Dŭt kêng măng 16/3, Thủ tướng Phạm Minh Chính ƀư tơm nar rƀŭn Rnâng kan rđau kan Chính Phủ gay lŏ rgop nau mpeh ntrong mât đăp mpăn pă tăch ndrel đăp mpăn rnoh dak pring xăng.

            Thủ tướng Phạm Minh Chính rnê prêh ăp gưl kan, n’gâng kan, ntŭk kan geh tât năn ƀư ăp nau rđau đă bah Thủ tướng Chính phủ ndrel ƀư nau ntrŭnh kan mât đăp mpăn nau pă tăch, đăp mpăn rnoh dak pring xăng tâm rnôk nau tâm rkeh tâm Trung Đông geh tât jêr. Lah rjăp ngăn mô ân mô tŏng pring xăng tâm moh nau tât, Thủ tướng đă rgâl rnoh tăch xăng tĭng ntŭk tăch ndrel Ngih dak pă ƀư; ƀư ăp nau kan mât đăp mpăn rnoh ân tâm ban, tâm di, săk tam;

Đăp mpăn ndrel tâm ban nau dơi yor nau geh dơi đah Ngih dak, nŭih ƀon lan ndrel ntŭk ƀư nau kan tăch rgâl; mô ân têm, n’hao êng rnoh ndrel ndăn nau tât gay ma sa n’hao, ƀư mô ueh ntŭk kan tăch rgâl. Thủ tướng rđau đă ăp ntŭk kan, n’gâng kan geh tât, tâm nê geh Bộ Công an lăp ƀư nau kan mêt uănh ndrel rklaih mhal ăp nau tih lah geh.

            Thủ tướng kŏ đă kơp ndrel n’huch ăp ntil soay, prăk soay, prăk ndŏ nchăm geh tât nau kan dak pring xăng gay kơl an ntŭk kan tăch rgâl ndrel nŭih ƀon lan tâm rnôk aƀaơ hin, mbơh năp lơ 20/3. Tâm rnôk tât ngăn, lah nau kan tâm Trung Đông hôm tâm lơh jŏ jong, ân geh kơp, rgum nau mbơh ma ăp gưl geh nau dơi gay ma uănh, pă tơm prăk gay mât đăp mpăn pă tăch dak pring xăng./.