Jrâu rƀŭn mrô 2 bah Ngih dak si Đa khoa nkuăl Tây Nguyên tâm ăp nar aơ dôl ma ntor chăng n’ha cờ. Aơ lah ntŭk nklăch phiếu mrô 44 tâm Uỷ ban săch kan Phường Buôn Ma Thuột, n’gor Dak Lak. Nai dak si Nguyễn Ngọc Thịnh, Groi Giám đốc Ngih dak si, Kruanh rmôt ƀư săch kan tâm Ngih dak si mbơh, tât rnôk aơ, ăp nau kan ân nar săch kan hŏ geh ƀư ueh:

            “Dĭng lĕ nŭih kan tâm ngih dak si phung hên hŏ geh ndơn thẻ cử tri. Tâm ngih dak si geh du nau êng ngăn nê lah geh nŭih săm ji ndrel nŭih băl mpôl dôl gŭ răk, ndri ma Tổ bầu cử bah ngih dak si mra pă 2 đồng chí ƀư nau kan leo hòm phiếu hăn, leo tât ăp jrâu bĭch săm bah ngih dak si gay ăp nŭih cử tri dôl săm ta aơ, mô dơi dâk hăn ri mra dơi geh nklăch phiếu tâm nsưng nơm nkre”.

            Điều dưỡng Nguyễn Thị Cẩm Vân mbơh: Aơ lah rơh tal 3 yuh râng nar săch kan nkre tâm ngih dak si. Bol ma nau mât chăm nŭih ji mô ru ngăn, yơn ndăn mông rlu, yuh tât ntŭk lir moh săk cử tri ndrel nau geh nkoch bah ăp nŭih gay ma gĭt nu nau tay. Yuh ŭch săch luh ăp nŭih tŏng nau dơi, tŏng nau uehgay ma njoăl nau mĭn, nau ŭch bah nơm:

            “Gâp ŭch săch ăp nŭih geh nau blau, geh nau dơi, lah ntung nthoi đah ntŭk kan dak si ma Đảng, Ngih dak. Ăp đồng chí nê mra ntoh măt ân nau ŭch bah nê, nkre nau ngơi bah hên bah ăp nŭih nê mra tât ma Đảng, Ngih dak gay geh kơl an âk lơn, ntuh kơl ngih vâl nau kan ân ngih dak si ueh lơn gay răk chăm ân n’hâm soan ƀon lan bah n’gor Dak lak ueh lơn”.

            Ngih dak si Đa khoa nkuăl Tây Nguyên geh nau dăng 1.200 nsưng săm ndrel rlau 1.250 cán bộ, nai si, nŭih pah kan. Tâm nar săch ôi taơ, cử tri lah cán bộ, nŭih kan ndrel âk rbăn nŭih ji dôl săm ndrel nŭih rnăk vâl dôl răk nŭih ji dôl gŭ, săm tâm ngih dak si mra geh râng nklăch phiếu tâm ntŭk săhc mrô 44, tâm Uỷ ban săch kan phường Buôn ma Thuột, n’gor Dak Lak. Đah nau nchrăp ueh, nau săch kan tâm ntŭk sach ‘mha êng” aơ mra geh nau dơi ueh, đăp mpăn, tâm di nau ntrŭnh./.