Tât bôk ƀon Canh Tiến, xă Cam Vinh, n’gor Gia Lai, nteh kon se n’gŭr răm bah ntŭk ngih samƀŭt mầm non lĕ n’glôh nteh lam yôk bri. Tâm jrô nti jêt geh 32 kon hŏk, ăp oh ŭch njroh tĭng nteh nhạc pơk bah tivi mhe dơi rwăt. Nteh nhạc, nteh gơm kon se lăp ndrel, jêng geh du nkual răm m’ak. Oh Đinh Thị An, 8 năm deh, răm rhơn nkhoch:

Bah năp kon hăn nti ri mô geh điện, dăch aơ hăn nti geh điện, quạt n’hanh tivi, kon saơ nti nai ntĭm dŭt dơh wât, geh quạt trôk duh ri saơ dŭt nđik.

Geh 2 năm tĭng đah ntŭk ngih samƀŭt nkual jru Canh Tiến, nai Nguyễn Thị Mỹ Trinh, 28 năm deh, aƀaơ hôm e rhing rhưng, rhơn đah ăp nău rgâl. Yor knŭng tă aơ mô jŏ, ntŭk aơ hôm e mô tŏng dŭt n’hâm, uănh ca nhạc ta tivi thông minh lah nău ndrŏng ngăn. Săk nai Trinh, lôch 2 năm, ăp nar tât jrô tă lah ntŭl rlong na nao. Trong hăn 20km bah jay tât jrô nti yôk yang, mbĭr, yan mih hăn duk, hăn trong rwăch lĕ âk mông. Yơn aƀaơ, ăp nar tât ngih samƀŭt đah nai lah nar răm yor ntung trong lĕ dơh.

Rnôk geh trong mhe nai hăn dơh lơn, ngih wâl n’hanh ndoh ndơ dơi sơn tay, rnôk geh điện lĕ kơl nai n’hanh kon hŏk dơi uănh tivi, dơi mprơ n’hanh uănh ăp bôk nău uĕh lơn, kơl nai ntĭm uĕh lơn.

Mô knŭng ăp nai bah ntŭk êng tât, âk nuĭh têh đah jêr jŏt ach o bah Canh Tiến săch plơ̆ sĭt gay rgop soan rgâl ƀon tơm. Nai Đinh Thị Trang, 22 năm deh, mhe tốt nghiệp cao đẳng sư phạm lĕ ndơ̆ samƀŭt rhăch nău pah kan ta ƀon. Aƀaơ, jêh 2 khay pah kan, lah nai chủ nhiệm jrô 2C, ngih samƀŭt tiểu học Canh Tiến, nai Trang lĕ saơ na nê̆ nău rgâl săk, yor ăp ndơ ntĭm nti rlet rlău âk đah ăp năm bah năp.

Nkôp đah ăp năm bah năp ri năm aơ dơi uănh kơl bah UBND xă, lĕ pă an ngih samƀŭt ăp ndoh ndơ nti tŏng ăp an kon hŏk, kon hŏk geh nău rgâl n’hanh dơi gĭt tât ăp ndơ dŏng nti mhe lơn n’hanh ăp oh mô hôm rhing rhâng kơt rnôk bôk năp. Lah nai an yô̆ n’ach n’hanh leo an kon hŏk tĭng gưl n’hanh an âk mông nar gay uănh kơl ăp oh lơn, ntĭm na nê̆ lơn n’hanh groi ƀa ƀơ lơn gay bah nĕ ăp oh geh n’gu tơm gay nti ăp bài jêr lơn.

Kon hŏk răm, nai lơ răm lơn mpeh ăp nău rgâl ta ƀon tơm Canh Tiến, xă Canh Vinh, n’gor Gia Lai. Yơn răm lơn lah mê̆ bơ̆ kon hŏk, yor ndơ pâl rlưn nti nsơm bah oh kon lĕ tŏng ăp, khân pơng dơi đăp mpăn pah kan nkra njêng. Yuh Đinh Thị Yến, geh kon nti ta ngih samƀŭt tiểu Học Canh Tiến, nkoch:

Nkôp đah bah năp đaơ ngih wâl ndoh ndơ saơ uĕh lơn, mpông pêr dơi n’gar n’hanh geh tivi, nai pơk an kon hŏk uănh ăp bôk nău ntuh djăt uănh âk đŏng. Saơ kon se nti nkôp đah bah năp kon djăt kăr uĕh.

Tĭng wa Dương Hiệp Hòa, Kruanh UBND xă Canh Tiến, ntŭk dơi ntuh kơl 300 rkeh prăk an 2 ntŭk ngih samƀŭt mầm non n’hanh tiểu học đah dĭng lĕ 5 jrô nti, kơl rgâl âk ndơ ntĭm n’hanh nti.

Đah nuih n’hâm rhŏ an nuĭh ƀon lan ăp nai tĭng jrô nti n’hanh geh bôk nău ntĭm nti tŏng ăp tĭng di nău ntrŭnh. Kon hŏk bah Canh Tiến dŭt rhơn, lơn lah năm nti mhe rlău ăp oh rơh bôk năp dơi saơ ntơm năm nti, bah năp đaơ khân pơng dŭt mô tŏng, nai tĭng nuih n’hâm nsrôih yor khân pơng dơi saơ kon hŏk mô tŏng jêng an ntop tay. Êp tât xă dăn đă pơk hvi tay gay nkra ngih wâl ndoh ndơ tŏng ăp an ăp oh kon hŏk gay dơi tŏng nău ŭch ntĭm n’hanh nti.

N’gul yôk bri lir lar, ăp jrô nti ang ŭnh ta Canh Tiến nar aơ mô knŭng lah nău răm bah kon se, ma hôm săk rnglăy bah ăp nău nsrôih mô rlu, bah nai, bah n’gâng kan ƀon lan n’hanh nsum mpôl. Canh Tiến kơt âk nkual jêr jŏt bah Gia Lai dôl dơi Ngih dak ntuh kơl tâm ban, tŏng ăp gay nglăp ndrel hun hao đah lam dak tâm rach năm mhe.