Đah nău ŭch hun hao bar mbrô tâm năm 2026, n’gor Lâm Đồng dôl rgum pơk hvi ntŭk hun hao, mât dŏng geh nău tam săk geh tĭng nkual, tĭng trong kan, rƀŏng tât trong ntĭt leo hun hao nsing ta khoa học công nghệ, rgâl blău ƀư mhe n’hanh wăng sa nđĭr uĕh. Tâm nkrum lam nê, dor yôk Di Linh dơi ntrŏng lah bôk hun hao mhe, mât nău khlay ƀư bôk tơm buăt nthoi n’hanh rêng lam suan hun hao.

Lôch n’glăp nsum đah Dak Nông n’hanh Bình Thuận, n’gor Lâm Đồng mhe jêng ntŭk hun hao tâm ntêng lêng dor yôk- trung du – bri dâng meng dak lêng, đah rnoh neh hvi rlău 24.000 km², dŭt têh lam dak. Ntŭk dja rgum âk ntil ndơ gŭ rêh n’hanh săk geh âk mpeh neh ntu, tơm ndơ gŭ rêh mpêt khlay, ŭnh nar sĭt jêng tay, wăng sa bri, wăng sa dak lêng n’hanh công nghệ mhe. Tâm trong tâm n’guăk hun hao mhe, dor yôk Di Linh gŭ nklang ntŭk têh khlay, njok bah sop nkue Bảo Lộc tât jâng sop Prenn, nthoi ăp nkual wăng sa khlay bah n’gor. Wa Bùi Hoàng Phương, Thứ trưởng Bộ Khoa học n’hanh Công nghệ, an lah, trong rƀŏng hun hao mhe hŏ ndơ̆ dor yôk Di Linh lăp tâm bôk hun hao mhe, găr ntil buăt nthoi:

“Dor yôk Di Linh gŭ ta ntŭk khlay tâm ntêng lêng đah Nkual Tây Nguyên n’hanh Duyên hải Nam Trung Bộ dơn ngai đah nkual ƀon têh Hồ Chí Minh nklăp 200km chroh dơh rlău ăp trong cao tốc Dầu Giây- Liên Khương n’hanh ndrel 2 tach ndeh păr, tach ndeh păr Liên Khương n’hanh let năp tay lah tach ndeh păr Phan Thiết kơl an Di Linh dơh tât đah ntŭk rgum wăng sa têh tâm dak. Nkre đah trong rvoal nklăp bar pe mông mpăr Di Linh he mbra dơi tât đah ăp thủ đô n’hanh ăp nkual ƀon têh têh bah châu Á”.

Ta rnoh prêh nklăp 1.000 mét rđĭl đah rnoh dak lêng, dor yôk Di Linh geh n’hâm sial nđik uĕh wăr năm rĭng duh 22,2 độ C, rnoh mih âk, neh bazan uĕh jêng. Ta aơ geh ăp mir cà phê, chè, dâu ndrŭng brai, tơm sa play dĭ hvi tât dŭt măt uănh… đah rnoh khlay neh mô rlu n’hao nơm geh tuch tăm ăp tŏng nău lư, tuch tăm wăch jêng tay, kloh uĕh. Ndrel đah păng rup yôk nor têh hvi lhêt lhơi, Dor yôk Di Linh tă lah ntŭk rgum têl kăl e – n’gâng kan tâm rnôk jêng n’gor Đồng Nai Thượng n’hanh n’gor Lâm Đồng. Wa Nguyễn Anh Dũng, Groi Vụ trưởng Vụ Giáo dục Đại học, Bộ Giáo dục n’hanh Đào tạo an lah, lah dơi rƀŏng trong tâm di, ta aơ mbra jêng ntŭk rlong ăp trong ntĭt leo ntĭm nti nkre đah rgâl blău ƀư mhe:

“Di Linh dôl hôm geh dŭt âk ntŭk soih hun hao ma mô hŏ geh pâng nduar kơt ăp trong leo kan ơm tă bah aơ lah jâng ntơm uĕh gay hun hao tâm let năp tay. Đah ntĭm nti ân geh nău tât đăt ndal đŏng, nê lah Ngih dak nta trong dơh, hôm mpôl doanh nghiệp ri mbra mô dơn êng lah ƀư mpeh doanh nghiệp ma hôm rgop na nê̆ mpeh nău gĭt blău n’hanh rgâl mhe đŏng.”

Năm 2025, rnoh têh âk wăng sa bah n’gor Lâm Đồng geh rlău 300.000 rmen prăk. Dăp rgum wăng sa rgâl uĕh, hŭch mbrơi rnoh âk tuch tăm êng du ntil, hao ngăch công nghiệp – rdâk njêng n’hanh rhŏ dŏng…Yơn lah, gay tât rnoh hun hao bar mbrô tâm năm 2026, n’gor Lâm Đồng ntrŏng ân rgâl dăng trong ntĭt leo hun hao nsing ta khoa học công nghệ, rgâl blău ƀư mhe, wăng sa kloh uĕh n’hanh wăng sa mbrô.

Ntơm bah ntŭk nsing bri dak uĕh jêng têh hvi, tâng jru văn hóa n’hanh nău nđơr rgâl mhe, Dor yôk Di Linh dôl dơi n’gor Lâm Đồng mpơl saơ săk gay hun hao ta rnoh prêh mhe. Wa Hồ Văn Mười, Ủy viên Trung ương Đảng, Kruanh UBND n’gor Lâm Đồng nkoch mpeh rnoh ndrel hăn bah n’gor gay rdâk njêng dor yôk Di Linh jêng ntŭk wăch rgum ndrel ăp rnoh khlay mpeh tuch tăm, bri dak, ŭnh nar n’hanh khoa học công nghệ tâm n’guăk hun hao lam lĕ rngôch bah n’gor:

“Gay nta trong dŭt uĕh an ăp doanh nghiệp tât đah dor yôk Di Linh ân ƀư dăp rgum nkrum lam lĕ rngôch n’gor Lâm Đồng khoa học, ăp tŏng rêng. Geh kơt nê doanh nghiệp mơ tât. Kruanh rđău kan n’gor Lâm Đồng way lĕ nuih n’hâm n’hanh ntrŏng doanh nghiệp lah ngoăy tâm ăp ndơ n’glêh an gay hun hao. Mpôl hên sŏk nău hun hao gay đăp mpăn nkre sŏk nău đăp mpăn gay hun hao”.

Tâm trong nchrăp hun hao rơh mhe, n’gor Lâm Đồng n’gluh rnoh tât rdâk njêng dor yôk Di Linh jêng ntŭk rgum gŭ mĭn, dŏng n’hanh ring lam công nghệ tâm trong kan tuch tăm công nghệ mhe, công nghệ sinh học, nkret njêng jru n’hanh ŭnh nar sĭt jêng tay. Hun hao wăng sa hăn ndrel đah mât njrăng ntŭk gŭ rêh, ăp tŏng geh nău rêh n’hanh geh nău tâm ban rêh jêng. Ntơm bah dơh geh bri dak n’hanh tâng jru văn hóa, nkual neh dja dôl dơi mpŏng đăt ndal, jêng găr ntil hun hao n’hanh ntĭt an trong ntĭt leo hun hao nsing ta nău gĭt blău, rgâl ƀư mhe./.