Nău mbơh ta rƀŭn nchră, năm 2024, rơh bôk năp tăch n’gluh cà phê Việt Nam rlet rlău 5 rmen đôlar, mĭn lah tay ntŭk gŭ lah nuĭh pă an cà phê têh tal 2 ta lam ntŭr neh, knŭng bah kơi Brazil. Tâm nĕ, Dak Lak-“Ntŭk têh cà phê bah Việt Nam” rgop nklăp 18% geh prăk tăch n’gluh; ndơ moh êng n’hanh ntĭm ntŭk “Cà phê Buôn Ma Thuột” ntoh lư lĕ geh măt ta rlău 100 dak n’hanh nkual neh ta lam ntŭr neh.

Tĭng wa Vanusia, Tổng giám đốc Rmôt kan Cà phê lam ntŭr neh, đah nău way tăm cà phê rlău 100 năm n’hanh ngăch tĭng công nghệ mhe tâm nkret njêng, ndrel đah ngih wâl uĕh, nău kan ndoh ndơ geh trong pơk âk, dơi boăt nthoi, nău blău n’hanh tâm boh ntŭk tăch... lah ăp nău dơh an Dak Lak dơi hun hao lôch uĕh tâm pă gưl cà phê Robusta kah. Yơn lah gay hun hao nău kan ndơ cà phê nâp nâl, Dak Lak lah êng n’hanh Việt Nam lah nsum an uănh lơn tay tât nkô̆ nău geh, ntŭk ntô, kơt dŏng công nghệ an nkra njêng. Wa Vanusia an gĭt: “Mô di he knŭng uănh nkah rnoh khlay bôk năp ma he an uănh nkah ndoh ndơ geh đŏng, rnoh khlay cà phê âk mô di lah nuĭh ƀon lan lĕ geh prăk yor ndoh ndơ geh bôk năp dŭt âk. Tal 2 nkô̆ nău đah neh, dŭt âk dak dôl rdâng đah nău mô tŏng neh tăm cà phê. Rlău nĕ he an nkah tât nkô̆ nău kỹ thuật kơt công mhe rgâl mhe mĭn ƀư mhe gay nsĭt tay săk rnglăy uĕh ngăn.

Wa Lê Đình Tư, Giám đốc Ntŭk tŭch tăm Aeroco Coffee, nkual ƀon têh Buôn Ma Thuột, n’gor Dak Lak nkoch, ăp năm dăch aơ, n’gor lĕ boăt nthoi ndâk ƀư geh du trong pih gơh si glê cà phê uĕh kah âk. Yơn nău gĭt tât ntŭk tăch gay cà phê dơi khlay tâm di ri hôm e đêt. Wa Lê Đình Tư mpŏng ŭch:

Mpôl hên lĕ râng bôk nău nkra njêng cà phê uĕh kah âk bah n’gor, tât aƀaơ cà phê bah mpôl hên lĕ dơi du đêt ntŭk jêr nuih kơp dơn. Âbaơ mpôl hên ŭch ntop kơl mpla nsơ cà phê uĕh kah bah Buôn Ma Thuột lah êng n’hanh Việt Nam lah nsum. Nĕ lah ngoăy tâm âk nkô̆ nău khlay gay ăp nuĭh way kan, ăp nuĭh wâr, nuĭh ngêt cà phê ŭch cà phê uĕh kah dơi gĭt tât, bah nĕ he mbra mpla nsơ ăp ndơ geh ơm bah cà phê Việt Nam luh lam ntŭr neh.

Lah mpeh nău mpla nsơ ndơ cà phê, ăp nuĭh ntoh măt an lah, ăp nău dŭt uĕh n’hanh n’glơi an ƀon lan geh nău ƀư tơm dŭt khlay. Dak Lak lĕ n’hanh dôl nsrôih ndâk ƀư rup gui “Buôn Ma Thuột ntŭk tât bah cà phê lam ntŭr neh”. Yơn ăp ntŭk, ntŭk kan tâm nĕ lĕ rngôch dơi mpla nsơ cà phê bah nơm luh ntŭk tăch lam ntŭr neh đah nău geh tâm trôm n’hanh nău ntĭt mpơl êng.

Wa Vũ Bá Phú, Kruanh Cục ntrŭt ngăch tăch rgâl, N’gâng kan Công thương an lah, bah meng nău ntop kơl bah Chính phủ, ăp n’gâng kan nău kan mpeh ntrŭt ngăch mpla nsơ moh ndơ ngih dak, ri yor ăp ntŭk an ƀư geh êng nău uĕh gay n’hao prêh jâng nsan cà phê bah nơm.

Ăp ntŭk joi nău êng bah nơm tâm ndơ cà phê. Nău ƀư jêng ăp ƀô kah ngăn, uĕh kah êng n’hanh nău n’glơi têh tâm nuih n’hâm nuih dŏng mbra jêng nsan têh gay mpla nsơ cà phê Việt Nam hăn lam ntŭr neh.

Ta Rƀŭn nchră, ăp ntŭk kan, doanh nghiệp, ntŭk nkra njêng tăch rgâl bah n’gor Dak Lak lĕ ký ton 18 sam ƀŭt nkah gĭt đah ăp dak bah dih, doanh nghiệp dak bah dih mpeh tăch n’gluh cà phê nkret njêng jru. Nkre ndâk ƀư trong tâm pă boăt nthoi cà phê, ndơ lŏ mir Trung Quốc; Kan ndrel gay ndâk njêng Dak Lak jêng nkual tăm cà phê nâp nâl têh hvi tĭng nău ntrŭnh mpeh nkra njêng cà phê mô ƀư roh bri n’hanh roh rui bri bah châu Âu (EUDR) n’hanh ăp nău đă ntŭk tăch, rgâl joi nău rêh bah nuĭh ƀon lan.