N’gor Dak Lak mhe mbơh lôch jêh bầu cử Đại biểu Quốc hội, Hội đồng nhân dân ăp gưl ta n’gor. Êng ta gưl n’gor, geh 84 đại biểu hŏ dơi sơch luh. Hang rkeh cử tri ta Dak Lak ntơm tĭng groi nđôi njăr trong hăn bah đại biểu tĭng ƀư jêng ngăn ngăn ăp nău ton bah he jêng nău dơi ngăn ngă, ăp đại biểu ân geh ăp nău nsrôih ngăn ngăn.

Lah du hê nuĭh tâm 84 nuĭh dơi sơch lăp đại biểu HĐND n’gor Dak Lak năm kan 2026–2031, wa H’Giang Niê, Bí thư Đảng ủy, Kruanh HĐND xã Ea M’Droh, dơn geh tay nău nsing nơm bah cử tri lôch du năm kan râng HĐND n’gor. Tĭng wa H’Giang, nău dơi sơch lăp tay mô dơn lah nău nchih nkah đah săk nơm ma hôm n’gluh ăp nău ŭch geh âk lơn mpeh nău dâk kan ngăn ngăn. Ăp lha phiếu bah kônh wa njuăl lah nău nsing nơm mpeh nău rgâl, hun hao dăng lơn bah nkual neh dak. wa H’ Giang nkoch: 

“Tâm trong leo ƀư n’gâng kan bar gưl mpôl hên ntrŏng nău khlay kan bah he lah “ntung njŏ” hăn na nê̆ n’hanh dŭt dăch dêh ƀon lan. Mpôl hên mbra tâm ôp dêh bên, nkoch di ngăn n’hanh năn ngăch ăp nău dăn đă bah cử tri ta ăp rơh hop HĐND n’gor, đăp mpăn ăp Nghị quyết rnôk n’gluh an dŏng ân "găl" n’hanh "di" đah nău ŭch geh ngăn ngăn bah n’gâng kan tâm dâng. Tâm nê, gâp dŭt êng uănh khlay đah nău tĭng ƀư ăp trong kơl rnoi mpôl đê̆, ntrôl dăng buăt nthoi pâl nđaih tuch tăm nkre đah mât ndray văn hóa, kơl kônh wa đăp mpăn nău rêh joi geh trong wăng sa n’hanh nsan hao ƀư klaih rlău ach o nâp dăng”.

Hôm đah wa Ngô Thị Minh Trinh, Bí thư Đảng uỷ, Kruanh HĐND xã Ea Knuếc, n’gor Dak Lak năl saơ tâm rơh hun hao mhe, nuĭh ntơh măt an ƀon lan mô dơn djăt, lah di ngăn nău ŭch rŏng cử tri, mât njrăng nău dơi tâm di bah ƀon lan ma hôm ân han săk, rgum nău gĭt blău n’hanh n’glăp săk, râng jru lơn tâm rnôk têh jêng n’hanh groi nđôi trong kơl, lơn lah ta ăp trong kan ma n’gâng kan tâm dâng săk geh yơn mô hŏ mât dŏng geh nău tam. Wa Ngô Thị Minh Trinh an gĭt:

“Aơ lah du nău n’hao êng đah săk nơm n’hanh gâp way mĭn lah nău n’hao êng săk n’hanh nău dơn kan way hăn ndrel nsum. Yor kơt nê̆ ma ân mpơl dŭt uĕh nău khlay kan nuĭh ntơh măt ƀon lan. Đah n’gor Dak Lak ri nău săk geh âk lah nău hun hao tuch tăm, đah nău ƀư lah du hê nuĭh ntơh măt, gâp mbra rgum gay ndrel đah n’gâng kan ăp gưl gay rdâk njêng rêng rnoh khlay đah ăp ntil ndơ tuch tăm geh rnoh khlay wăng sa âk gay nsĭt tay nău đăp mpăn an ƀon lan tâm ban kơt nău hun hao nsum bah n’gor n’hanh lơn lah rgum tâm hun hao bar mbrô”

