk ntuh kơl nsum, mbơh nchră, rklaih rjăp ăp nau tih, mô jêh lôch nau kan. Nkre lah, mĭn, kơl mbơh nchră UBND n’gor nsing tâm nau tă geh dơi bah nau pă tơm prăk dŏng nsum gay ƀư nau nchâp, nau dơi gay uănh năl, klaih mhal, đă ntop pă ƀư nau kan cán bộ tâm rơh tât. Năm 2026 rnoh tơm prăk ntuh kơl bah Lâm Đồng lah rlau 20 rbăn rrmen. Tât dŭt khay 4, n’gor Lâm Đồng mơ geh ƀư dơi rlau 875 rmen, ê geh tât 10% nau nchrăp./.