Ngăn an saơ, Dak Lak săk geh âk mpeh tuch tăm n’hanh hôm mpăng đêt mpeh công nghiệp – rhŏ dŏng, khoa học công nghệ. Năm kan 2026-2031, Đại biểu hội đồng nhân dân n’hanh nhih pah kan nuĭh ƀon lan n’hao an ta n’gor, mbra ân tŏng geh dŭt âk nău mpŏng bah nuĭh ƀon lan tâm trong kan, lơn lah ntĭm nti, rgâl blău ƀư mhe – ntơm njêng nău kan, neh ntu, công nghiệp nkret njêng, rdâk njêng săk ntơ lư n’hanh tâm nkrêp kan nsum ntŭk tăch rgâl.

Lôch nklăch phiếu, nău dŭt uănh khlay bah cử tri lah ăp đại biểu ma he ân sơch luh dah tât nău dơi ngăn ăp nkô̆ nău ndơ̆ luh hŏ nkoch tâm bôk nău kan.

Tĭng wa Trần Xuân Định, Kruanh Ban Pah kan Mặt trận, tổ dân phố 2, phường Thành Công, n’gor Dak Lak, cử tri mbra tĭng groi nđôi n’hanh ân ton bah năp bầu cử dơi mpơl ma nău lôch jêh pah kan tâm tĭng năm bah năm kan.

“Ăp oh nô lah nuĭh ntơh măt bah ƀon, lah I ntung njŏ đah nău Đảng n’hanh nuih n’hâm ƀon lan. Gâp dŭt mpŏng lah ăp oh nô dăch dêh, krêp dêh đah ƀon lan, wât dơi nău rêh bah ƀon lan gay rdâk njêng n’gor hun hao tâm let năp tay."

Tĭng wa Cao Thị Hòa An, Ủy viên Ban Chấp hành Trung ương Đảng, Groi Bí thư Rnâng kan Tỉnh ủy, Kruanh HĐND n’gor, Kruanh Ủy ban bầu cử n’gor Dak Lak, rơh bầu cử đại biểu Quốc hội khóa XVI n’hanh đại biểu HĐND ăp gưl năm kan 2026–2031 ta n’gor hŏ dơi nchrăp n’hanh ƀư ăp dăp, đăp mpăn ƀư tơm, di pháp luật, rĭng grep n’hanh geh nău dơi uĕh lăng.

84 đại biểu HĐND n’gor khóa XI dơi cử tri nsing nơm sơch lah ăp nuĭh ntoh lư n’hanh nuih n’hâm uĕh lăng n’hanh nău dơi, ntơh măt an nău mĭn, nău mpŏng rŏng geh bah ƀon lan ăp rnoi nuĭh tâm n’gor. Aơ nkre lah rhơn n’hao, nkre lah nău dơn kan têh kuâng, ăp nuĭh ntơh măt ân mô rlu nsrôih, ntik n’hao nău dơn kan tâm năm kan mhe:

“Ăp đại biểu, ăp nuĭh ntoh lư mpeh nău dơi n’hanh nuih n’hâm uĕh lŏng, ân ntik n’hao nuih n’hâm dơn kan, mât tâm boh dêh bên n’hanh nkoch di nău rgop bah cử tri. Nkre, ăp nuĭh ntơh măt ân nsrôih râng n’glêh an ăp nkô̆ khlay bah n’gâng kan ta ntŭk n’hanh groi nđôi lhăt nău tĭng ƀư ăp trong nchrăp, trong kơl pháp luật ta ntŭk, gay n’hao săk tam kan bah nhih pah kan nuĭh ƀon lan n’hao an let năp tay.”

He mbra dơi saơ, nău dơi bah rơh bầu cử mô dơn n’glĕ ta nău wat jêh rêng ƀư tĭng quy định ma hôm pơk luh du njăr trong mhe đah âk nău mpŏng. Ăp đại biểu dơi sơch nar aơ mbra têk nkre nău nsing nơm bah cử tri, ntơm jêng du njăr trong tĭng ƀư nău dơn kan bah he ma nuih n’hâm lĕ ma nău kan, dâk kan ngăn ngăn, rgop ndơ̆ Dak Lak hun hao ngăch n’hanh nâp dăng jŏ jong.